വേർപിരിയൽ [ജ്വാല] 1432

അവന്റെ ഊഴം വന്നെത്തി, പെട്ടന്ന് അവനെ കടന്നു മുന്നിലേക്ക് പോയ അവളുടെ നടത്തം ഒരുനിമിഷം അവൻ നോക്കി നിന്നു

വിയര്‍പ്പിന്റെ കണികകള്‍ കാഴ്ച മറയ്ക്കുന്നിടയില്‍ അവനാ തടിച്ച രജിസ്റ്ററില്‍ ഒപ്പുവച്ചു.

വേര്‍പിരിയലിന്റെ നിമിഷാര്‍ദ്രത്തില്‍ അവനാ കണ്ണുകളിലേക്ക് ഒരിക്കല്‍കൂടി നോക്കി.

ഭാവ പകര്‍ച്ചയ്ക്കൊടുവില്‍ വന്ന വിജയ ഭാവം, ചുണ്ടുകളിൽ ഒരു പുഞ്ചിരി ഒളിച്ചിരിക്കുന്നു.

ജീവിതത്തിന്റെ കാന്‍വാസിനു കഴിയാത്തത് കൈയൊപ്പിനു സാധിച്ചു.

സാവധാനം അവൻ കോടതിയുടെ പടികള്‍ ഇറങ്ങി…

അവന്റെ പിന്നിൽ മീഡിയം ക്ളോസപ്പ് ഷോട്ടിൽ കുടുംബകോടതിയുടെ വലിയ കവാടം കാണിക്കുന്നുണ്ടായിരുന്നു.

************************************
ആദ്യ ചിത്രത്തിന്റെ പ്രദർശനം കഴിഞ്ഞു. ജൂറി പാനലിൽ ആർക്കും അഭിപ്രായ വ്യത്യാസങ്ങൾ ഇല്ല.

ഒരു ചെറുകഥപോലെ മനോഹരം എന്ന് പറഞ്ഞ ജൂറി ആ സ്ത്രീയുടെ അഭിനയത്തെ പ്രശംസിക്കാനും മറന്നില്ല.

ശങ്കർ തന്റെ ഫോണെടുത്ത് ഭാര്യയെ വിളിച്ചു.
ഒരു സൗന്ദര്യ പിണക്കം കഴിഞ്ഞ് ഇറങ്ങിയതാണ്.
രാവിലെ ഇങ്ങോട്ടേക്ക് പുറപ്പെടാൻ തുടങ്ങിയപ്പോൾ ആരംഭിച്ച പായാരം പറച്ചിൽ ആയിരുന്നു അവളുടേത്, അത് പിറുപിറുപ്പുകളിലേക്ക് മാറി, പിന്നെ രണ്ടാളും അങ്ങോട്ടും, ഇങ്ങോട്ടും ഒന്നും രണ്ടും പറഞ്ഞു വലിയ വഴക്കാകാൻ അധിക സമയം വേണ്ടി വന്നില്ല.

തന്റെ വ്യക്തിത്തം ചോദ്യം ചെയ്തപ്പോൾ അറിയാതെ കൈ ഒന്ന് പൊങ്ങിപ്പോയി. അവളുടെ കവിൾത്തടം ചുവന്നു തുടുക്കുന്നത് അവൾ കരഞ്ഞു കൊണ്ട് ഓടുന്നതിനിടയിൽ കണ്ടിരുന്നു.

ലോകം ബഹുമാനിക്കുന്ന സംവിധായകന്റെ തിരക്കോ, ക്രിയേറ്റിവിറ്റിയോ അവൾക്കറിയണ്ട കാര്യമില്ല.

എപ്പോഴും തന്റെ ഒപ്പം ഇരിക്കണം, നിർബന്ധവും, പിടിവാശിയും മാത്രമേ അവൾക്കുള്ളൂ.

ഭ്രാന്തമായ സ്നേഹം ചിലപ്പോഴൊക്കെ ശാപമായി മാറാറുണ്ട്.

ഫോൺ വളരെ നേരം റിംഗ് ചെയ്തു നിന്നു. അടുത്ത സിനിമ തുടങ്ങാറായി എന്ന് അറിയിപ്പ് ലഭിച്ചു ശങ്കർ ഫോൺ ഓഫ് ചെയ്ത് തീയറ്ററിനുള്ളിലേക്ക് കടന്നു.
***********************************