രുദ്ര 2 [രാവണാസുരൻ] 200

ഛീ പോടാ എന്ന് പറഞ്ഞു അവനെ പിടിച്ചു തള്ളിയിട്ടു കുഞ്ഞന്റെ കയ്യും പിടിച്ചു പാത്തു തിരിഞ്ഞു നടന്നു പക്ഷേ ജിത്തു പിന്നിൽ നിന്നും പാത്തുവിന്റെ കൈക്ക് പിടിച്ചു അവൾ ജിത്തുന്റെ ചെകിടടച്ചു ഒരെണ്ണം കൊടുത്തു.ദേഷ്യം വന്ന ജിത്തു പാത്തുവിന്റെ മുടിക്ക് കുത്തിപ്പിടിച്ചു തന്നോടടുപ്പിച്ചു അവന്റെ ഉദ്ദേശം മനസ്സിലായ പാത്തു കഴിവിന്റെ പരമാവധി അവനിൽ നിന്നും കുതറി മാറാൻ ശ്രമിച്ചു പക്ഷെ അവന്റെ കൈകരുതിനു മുന്നിൽ അവളുടെ ചെറുത്തുനിൽപ്പുകൾ വിലപ്പോയില്ല.അവൾ കണ്ണുകൾ കൂട്ടിയടച്ചു
കുറച്ചു നിമിഷങ്ങൾക്കകം അവന്റെ കൈ തന്റെ മുടിയിൽ നിന്നും അകന്നു പോകുന്നത് അവളറിഞ്ഞു കണ്ണുകൾ തുറന്നു നോക്കി മുന്നിൽ രുദ്ര ഏച്ചി നിൽക്കുന്നു.തന്റെ മുടിക്ക് പിടിച്ചിരുന്നവൻ താഴെ വീണു കിടക്കുന്നു.അവിടെ എന്താണ് സംഭവിച്ചതെന്ന് അവൾക്ക് കൂടുതൽ ആലോചിക്കേണ്ടി വന്നില്ല.

