നീര

Neera Author : Dhanya Shamjith

ഭാരത് മാതാ കീ….. ജയ്… ഭാരത് മാതാ കീ… ജയ്…. ഉച്ചത്തിൽ മുദ്രാവാക്യം മുഴക്കി നിൽക്കുന്ന വലിയൊരു ജനാവലിയുടെ മുന്നിലൂടെ വലിച്ചിഴയ്ക്കുകയാണ് ആ പെൺകുട്ടിയെ….. ബെൽറ്റുകളുടെ തളരാത്ത ഉയർച്ചതാഴ്ചകൾക്കിടയിലും അമർത്തിയൊരു ശബ്ദം മാത്രം അവളിൽ നിന്ന് പുറത്തേക്ക് വന്നു…. “ഭാരത് മാതാ കീ … ജയ് “..

അവൾ, “നീര”.. പതിനെട്ടു കടന്ന മറ്റ് യുവതികളിൽ നിന്ന് വ്യത്യസ്തയായ പെൺകുട്ടി.. അണിഞ്ഞൊരുങ്ങി കണ്ണുകളിൽ ലാസ്യഭാവവുമായി നിൽക്കേണ്ടതിനു പകരം മുഷ്ടി ചുരുട്ടി ദേശീയപതാകയെ നെഞ്ചിലേറ്റി ബ്രിട്ടീഷ് ആധിപത്യത്തിനെതിരെ തന്റെ സഹോദരനോടൊപ്പം ആഞ്ഞടിക്കുന്നവൾ.. “നീര”….

തൊലി വെളുപ്പിന്റെ സമൂഹം ഭാരതത്തെ കെട്ടി വരിഞ്ഞ സമയം.. നിറത്തിന്റേയും സംസ്കാരത്തിന്റേയും പേരിൽ എണ്ണമെത്താത്ത ജനതയെ അടിച്ചമർത്തി തന്റെ കാൽക്കീഴിൽ ചവിട്ടിമെതിച്ച ബ്രിട്ടീഷ് മേലാളൻമാരുടെ ഭരണത്തിൽ അമർത്തിയ വികാരവുമായി കഴിഞ്ഞുവെന്നല്ലാതെ പ്രതികരിക്കാൻ ഭയമായിരുന്നു ജനങ്ങൾക്ക്..കാരണം മറ്റൊന്നുമല്ല എതിർക്കുന്നവരെ പരസ്യമായി തോക്കിൻ തുമ്പാൽ ജീവനെടുക്കുന്ന ക്രൂരതയുടെ പര്യായമായവരെ അത്രമേൽ ഭയമായിരുന്നു..

തങ്ങളേക്കാൾ വ്യക്തിമുദ്ര പതിപ്പിച്ച ജനനേതാക്കളും, വിപ്ലവകാരികളുമെല്ലാം എതിർത്തിട്ടും അവരിൽ പലരേയും ചതിയിലൂടെയും കൽതുറുങ്കിലൂടെയും മരണമെന്ന സമ്മാനമേകി സ്വാതന്ത്ര്യം എന്ന അവകാശത്തെ അടിച്ചമർത്തി കൊണ്ടായിരുന്നു അവർ മറുപടി പറഞ്ഞത്… ആ സമയത്താണ് നീരയും സഹോദരൻ ജഗ്ജീവനും ഒരായുസ് മുഴുവൻ തന്റെ നാടിനായി സ്വയമർപ്പിച്ച് പ്രതിഷേധവുമായി ഇറങ്ങുന്നത്….