ഒടിയൻ 2 [അപ്പു] 259

വീണ്ടും ഒരു വിവാഹാഭ്യർത്ഥനയുമായി കേശവൻ നായർ എത്തുമെന്ന് നല്ല ബോധ്യമുണ്ടായിരുന്ന ലക്ഷ്മി അയാളിലൂടെ ഒടിയനെ വക വരുത്തണമെന്ന് തീരുമാനിച്ചിരുന്നു.

ഒടിയനെ തനിക്ക് ഒന്നും ചെയ്യാനാവില്ല. കേശവൻ നായരെ ഒടിയനെതിരാക്കിയാൽ ഒന്നുകിൽ ഒടിയൻ അല്ലെങ്കിൽ കേശവൻ നായർ മരണപ്പെടും. ഇനി കേശവൻ നായർ ഒടിയനെ ഇല്ലായ്മ ചെയ്യാൻ ഒരു വഴി കണ്ടെത്തിയാൽ കേശവൻ നായരെന്ന വിഷയലമ്പടനെ എങ്ങനെ ഇല്ലാതാക്കണമെന്ന് ലക്ഷ്മിക്ക് അറിയാമായിരുന്നു.

അവൾ പ്രതീക്ഷിച്ച പോലെ മൂന്ന് ദിവസങ്ങൾക്ക് ശേഷം കുഞ്ചു തറവാട്ടിലെത്തി. ഒരു മരണം നടന്ന വീടാണെന്ന ചിന്ത തൊട്ടുതീണ്ടാതെ അയാൾ കേശവൻ നായരുടെ താല്പര്യം അറിയിച്ചു.

” സമ്മതം… എനിക്ക് സമ്മതമെന്ന് അറിയിച്ചോളൂ… ” ലക്ഷ്മി കുഞ്ചുവിനോട് പറഞ്ഞു.

“മോളെ….?” നിസ്സഹായനായി അത് കേട്ട ഗോവിന്ദൻ നായർ മകളെ വിളിച്ചു…

“അച്ഛൻ ഒന്നും പറയണ്ട.. നമുക്കിനി വേറെ മാർഗങ്ങളില്ല.. പക്ഷെ ഒരു കാര്യം ” കുഞ്ചുവിനോട് അത് പറഞ്ഞപ്പോൾ അയാൾ ശ്രദ്ധിച്ചു..

” കേശവൻ നായരോട് ഇവിടെ വരാൻ പറയണം.. അയാളോട് എനിക്ക് സംസാരിക്കണം. എന്റെ ആവശ്യങ്ങൾ അംഗീകരിക്കാമെങ്കിൽ അയാളുടെ ഭാര്യയായോ വെപ്പട്ടിയായോ ഞാൻ വരും.. ”

കുഞ്ചു അത് കേട്ട് ഞെട്ടി. തമ്പ്രാനോട് ഇതെങ്ങനെ പറയും. കല്യാണം കഴിക്കണമെങ്കിൽ ഒരു സ്ത്രീക്ക് നിബന്ധനകളോ…?

പക്ഷെ കേശവൻ നായർക്ക് ആ ചിന്ത വന്നില്ല അയാൾ അത് കേട്ട പാതി കേൾക്കാത്ത പാതി ഗോവിന്ദൻ നായരുടെ വീട്ടിലേക്ക് എത്തി.

” ഒടിയൻ ഭാർഗവൻ ഇനി ഈ ഭൂമിയിൽ ഉണ്ടാവാൻ പാടില്ല.. നിങ്ങളെ എനിക്ക് ഒന്നും ചെയ്യാൻ പറ്റില്ല. ചെയ്യിച്ചവനോട്‌ അല്ലെങ്കിൽ ചെയ്തവനോട്‌. ആരോടെങ്കിലും എനിക്ക് പ്രതികാരം ചെയ്യണം.. ”

ആവശ്യം കേട്ട് അയാൾ ഞെട്ടിയില്ല കാരണം, പറയുന്നതെല്ലാം അക്ഷരം പ്രതി അനുസരിക്കുന്ന ഒരു അടിമയെപ്പോലെ കണ്ടതാണെങ്കിലും, അടുത്ത കാലം മുതൽ ഭാർഗവനെ തന്നെക്കാൾ വലിയവനായി ആളുകൾ കാണുന്നു എന്ന ചിന്ത തുടങ്ങിയിരുന്ന കേശവൻ നായർ ഒടിയനെ വകവരുത്തിയാലെന്ത് എന്ന് മുന്നേ ചിന്തിച്ച് തുടങ്ങിയിരുന്നു.

ഭാർഗവൻ ഇല്ലെങ്കിൽ മറ്റൊരാൾ അത്രയേ അയാൾ ചിന്തിച്ചുള്ളൂ. പക്ഷെ ലക്ഷ്മിയെപ്പോലൊരു പെണ്ണിനെ അയാൾക്ക് ഈ ലോകത്തിൽ വേറെ കിട്ടില്ലെന്ന് തോന്നി. അയാളുടെകൂടി ആവശ്യം അവൾക്ക് സഹായമായി ചെയ്തു കൊടുത്താൽ കിട്ടുന്ന പ്രതിഫലം അയാളെക്കൊണ്ട് മറ്റൊന്നും ചിന്തിപ്പിച്ചില്ല.

“സമ്മതം…..ഒട്ടും താമസമില്ലാതെ ഒടിയൻ കൊല്ലപ്പെടും പക്ഷെ അന്ന് രാത്രി നീ എന്റെ കിടപ്പറയിൽ ഉണ്ടാവണം..!!”

” സമ്മതം… ” നിസ്സഹായത അഭിനയിച്ച് തലകുനിച്ച് അവൾ അയാളോട് പറഞ്ഞു..

കാമം കൊണ്ട് അന്ധനായ അയാൾ അവളുടെ കണ്ണിൽ ഒളിച്ചിരുന്ന പക കണ്ടില്ല.

അമാവാസിക്ക് തലേന്നാണ് കേശവൻ നായർ ബാലൻ ഗുരുക്കളെ വരുത്തിയത്. ഒടിയനെ ഇല്ലാതാക്കാൻ കേശവൻ നായരും ബാലൻ ഗുരുക്കളും ലക്ഷ്മിയും ചേർന്ന് പലതും ആലോചിച്ചു. ഇതിനെല്ലാം മൂകസാക്ഷിയായി സകലതും കണ്ടും കേട്ടും കേശവൻ നായരുടെ വീട്ടിലെ കറുത്ത പൂച്ചയും ഒരറ്റത്ത് ഉണ്ടായിരുന്നു.