ഞാൻ എന്റെ സുഹൃത്തുമായി സംസാരിച്ചു നിൽക്കുവായിരുന്നു അപ്പോഴാണ് പിന്നിൽ ആൾക്കൂട്ടവും എന്തോ ബഹളവും കേട്ടത് എന്താണെന്നറിയാൻ അങ്ങോട്ട് പോയി അപ്പോഴാണ് ഒരുത്തൻ പാത്തുവിന്റെ മുടിക്ക് കുത്തിപ്പിടിച്ച് അവളോട് മുഖമടുപ്പിക്കുന്നത് കണ്ടത്.പിന്നെ ഒന്നും നോക്കിയില്ല ആളുകളെ വകഞ്ഞു മാറ്റി ചാടി അവന്റെ അടുത്തെത്തി കൈമുട്ടിന് സൈഡിലായുള്ള പേശിയിൽ നടുവിരൽ കൊണ്ട് ഒന്ന് അമർത്തി അവന്റെ കൈ അയഞ്ഞു.പുറം കാലിന് ഒരു കിക്കും മോന്തയ്ക്കിട്ട് ഒരിടിയും കൊടുത്തു അവൻ താഴെ വീണു.അടുത്തവൻ ഓടി വരുന്നുണ്ട് അടി വാങ്ങാൻ ഞാൻ അവന്റെ നേർക്ക് ഓടി അവൻ മുന്നോട്ട് വച്ച കാലിന്റെ മുട്ടിൽ ചവിട്ടി അവന്റെ തലയ്ക്ക് മുകളിൽ പൊങ്ങി കൈമുട്ട് കൊണ്ട് നെറുകംതലയ്ക്കിട്ട് ഒരെണ്ണം കൊടുത്തു എന്നിട്ട് ചവിട്ടി നിന്ന കാൽമുട്ടിൽ ഒന്ന് ബലംകൊടുത്തു താഴ്ത്തി അവന്റെ കാൽ ഒടിഞ്ഞു.അവന്റെ പിന്നാലെ വന്നവൻ എനിക്ക് നേരെ കയ്യോങ്ങി ഞാൻ ഒരു ചുവട് പുറകോട്ട് വച്ചു എന്നിട്ട് അവന്റെ കൈ എന്റെ വലതുവശത്തേയ്ക്ക് തട്ടി മാറ്റി എന്നിട്ട് അവന്റെ അടിനാഭിക്ക് ഒരെണ്ണം കൊടുത്തു.ഇത്രയും കഴിഞ്ഞപ്പോഴേയ്ക്കും എന്റെ പിന്നിൽ നിന്ന് ഒരു അലർച്ച കേട്ടു
നോക്കിയപ്പോ അപ്പു ഒരുത്തന്റെ കയ്യൊടിച്ചു
ഈ തെണ്ടി അല്ലെങ്കിലും ഇങ്ങനെയാ ഞാൻ എവിടെയെങ്കിലും ഒന്ന് അടിയുണ്ടാക്കി ഒന്ന് ഫോം ആയി വരുമ്പോഴേക്കും വന്ന് ഇടപെടും ഇതിപ്പോ അവന്റെ കാമുകിയെ കൈക്കുപിടിച്ചവന്റെ കൈ ഒടിച്ചതാ.ഞാൻ അവസാനത്തേയ്ക്ക് മാറ്റിവയ്ച്ചിരുന്നതാ അവൻ ആദ്യം തന്നെ ചെയ്തു. ഇതൊക്കെ ആലോചിച്ചു നിന്നപ്പോഴേയ്ക്കും ആരോ ഒരുത്തൻ എന്നെ പിന്നിൽ നിന്ന് ചവിട്ടി.ഞാൻ രണ്ടു സ്റ്റെപ്പ് മുന്നേയ്ക്കാഞ്ഞു തിരിച്ചടിക്കാൻ തിരിഞ്ഞപ്പോഴേയ്ക്കും അപ്പു ഓടി അവന്റെ അടുത്തെത്തി അവന്റെ മോന്തയ്ക്കിട്ട് ഒരെണ്ണം കൊടുത്തു എന്നിട്ട് അവൻ കയ്യോങ്ങിയപ്പോൾ കൈപിടിച്ച് മടക്കി ഇടയ്ക്ക് അവന്റെ കയ്യുംവച്ചു ഒന്ന് ബലംകൊടുത്തു അവന്റെ കയ്യും ഒടിച്ചു.ഈ ചെക്കന് ആരോ കയ്യൊടിക്കുന്നതിൽ കൈവിഷം കൊടുത്തിട്ടുണ്ട്. ഇനിയിപ്പോ ഇവൻ ഹോസ്പിറ്റലിൽ നിന്ന് വല്ല കമ്മീഷനും വാങ്ങുന്നുണ്ടോ കൈയടിക്കുന്നതിന്.
ആ എന്തെങ്കിലും ആകട്ടെ.
അയ്യോ ഇങ്ങനെ നോക്കി നിന്നാൽ ഡയലോഗ് അടിക്കാനുള്ള അവസരവും കൂടെ ഇവൻ തട്ടിയെടുക്കും അത് അനുവദിച്ചുകൊടുത്തുകൂടാ.

ടാ ജോണേ ഇവന്മാരെപ്പോലെ തല്ലുകൊള്ളികളെയാണോ ഉത്സവത്തിന് വിളിക്കുന്നത്.ഇതിന് നിനക്കിട്ടും രണ്ടെണ്ണം പൊട്ടിക്കേണ്ടതാ പിന്നെ നീ എന്റെ സിജോടെ അനിയനായത്കൊണ്ട് ഞാൻ ഒന്നും ചെയ്യുന്നില്ല.എന്തായാലും ഉത്സവം കഴിഞ്ഞിട്ട് ഞാൻ അവനെ ഒന്ന് വിളിക്കുന്നുണ്ട്. പിന്നെ ജോണേ ഇവന്മാരെ ഹോസ്പിറ്റലിൽ ആക്കിയേരെ ഞാൻ വിളിച്ചു പറഞ്ഞേക്കാം ഉത്സവം കഴിഞ്ഞാൽ ഒറ്റയൊരെണ്ണത്തിനെ ഈ ശിവപുരത്തു കണ്ടുപോകരുത് കണ്ടാൽ നീയൊന്നും രണ്ടുകാലിൽ കുടുംബത്ത് കേറത്തില്ല.