പ്രിയമുള്ളവരേ, ഇതെന്റെ ഒരു ഭ്രാന്തൻ ചിന്ത ചുമ്മാ കോറിയിട്ടതാണ്… ഒരു സ്ട്രക്ചറോ, ലോജിക്കോ ഒന്നും ഇല്ലാതെ,ശെരിക്കും മനസ്സിൽ തോന്നിയ കാര്യങ്ങൾ അതുപോലെ ഇങ്ങോട്ട് പകർത്തിവെച്ചു… കുറച്ചേ ഉള്ളൂ, വായിച്ച തെറി വിളിക്കില്ലെന്ന പ്രതീക്ഷയിൽ സമർപ്പിക്കുന്നു…

Nb-പൂർത്തിയാക്കാത്ത ഒരു കഥ പെന്റിങ് കിടക്കുന്നുണ്ടെന്ന് ഓർമയില്ലാഞ്ഞിട്ടല്ല, അത് മുന്നോട്ട് കൊണ്ടുപോകാനുള്ള മൂഡ് ആയില്ലാത്തതുകൊണ്ട് അതുപോലെ കിടക്കുന്നതാണ്… എന്നെങ്കിലും പൂർത്തിയാക്കുമെന്നും ഉറപ്ല് തരുന്നു..

 

സഫലമീ യാത്ര

Safalamee Yaathra | Author : Fire blade

 

ഓർമകളുമായി മല്ലിട്ടു ക്ലബ്ബിന്റെ ജനൽപാളിയിലൂടെ പുറത്ത് ത്തിമർത്തു പെയ്യുന്ന മഴയെ നോക്കി നിൽക്കുമ്പോളാണ് അമൽ ദൃതിയിൽ വാതിൽക്കൽ വന്നു നിന്നത്…

വന്നപ്പാടെ ഇടം കൈ കൊണ്ട് നിറഞ്ഞ കണ്ണീർ തൂത്തുക്കൊണ്ട് എന്റെ അരികിലേക്ക് വേഗത്തിൽ കടന്നു വന്നു…ഞാൻ അവനെയൊന്നു നോക്കി വീണ്ടും തിരികെ മഴയിലേക്ക് കണ്ണ് നട്ടു…

ഈ മഴയ്ക്കൊന്നും എന്റെ ഉള്ളിൽ കത്തിക്കൊണ്ടിരിക്കുന്ന അഗ്നിയെ കെടുത്താനാവില്ല, പക്ഷെ ഈ ജനൽ കമ്പിയിൽ തൂങ്ങി താഴേക്ക് പതിക്കുന്ന ഓരോ കണികയും ഓർമിപ്പിക്കുന്ന ഒരു മുഖമുണ്ട്….. പ്രഭാതത്തിലെ തുളസികതിര് പോലെ നൈർമ്മല്യമുള്ള അവളുടെ മുഖം..

” അജൂ…. ഡാ…. ”

അവൻ എന്നെ തിരിച്ചു നിർത്തി..

” കേട്ടത് നേരാണ്….. പോയെഡാ…. ”

എന്നെ നെഞ്ചിൽ ചേർത്ത് മുറുകെപ്പിടിച്ചു അവൻ പൊട്ടിക്കരഞ്ഞു…

 

” അവൾ പോയി…..നിന്നേം വിട്ട്….”

പ്രതീക്ഷിച്ച കാര്യമായിട്ടും എനിക്ക് കാലു തളരുന്നത് പോലെ തോന്നിയപ്പോൾ ഞാൻ സ്റ്റൂളിൽ ഇരുന്നു..

പുറത്ത് പെയ്യുന്ന മഴ കണ്ണിലേക്കു ഉറഞ്ഞുകൂടി… തല താഴ്ത്തി ഇരുന്നപ്പോൾ അവൻ കുലുക്കി വിളിക്കുന്നു..

വയറിനുള്ളിൽ എന്തോ ഒരു ആന്തൽ, അത് പതിയെ പതിയെ പുളിച്ചു തികട്ടി മുകളിലേക്ക് വന്നു..എനിക്ക് വായിൽ കയ്പ്പുരസം നിറഞ്ഞപ്പോൾ ആഞ്ഞു തുപ്പി…