ഒടിയൻ 2 [അപ്പു] 259

ഗുരുക്കൾ വെല്ലുവിളിച്ചപ്പോഴും ശിഷ്യരെല്ലാം ഭയന്ന് വിറച്ച് തന്നെയായിരുന്നു. കാരണം കണ്മുന്നിൽ കണ്ടതെല്ലാം ഒരു നിമിഷം കൊണ്ട് സംഭവിച്ചതാണ് ചിന്തിക്കാൻ പോലും സമയം കിട്ടിയില്ല പിന്നെയല്ലേ പ്രവർത്തിക്കാൻ.

” നിഷ്പ്രയാസം നിന്നെ കൊന്നു എന്ന് കണ്ടപ്പോഴേ എനിക്ക് സംശയം തോന്നിയിരുന്നു ഇതാണോ മാലോകർ പാടിയ വെള്ളൊടിയൻ എന്ന്. അത് സത്യമായി. എനിക്ക് പിഴച്ചു… വാടാ… നേർക്കുനേർ വാ.. ”

നാലുപാടും കറങ്ങി എല്ലായിടവും ശ്രദ്ധിച്ച് അയാൾ വെല്ലുവിളിച്ചു. അയാളുടെ തന്നെ ശബ്ദം പ്രതിധ്വനിച്ചതല്ലാതെ മറ്റൊന്നും സംഭവിച്ചില്ല.

ചുറ്റും നിശബ്ദമായത് കണ്ട അവരെ നോക്കി ഗുരുക്കൾ വീണ്ടും ആംഗ്യം കാട്ടി. അവർ വീണ്ടും നടന്നു തുടങ്ങി.

ധൈര്യത്തിലും പോരാട്ട വീര്യത്തിലും പേരെടുത്ത ബാലൻ ഗുരുക്കളുടെ ശിഷ്യരുടെ കയ്യിൽ പിടിച്ച വാളുകൾ വിറക്കുന്നത് കണ്ട് തൊട്ടടുത്ത മരത്തിലിരുന്ന പക്ഷിയുടെ കണ്ണുകൾ തിളങ്ങി.

ഒന്ന്… രണ്ട്… മൂന്ന്… നാല്… അഞ്ചാം ചുവട് വെച്ചപ്പോൾ അവരുടെ വലത്ത് വശത്തും ഇടത് വശത്തും ഒരുപോലെ കാൽപെരുമാറ്റം കേട്ടു. അവർ ശ്രദ്ധിച്ചു.

ഇടതും വലതും അവരെ നോക്കിക്കൊണ്ട് അവരോടൊപ്പം ചുവട് വെക്കുന്ന രണ്ട് കറുത്ത കൂറ്റൻ ചെന്നായ്ക്കൾ. അവയുടെ ചോര കണ്ണുകളുടെ തിളക്കവും വായിൽ നിന്ന് വെള്ളമൊഴുക്കിയുള്ള നോട്ടവും അവരെ ഭയപ്പെടുത്തി.

പക്ഷെ ഗുരുക്കൾ മുന്നിൽ കണ്ടത് മറ്റൊന്നാണ്. കറുത്ത കരിമ്പടം പുതച്ച് നഗ്നനായി മുഖത്ത് നാഗ ചിത്രം ചായം തേച്ച് സർപ്പത്തിന്റെ കണ്ണുകളുമായി ഒരു ആജാനബാഹുവായ മനുഷ്യൻ.

മുന്നിലും വശങ്ങളിലും രക്ഷയില്ലെന്ന് കണ്ട ഭയന്ന് വിറച്ച ശിഷ്യരിൽ ഒരാൾ കൂട്ടത്തിൽ നിന്ന് പിന്നിലേക്ക് വളരെ വേഗം ഓടി.

അവിടെയും അയാൾക്ക് അഞ്ചടി തികച്ചു വെക്കാൻ സാധിച്ചില്ല. ഒരു ചെറിയ കുഴിയിൽ ചവിട്ടി അടിതെറ്റിയ അയാൾ നിലത്തേക്ക് വീണതും ഇരുട്ടിൽ നിന്ന് ഒരു മടൽ കൊണ്ട് അയാളുടെ മുഖത്ത് അടി വീണു.

അടികൊണ്ട് തിരിഞ്ഞ അയാളുടെ മുഖത്തെ ചോര കുറച്ച് അപ്പുറത്ത്‌ നിന്ന കൂട്ടാളികളുടെ മുഖത്ത് വരെ വീണു. അനക്കമൊന്നും ഉണ്ടായില്ല അയാൾ അന്ത്യശ്വാസം വലിച്ചു.

“ഒടിയാ… മതിയാക്ക്…നീയും നിന്റെ കൺകെട്ടും.. നീ അത്ര ശക്തനെങ്കിൽ നേർക്ക് നേർ വാ.. എന്റെ ജീവനെടുത്തതിന് ശേഷമേ നീ എന്റെ ശിഷ്യരെ തൊടൂ. ”

വെല്ലുവിളിച്ചത് ഒടിയനെ ആണെങ്കിലും കൊണ്ടത് തങ്ങൾക്കാണെന്ന പോലെ ഇരുവശങ്ങളിലെയും ചെന്നായ്ക്കൾ ശിഷ്യരുടെ നേരെ ഉച്ചത്തിൽ ഗർജിച്ചുകൊണ്ട് ചാടി.. വാളുകൾ ഉയർത്താൻ പോലും സമയം കൊടുക്കാതെ ബാക്കിയുള്ള 4 പേരെ കൂടി ചെന്നായ്ക്കൾ കൊന്നു. ഗുരുക്കൾക്ക് ഒന്നും ചെയ്യാനായില്ല.

” അവരെ തൊടാൻ എനിക്ക് നിന്റെ അനുവാദം വേണ്ടെന്ന് ഇപ്പൊ മനസിലായില്ലേ…..ഹ്സസ്സ്‌ സ്‌സ്‌ ”

സംസാരിച്ചതിന്റെ അവസാനം അയാളുടെ വായിൽ നിന്ന് സർപ്പത്തിന്റെ നാക്ക് പുറത്ത് വന്നത് കണ്ട ഗുരുക്കൾ ഒന്ന് പതറി.

ഒന്നുകിൽ അവനെ കൊല്ലണം അല്ലെങ്കിൽ മരണം. മരിച്ചാലും ധീരനായി വേണം. ഗുരുക്കൾ മുന്നിൽ നിന്നയാൾക്ക് നേരെ വാളുമായി കുതിച്ചു.

അയാൾക്കൊപ്പം എത്താൻ എട്ട് ചുവട് ബാക്കിയുള്ളപ്പോൾ ബാലൻ ഗുരുക്കൾ വലംകാൽ മണ്ണിലൂന്നി ഉയർന്ന് കുതിച്ച് ചാടി.

വലത്തേക്ക് ഒഴിഞ്ഞാലും ഇടത്തേക്ക് ഒഴിഞ്ഞാലും ഞൊടിയിടയിൽ വായുവിൽ തന്നെ തിരിഞ്ഞ് എതിരാളിയെ വെട്ടി വീഴ്ത്താൻ പോന്ന ഗുരുക്കളുടെ മാത്രം അടവാണത്.