രാക്ഷസൻ 4 [FÜHRER] 324

ആ എന്റെ മുന്നില്‍ കിടന്നു നീ കുരയ്ക്കുന്നോടാ നായേ.. പച്ചയ്ക്കു നിന്നെ ഇവിടിട്ടു കത്തിച്ചുകളയും.. സ്‌റ്റേഷനില്‍ അയാളുടെ ശബ്ദം മുഴങ്ങിക്കേട്ടു..

പോലീസുകാര്‍ പോലും അയാളുടെ രൗദ്രഭാവം കണ്ട് അമ്പരന്നു പോയി. അയാള്‍ എല്ലാവരെയും ഒന്നു നോക്കി.

വാടാ പിള്ളേരെ.. ഇവിടൊരുത്തനം നിന്നെയൊന്നും  ഒരു പുല്ലും ചെയ്യില്ല.. അതും പറഞ്ഞ് അലോകിനും കൂട്ടുകാരെയും വിളിച്ചു മുന്നോട്ടു നടന്നു.

അയാളെ അത്ഭുതത്തോടെയാണ് അലോക് നോക്കിക്കണ്ടത്. സൗമ്യതയുടെ മുഖഭാത്തോടെ സംസാരിച്ചിരുന്ന അയാളുടെ ക്രോധം കണ്ട പോലീസുകാര്‍ പോലും പേടിച്ചു വിറച്ചുനിന്നത് അവനില്‍ ആരാധനയുളവാക്കി.

അയാള്‍ക്കൊപ്പം നടന്നു പോകുമ്പോള്‍ അവന്‍ മനസിലുറപ്പിച്ചു തനിക്കും ഇതുപോലൊരു നേതാവാകണമെന്ന്.നേതാവായില്ലേലും തന്നെ കണ്ടും ആളുകള്‍ ഭയന്നു വിറയ്ക്കണമെന്ന് അവന്‍ മനസില്‍ കരുതി.

ഒരാള്‍ക്കു മറ്റൊരാളോടു ഭയം ജനിക്കണമെങ്കില്‍ പണം ഉണ്ടായാല്‍ മാത്രം പോരായെന്ന് അലോകിനു സ്‌റ്റേഷനിലെ സംഭവത്തോടെ മനസിലായിരുന്നു. തന്റേതായ സാമ്രാജ്യം പടുത്തുയര്‍ത്തണമെന്ന് അവന്‍ കണക്കു കൂട്ടി. അവിടുത്തെ നീതിയും ന്യായവും താന്‍ തന്നെ നടപ്പാക്കുമെന്ന് അവന്‍ ഉറപ്പിച്ചു. മനസില്‍ ആറ്റിക്കുറിക്കിയ തീരുമാനങ്ങളുമായി അലോക് വീണ്ടും സ്‌കൂളിന്റെ പടി കയറി.

അന്നത്തെ സംഭവം അറിഞ്ഞു അവനെ  മറ്റുകുട്ടികള്‍ ഉറ്റുനോക്കുന്നുണ്ടായിരുന്നു. അവരില്‍ അവന്‍ ഭയം കണ്ടു. അവന്‍ ആ ഭയത്തെ ആസ്വദിക്കാന്‍ തോന്നി. അവൻ തൻ്റെ പൊടിമീശ പിരിച്ചു അവരെ നോക്കി.

ക്ലാസിലേക്കു വന്ന അലോകിനെ കണ്ടു മീര അവനരികിലേക്ക് ഓടിയെത്തി.

അലോകേ നിനക്കെന്തെങ്കിലും പറ്റിയോ. പോലീസുകാര്‍ നിന്നെ എന്തെങ്കലും ചെയ്‌തോ. അവള്‍ ഓരോന്നും ചോദിച്ചുകൊണ്ടിരുന്നു.