പ്രാണേശ്വരി (climax) [പ്രൊഫസർ ബ്രോ] 736

അധികം വൈകാതെ തന്നെ താലികെട്ടും മാലയിടലും പുടവകൊടുക്കലും എല്ലാം കഴിഞ്ഞു,

താലി കെട്ടുന്ന സമയത്ത് എന്റെ കൈ വിറക്കുകയായിരുന്നു, എങ്ങനെയോ ഒരു തരത്തിൽ ഉടക്കി വച്ച ചരട് ചേച്ചിയാണ് ശരിയായ രീതിൽ കെട്ടിയത്

“ഇനി രണ്ട് പേരും എഴുന്നേറ്റ് നിന്നോളൂ”

പൂജാരിയുടെ ശബ്ദം

അച്ഛൻ ഇല്ലാത്തതുകൊണ്ട് അച്ഛന്റെ സ്ഥാനത്തു നിന്നു അവളുടെ അമ്മാവനാണ് കന്യാദാനം നടത്തിയത്,അവളുടെ കയ്യും പിടിച്ച് ആ മണ്ഡപത്തിനു വലം വയ്ക്കുമ്പോൾ എന്റെ ഉള്ളിൽ അത്രയും നേരം അനുഭവിച്ച ടെൻഷൻ ഒക്കെ എങ്ങോ പോയി

ചടങ്ങുകൾ എല്ലാം പൂർത്തിയായപ്പോൾ ഞങ്ങളെ നേരെ കൊണ്ടുപോയി സ്റ്റേജിനു നടുക്കായി ഒരുക്കിയിരുന്ന സെറ്റിയിൽ കൊണ്ടുപോയി ഇരുത്തി, പിന്നെ വരുന്നവരുടെയും പോകുന്നവരുടെയും ഒപ്പം നിന്നുള്ള ഫോട്ടോയെടുപ്പ്

ഫോട്ടോഷൂട് തുടങ്ങിക്കഴിഞ്ഞാൽ അവസാനിക്കുന്നത് വരെ ചിരിച്ചുകൊണ്ടേ ഇരിക്കണം, ഈ ഫോട്ടോ എടുക്കാൻ വരുന്നവർ ഒക്കെ നന്നായി കഴിച്ചിട്ടുണ്ടാകും നമ്മൾ ഈ ടെൻഷൻ കാരണം രാവിലെ മുതൽ ഒന്നും കഴിക്കാതെ നിൽക്കുവാ അതൊന്നും ഒരാളും ചിന്തിക്കില്ല

ഇതിനിടയിൽ പാറ്റയും കൂട്ടരും ഫോട്ടോ എടുക്കാൻ വന്നു, ഫോട്ടോ എടുത്ത് കഴിഞ്ഞപ്പോൾ അവന്മാർക്ക് സെൽഫി എടുക്കണം… സെൽഫി എടുക്കാൻ ഉയർത്തി പിടിച്ച ഫോണിന്റെ ഡിസ്‌പ്ലേയിലേക്ക് നോക്കിയ ഞാൻ ഒന്ന് ഞെട്ടി., ഞാൻ ഇന്നലെ ഇവന്മാരെ കാണാൻ പോയപ്പോൾ എടുത്ത ഫോട്ടോ… എന്റെ ചുണ്ടിൽ ഗ്ലാസ്‌ മുട്ടി നിൽക്കുന്നത് വ്യക്തമായി കാണാം

ദാമ്പത്യ ജീവിതത്തിലേക്ക് കടന്ന ഞങ്ങൾക്ക് ഞങ്ങളുടെ കൂട്ടുകാർ തന്ന ആദ്യത്തെ ഗിഫ്റ്റ്,… തെണ്ടികൾ

ലച്ചു എന്റെ അടുത്ത് നിന്നിരുന്നത് കൊണ്ട് എനിക്കുള്ള ഗിഫ്റ്റും അപ്പൊ തന്നെ കിട്ടി, കയ്യിടെ തൊലി പൊളിച്ചെടുത്തു പെണ്ണ്

“മതി പിള്ളേരെ ഫോട്ടോയെടുപ്പ്… ഇനി അവർ പോയി വല്ലതും കഴിക്കട്ടെ ”

ഞങ്ങളുടെ അവസ്ഥ കണ്ട് പാവം തോന്നിയിട്ടോ എന്തോ അമ്മ ഞങ്ങളെ ഫോട്ടോഗ്രാഫർ മാരുടെ അടുത്തു നിന്നും രക്ഷിച്ചു

ഞങ്ങൾ കഴിക്കാൻ തുടങ്ങിയപ്പോഴേക്കും എല്ലാവരും കഴിച്ച് കഴിഞ്ഞിരുന്നു, സമാധാനത്തോടെ കഴിക്കാൻ പോലും സമ്മതിക്കില്ല അപ്പോഴേക്കും വരും ക്യാമറയും പിടിച്ചുകൊണ്ട് തെണ്ടികൾ

“എടാ സദ്യ എങ്ങനെ ഉണ്ട് ”

ഉണ്ണിയേട്ടന്റെ ഏർപ്പാടാക്കിയ ആളുകൾ ആണ് സദ്യ., അതിന്റെ അഭിപ്രായം അറിയാനാണ് ഈ ചോദ്യം

“സദ്യയൊക്കെ കൊള്ളാം… ഞാൻ ഇതൊന്നു കഴിച്ചോട്ടെ പ്ലീസ് ”

എന്നെ നോക്കിഒന്ന് ചിരിച്ചിട്ട് ഉണ്ണിയേട്ടൻ കലവറയിലേക്ക് നടന്നു, പിന്നെ വരുന്നത് ഞങ്ങൾ കഴിച്ച് കഴിഞ്ഞാണ് കൂടെ വേറെ ഒരാൾ കൂടെയുണ്ട്