രുദ്ര 2 [രാവണാസുരൻ] 200

എന്താടാ കുഞ്ഞാ.

ഇത്ത ഇങ്ങോട്ട് നോക്ക്. അതും പറഞ്ഞ് അവന്റെ പോക്കറ്റിൽ നിന്നും ഒരു കണ്ണാടി എടുത്ത് എനിക്ക് വച്ചു തന്നു.

അപ്പൊ നിനക്ക് വേണ്ടേടാ കുഞ്ഞാ?

അത് ഇത്ത മ്മക്ക് ഒരെണ്ണം കൂടെ വാങ്ങാം എന്നിട്ട് അതും വച്ച് മ്മക്ക് ഈ ഉത്സവപ്പറമ്പ് മൊത്തം ചുറ്റിക്കാണണം. കുഞ്ഞൻ പറഞ്ഞു

ഓഹോ മോന്റെ ആഗ്രഹം കൊള്ളാമല്ലോ എന്തായാലും വാടാ മ്മക്ക് കണ്ണാടി വാങ്ങാൻ പോകാം.
അങ്ങനെ ഞങ്ങൾ രണ്ടും കണ്ണാടിയൊക്കെ വച്ച് ഉത്സവപ്പറമ്പ് മൊത്തം ചുറ്റി നടന്നു.അപ്പോഴാ മുത്തശ്ശൻ വന്നത്

എന്താ മോളെ എന്തോ പ്രശ്നം ഉണ്ടായി എന്നൊക്കെ അറിഞ്ഞു.മുത്തശ്ശൻ ചോദിച്ചു

അതൊന്നുമില്ല മുത്തശ്ശാ മ്മടെ അവറാച്ചന്റെ മൂന്നാമത്തെ മോനില്ലേ അവന്റെ രണ്ടുമൂന്നു തലതെറിച്ച കൂട്ടുകാർ വന്നിരുന്നു അതിൽ ഒരുത്തൻ പാത്തൂന്റെ കൈക്ക് പിടിച്ചു ഞാനും അപ്പുവും ആവശ്യത്തിന് കൊടുത്തിട്ടുണ്ട്.

മ്മ് പാത്തുന് കുഴപ്പമൊന്നുമില്ലല്ലോ അല്ലേ? മുത്തശ്ശൻ ചോദിച്ചു

ഇല്ല മുത്തശ്ശാ അവൾക്ക് കുഴപ്പമൊന്നുമില്ല.

ടാ കുഞ്ഞാ നീ കണ്ണാടിയൊക്കെ വച്ച് അങ്ങ് വലിയ ആളായിപ്പോയല്ലോ. മുത്തശ്ശൻ കുഞ്ഞനോട് ചോദിച്ചു

അത് മുത്തശ്ശാ ഞങ്ങള് ഇങ്ങനെ ജോഡിയായിട്ട് നടക്കുവായിരുന്നു അതാ ഞാൻ വലിയ ആളായ പോലെ തോന്നുന്നത്. കുഞ്ഞൻ പറഞ്ഞു

മ്മ് നീ രുദ്രയെ ആരും ഒന്നും ചെയ്യാതെ നോക്കിക്കോണേ.
ശരി മോളെ ഞാനാ കമ്മറ്റി ഓഫീസിൽ കാണും നിങ്ങൾ പോകാൻ നേരം അങ്ങോട്ട് ഒന്ന് വന്നിട്ട് പോണേ. അതും പറഞ്ഞ് മുത്തശ്ശൻ പോയി

കുഞ്ഞൻ ഇപ്പൊ എന്റെ ബോഡിഗാർഡിനെ പോലെ നെഞ്ചോക്കെ വിരിച്ച് കയ്യും പിടിച്ചു നടക്കുന്നുണ്ട്.

അങ്ങനെ ഞങ്ങൾ നടത്തി ക്ഷേത്രത്തിന്റെ ആളൊഴിഞ്ഞ ഒരു മൂലയ്ക്ക് എത്തി അപ്പോഴുണ്ട് ആൽത്തറയിൽ ഒരു ഒഴിഞ്ഞ മൂലയിലായി മ്മടെ കഥാ നായകനും നായികയും കൊഞ്ചി കുഴഞ്ഞിരിക്കുവാ.
ആരാണെന്ന് മനസ്സിലായിക്കാണും അല്ലേ അവര് തന്നെ അപ്പുവും പാത്തുവും.
ഇവളെ ആണോ അവന്മാർ ശല്യപ്പെടുത്തിയതെന്ന് തോന്നിപോകും അമ്മാതിരി കൊഞ്ചികുഴയലാ രണ്ടും.
ഞാനും കുഞ്ഞനും പതുങ്ങി പതുങ്ങി അവരുടെ പുറകു വശത്തൂടെ പോയി രണ്ടിന്റെയും ചെവിക്ക് പിടിച്ചു.

അതേയ് മോനെ അപ്പു നിന്നെ ഇവളുടെ കൂടെ പറഞ്ഞയച്ചത് അവളെ ഒന്ന് സമാധാനിപ്പിക്കാനാ.ഞങ്ങൾ രണ്ടും ഇവിടം മൊത്തം അന്വേഷിച്ചു നിങ്ങൾ ഇവിടെ വന്ന് കിന്നരിച്ചിരിക്കുവാണല്ലേ.

അത് പിന്നെ ഏച്ചി ഞങ്ങൾ നിങ്ങളെ തേടി ഉത്സവപ്പറമ്പ് മൊത്തം നടന്നു ക്ഷീണിച്ചപ്പോ ഇവിടെ വന്നിരുന്നതാ അല്ലാതെ കിന്നരിച്ചിരുന്നതൊന്നുമല്ല.അല്ല നിങ്ങൾ ഇതെവിടെ പോയി കിടക്കുവായിരുന്നു? അപ്പു പറഞ്ഞു

മോനെ അപ്പു ഏച്ചിയെ പഠിപ്പിക്കല്ലേ.

അത് പിന്നെ അപ്പു ഏട്ടാ നിങ്ങൾക്ക് മാത്രം ജോഡിയായി നടന്നാൽ മതിയോ ഞങ്ങളും ഈ കണ്ണാടിയൊക്കെ വച്ച് ജോഡിയായി നടന്നതാ നാട്ടുകാര് കാണാൻ.കുഞ്ഞൻ പറഞ്ഞു