പ്രിയപ്പെട്ടവരെ ഈ കഥ എന്റെ ഭാവനയാണെങ്കിലും ഇതിൽ ഒടിയനെ പറ്റി പറഞ്ഞിട്ടുള്ള കാര്യങ്ങളെല്ലാം സത്യമാണ്. ഒടിവിദ്യ അഭ്യസിക്കുന്നവർക്ക് അമാനുഷികമായ ഒത്തിരി കഴിവുകൾ ഉണ്ടായിരുന്നു. അതൊന്നും കഥക്ക് വേണ്ടി ഉണ്ടാക്കിയതല്ല സാഹചര്യം അനുസരിച്ച് ഉപയോഗിച്ചു എന്ന് മാത്രം.

ഒടിയൻ 2

Odiyan Part 2 | Author : Appu

[ Previous Part ]

മനയിൽ നിന്നിറങ്ങി നടന്ന ഭാർഗവൻ നേരെ ചെന്നത് അയാളുടെ കുടിലിലേക്കാണ്. ഒടിയൻതുരുത്തിൽ നിന്ന് മാറി നാട്ടിൽ തന്നെ കേശവൻ നായർ അയാൾക്കൊരു കുടിലും കുറച്ച് സ്ഥലവും കൊടുത്തിരുന്നു. തുരുത്തിൽ കുടിയിരുത്തിയ മാടന്റെ പൂജകൾക്കല്ലാതെ ഭാർഗവൻ ഇപ്പൊ തുരുത്തിലേക്ക് പോവാറില്ല.

കുടിലിൽ ചൊങ്കൻ ഉണ്ടായിരുന്നു. അവനാണിപ്പോൾ ഭാർഗവന്റെ സഹായി. ഒടിവെക്കാൻ വേഷം മാറിയിറങ്ങുന്ന ഒടിയന്മാർ പുലരും മുന്നേ തിരിച്ചെത്തും. കുടിയിലെ പെണ്ണ് അതുവരെ ഉറങ്ങാതെ കാത്തിരിക്കണം.

ഒടി പൂർത്തിയാക്കിയിട്ടും കലിയടങ്ങാതെ പുരക്ക് ചുറ്റും ഓടുന്ന ഒടിയന്റെ മേലേക്ക് ചാണക വെള്ളം കലക്കി ഒഴിക്കുമ്പോഴാണ് ഒടിവേഷം മാറി മനുഷ്യരൂപം കൈവരുന്നത്. ഇതിന് താമസമുണ്ടായാൽ വീട്ടിലെ പെണ്ണിനേയും ഒടിയൻ കൊല്ലും.

അങ്ങനെ ഒരുവട്ടം ഒടിവെക്കാൻ പോയ ഭാർഗവനെ കാത്തിരുന്ന് ഭാര്യയായിരുന്ന കനകം ഉറങ്ങിപ്പോയി.. നിർഭാഗ്യവശാൽ അന്ന് വേഷം ഒരു പാമ്പായിരുന്നു. പുലരുന്നതിന് മുന്നേ വീട്ടിൽ എത്തിയ ഒടിയനായ പാമ്പിന്റെ വിഷമേറ്റ് കനകം മരിച്ചു.

ഇനിയും ഒരു സ്ത്രീസമ്പർഗം വേണ്ടെന്ന് വെച്ച ഭാർഗവൻ അന്ന് കൂടെ കൂട്ടിയതാണ് ചൊങ്കനെ. സ്‌ത്രീ സ്വഭാവം ഉള്ള അവനും ആ കർമത്തിന് യോജിച്ചവൻ തന്നെയായിരുന്നു.

ഭാർഗവൻ വീട്ടിലെത്തി ജലപാനം പോലും ഉപേക്ഷിച്ച് സന്ധ്യ വരെ തന്റെ ഉപാസനാ മൂർത്തികളായ മാടനും മറ്റ് ദുർദേവതകൾക്കും പൂജ നടത്തി.

അന്ന് മേടമാസത്തിലെ പൗർണ്ണമി. ചന്ദ്രനും പ്രകാശിക്കുന്ന അന്ന് ഇരുട്ടിന് ബലമുണ്ടാവില്ലെന്ന് ഭാർഗവന് അറിയാം. മാടന് ഒരു കരിംകോഴിയെയും കുരുതികൊടുത്ത് ഭ്രൂണം കൊണ്ട് ഉണ്ടാക്കിയ മരുന്ന് കയ്യിലെടുത്ത് അതും ഭാർഗവൻ പൂജിച്ചു.

ശേഷം ദേഹത്ത് പുരട്ടുന്ന പച്ചമരുന്നുകൾ കൊണ്ട് തയ്യാറാക്കിയ എണ്ണകൾ പുരട്ടി അയാൾ തയ്യാറായി.പരിപൂർണ്ണ നഗ്നനായി നാലുകാലിൽ നിന്ന് മന്ത്രം ചൊല്ലി ഭ്രൂണത്തിൽ നിന്നുണ്ടാക്കിയ മരുന്ന് ചെവിക്ക് പിന്നിൽ പുരട്ടിയതും കൊടുങ്കാറ്റിന്റെ വേഗത്തിൽ അയാൾ കുടിലിൽ നിന്ന് പുറത്തേക്ക് പാഞ്ഞു.

അതേ സമയം ഉമ്മറത്തെ പടിയിൽ ഇരുന്ന് നിലാവെളിച്ചം ആസ്വദിച്ചു ഭാര്യയുടെ നിറവയറും തടവി അതിൽ ചെവി ചേർത്ത്, പിറക്കാനിരിക്കുന്ന കുഞ്ഞിനോട് സംസാരിക്കുകയായിരുന്നു മഹാദേവനും പാർവതിയും.

“പാവം മുത്തശ്ശി… എന്റെ കുഞ്ഞിനെ കാണാൻ ഒത്തിരി ആഗ്രഹം ഉണ്ടായിരുന്നു ഏട്ടാ…”

“ഹ്മ്മ്.. ഇനി രണ്ട് മാസം കൂടി.. അല്ലെ പാറു.. എന്റെ കുട്ടൻ ഇങ്ങ് വരാൻ.. ”

“കുട്ടൻ കുട്ടൻ എന്ന് പറഞ്ഞ് അധികം തുള്ളിച്ചാടണ്ട ചവിട്ടും കുത്തും ഒന്നുമില്ലാത്തത് കൊണ്ട് പെണ്ണാണോ എന്നൊരു സംശയമുണ്ട് !!”