വസന്തം പോയതറിയാതെ -18 [ദാസൻ] [Climax 1] 436

” എന്നോട് മാപ്പ് ഒന്നും പറയേണ്ട കാര്യമില്ല, എനിക്ക് ആരോടും ദേഷ്യമില്ല. പിന്നെ…… ”

തന്നെ മുഴുമിപ്പിക്കാൻ സമ്മതിക്കാതെ ഇടയിൽ കയറി ഗൗരി

” എനിക്കറിയാം മറക്കാനും പൊറുക്കാനും കഴിയില്ലെന്ന് ഞാൻ പറഞ്ഞതാണ്, തമ്മിൽ സംസാരിക്കട്ടെ എന്ന് പക്ഷേ, ആരും അതിനെ ഗൗനിച്ചില്ല. അതുകൊണ്ട് സംഭവിച്ചു പോയതാണ് ഇതൊക്കെ ”

അപ്പോഴും ഇവൾക്ക് ചെയ്ത തെറ്റുകളുടെ ഗൗരവം മനസ്സിലായിട്ടില്ല. ആർക്കോവേണ്ടി  ഇതൊക്കെ ചെയ്യുന്നു.

” അപ്പോൾ എങ്ങനെ വേണമെങ്കിലും ചെയ്യാം. താര യോടൊപ്പം താമസിക്കണമെങ്കിൽ അങ്ങനെയാകാം  പക്ഷേ, ഇവിടെയുള്ളവരുടെയും നമ്മുടെ വീട്ടുകാരുടെയും മുമ്പിൽ നമ്മൾ ഭാര്യ ഭർത്താക്കന്മാരാണ്. അവർക്ക് ഒരു സംസാരത്തിന് ഇടവരുത്താതെ പ്രത്യേകിച്ചും, അവിടുത്തെ അമ്മക്ക് വിഷമം ഉണ്ടാകാത്ത വിധത്തിൽ എന്താണ് ചെയ്യേണ്ടതെന്ന് ഗൗരിക്ക് തീരുമാനിക്കാം. ജോലിയുടെ കാര്യം ഞാൻ നാളെ തന്നെ റെഡിയാക്കാം, എപ്പോൾ വേണമെങ്കിലും നിങ്ങളുടെ സൗകര്യത്തിന് ജോലി ഉപേക്ഷിക്കാം. ഏതുതരത്തിലുള്ള ജോലിയാണ് വേണ്ടത് എന്ന് പറഞ്ഞാൽ മതി. മൊത്തം കമ്പനിയുടെ ഇൻചാർജ് വേണോ, അങ്ങനെയെങ്കിൽ നിങ്ങൾക്ക് എവിടെ വേണമെങ്കിലും കമ്പനി ചെലവിൽ യാത്ര ചെയ്യാം. അതായിരിക്കും നിങ്ങൾക്ക് നല്ലത് കാരണം, എവിടെ വേണമെങ്കിലും യാത്ര ചെയ്യുകയും ആരെ വേണമെങ്കിലും മീറ്റ് ചെയ്യുകയും ആവാം ”

അതിന് ദേഷ്യത്തിലാണ് ഗൗരി മറുപടി പറഞ്ഞത്

” അവസാനം പറഞ്ഞതിന്റെ പൊരുൾ എനിക്ക് മനസ്സിലായില്ല. എനിക്ക് നിങ്ങളുടെ കമ്പനി ചെലവിൽ ആരെയും കാണാൻ പോകേണ്ട. എനിക്ക് ഈ കോമ്പൗണ്ടിൽ തന്നെ ഒരു സാധാരണ ജോലിക്കാരുടെ പണി കിട്ടിയാൽ മതി, അടുക്കളപ്പണി ആയാലും  ഞാൻ അഭിമാനത്തോടെ എടുക്കും ”

” അപ്പോൾ ഇവിടെ നിന്നും പുറത്തേക്ക് പോകേണ്ട. ശരി നാളെത്തന്നെ ജോലിക്ക്  ജോയിൻ ചെയ്യാൻ തയ്യാറായിക്കോ ”

ഗൗരി പറഞ്ഞു

” രണ്ട് അമ്മമാരെയും മോളെയും വിഷമിപ്പിക്കേണ്ട ഞാൻ ഇവിടെ നിന്നോളാം. അമ്മ വരുമ്പോൾ ആ മുറിയിൽ താഴെ ഒരു ഷീറ്റ് വിരിച്ച് കിടക്കാനുള്ള അനുവാദം തരണം. അല്ലെങ്കിൽ അമ്മയുടെ മുമ്പിൽ നൂറു ചോദ്യങ്ങൾക്ക് ഉത്തരം പറയേണ്ടിവരും. ”

” എന്നെ വിശ്വാസമുണ്ടെങ്കിൽ, എവിടെ വേണമെങ്കിലും കിടക്കാം. പക്ഷേ…… ”

” എന്താണ് ഒരു പക്ഷേ? ”

” മറ്റുള്ളവർ അറിഞ്ഞാൽ ”

” ഏത് മറ്റുള്ളവർ ”

” നിങ്ങൾക്ക് പ്രശ്നമില്ലെങ്കിൽ എനിക്കെന്ത് പ്രശ്നം “