പ്രാണേശ്വരി 5-10 [പ്രൊഫസർ ബ്രോ] 338

അത്രയും പറഞ്ഞതും അവളുടെ കണ്ണിൽ കൂടെ വെള്ളം വരാൻ തുടങ്ങി. ഇതിനു മാത്രം കണ്ണുനീർ ഈ പെണ്ണുങ്ങൾക്ക്‌ മാത്രം എവിടെ ഇരിക്കുന്നോ എന്തോ…

“ലച്ചു കരയല്ലേ ഞാൻ ചുമ്മാ പറഞ്ഞതാ ”

“അവനു ചുമ്മാ പറയാൻ കണ്ട കാര്യം… പ്രിയപ്പെട്ടവർ പോകുമ്പോ ഉണ്ടാവുന്ന വിഷമം നിനക്ക് മനസ്സിലാവില്ല.എനിക്ക് നന്നായി മനസ്സിലാവും ”

അത് പറഞ്ഞപ്പോൾ പെണ്ണ് വിങ്ങിപ്പൊട്ടി കരയുകയാണ്. അച്ഛനെ ഓര്മവന്നെന്നു തോന്നുന്നു. ഞാൻ തമാശക്ക് പറഞ്ഞതാണെങ്കിലും അവൾക്കു നല്ല വിഷമമായി

“ലച്ചു… സോറി ഞാൻ ഇനി അങ്ങനെ പറയില്ല ”

“ഹ്മ്മ് സാരമില്ല ”

അത്രയും പറഞ്ഞു അവൾ കണ്ണ് തുടച്ചു. പിന്നയും കുറച്ചു സമയം സംസാരിച്ചു ഞങ്ങൾ പിരിഞ്ഞു 2ദിവസം കാണാതെ ഇരിക്കുന്നതിന്റെ വിഷമം രണ്ട് പേർക്കും ഉണ്ടായിരുന്നു.

റൂമിൽ എത്തി എല്ലാം പാക്ക് ചെയ്ത് ആഷികിനെയും കൂട്ടി മാളുചേച്ചിയുടെ അടുത്തേക്ക് പോയി, എന്നെ അവിടെ ഇറക്കി ആഷിക് തിരിച്ചു പോയി

അവിടെ ചെന്നപ്പോൾ രണ്ടു പേരും റെഡി ആയി എന്നെ വെയിറ്റ് ചെയ്തു ഇരിക്കുകയാണ്. താമസിച്ചതിനു കുറച്ചു വഴക്കും കേട്ടു. ലീലാന്റി 2കവർ നിറയെ എന്തൊക്കെയോ പാക്ക് ചെയ്ത് എടുത്തിട്ടുണ്ട് അതെല്ലാം എടുത്തു കാറിന്റെ പിന്നിൽ വച്ചു. ആന്റി പിന്നിലും ഞങ്ങൾ മുന്നിലും കയറി വീട്ടിലേക്കുള്ള യാത്ര തുടങ്ങി. ഒരു മാസത്തിനു ശേഷം വീട്ടിലേക്ക്….

യാത്ര തുടങ്ങിയതും ചേച്ചി ചെറിയ ശബ്ദത്തിൽ പാട്ട് വച്ചു

“മണ്ണിൽ ഇന്ത കാതൽ ഇൻഡ്രി യാരും വാഴ്തൽ കൂടുമോ

എണ്ണം കണ്ണി പാവൈ ഇൻഡ്രി ഏഴു സ്വരം താൻ പാടുമോ

പെൺമൈ ഇൻഡ്രി മണ്ണിൽ ഇൻബം യേതടാ

കണ്ണയ് മൂടി കനവിൽ വാഴും മാനിട ”

ഇളയരാജ SPB കോംബോ, ആ പാട്ട് എപ്പോ കേട്ടാലും ഒരു പ്രിത്യേക ഫീൽ ആണ്. ഇപ്പൊ പിന്നെ സ്വന്തമായി ഒരു പ്രേമം കൂടി ആയപ്പോ ഇതുവരെ തോന്നാത്ത അർഥങ്ങൾ ഒക്കെ തോന്നുന്നു. എനിക്ക് പണ്ട് തൊട്ടേ ഉള്ള ശീലമാണ് നല്ല പാട്ട് കേട്ടാൽ അറിയാതെ ആ കൂടെ പാടിപ്പോകും, ഞാൻ പതിയെ കണ്ണടച്ച് കാറിൽ ചാരിക്കിടന്നു പതിയെ മൂളി… പാട്ട് നിന്നപ്പോളാണ് കണ്ണ് തുറക്കുന്നത്. പാട്ട് തീരാൻ ആയിട്ടില്ല പിന്നെ എങ്ങനെ ഓഫ്‌ ആയി എന്ന് നോക്കുമ്പോളാണ് എന്നെ നോക്കി ചിരിക്കുന്ന മാളു ചേച്ചിയെ കാണുന്നത്.

“എന്താടി പിശാശേ പാട്ട് നിർത്തിയത്… ”

“ഓ എന്തിനാ പാട്ട് വക്കുന്നത്. നീ പാടുന്നുണ്ടല്ലോ ”

“അത് ഞാൻ ചുമ്മാ പാടിയതല്ലേ, നീ വക്ക് നല്ല പാട്ടാണ് കേക്കട്ടെ ”

“ഡാ ചെക്കാ ഒന്നര മണിക്കൂർ യാത്രയുണ്ട് അവിടെ വരെ വല്ലതും സംസാരിച്ചോണ്ടിരിക്കടാ, അല്ലെങ്കിൽ ഞാൻ ബോർ അടിച്ചു മരിക്കും ”

“ബോർ അടിക്കാതെ ഇരിക്കാനല്ലേ പാട്ട് വക്കാൻ പറഞ്ഞത് ”

“അങ്ങനെ പാട്ട് വെക്കുന്നില്ല, നീ വല്ലതും സംസാരിക്ക്‌ ”

ഞങ്ങൾ ഇത്രയും ഒച്ചയെടുത്തിട്ടും പുറകിൽ നിന്നും ഒരാളുടെ ഒച്ച കേൾക്കാനില്ല, ഞാൻ തിരിഞ്ഞ് നോക്കിയപ്പോൾ കാണുന്നത് സീറ്റിൽ ചാരിക്കിടന്ന് ഉറങ്ങുന്ന ആന്റിയെ ആണ്, അങ്ങനെ ഒരാൾ മാത്രമായ് സുഖിക്കണ്ട എന്ന് ഞാൻ ഉറപ്പിച്ചു. തല പതിയെ രണ്ട് സീറ്റിന്റെയും ഇടയിൽ കൂടെ ഇട്ട് നല്ല ഉച്ചത്തിൽ തന്നെ പേടിപ്പിച്ചു

“ഠോ… ”