MOONLIGHT III (മാലാഖയുടെ കാമുകൻ) 1132

“ഗ്രആആ..”

വല്ലാത്തൊരു അലർച്ചയോടെ അയാൾ വെട്ടി തിരിഞ്ഞു അവരെ നോക്കിയപ്പോൾ ഓടണോ അതോ നിൽക്കണോ എന്നുള്ള ആശയകുഴപ്പത്തിൽ അവർ ഒരു നിമിഷം നിന്നുപോയി..

വീണ്ടും ഒരു അലർച്ചയോടെ ചുവന്ന മനുഷ്യർ അവർക്ക് നേരെ കുതിച്ചു വന്നു..

“ആാാാ…”

പെണ്ണുങ്ങൾ മൂന്ന് പേരും ആ ചുവന്ന മനുഷ്യന്റെ വേഗതയും ഭാവവും കണ്ടു അലറി കരഞ്ഞപ്പോൾ ജെയിംസും ഒലിവറും ജാക്കും കാലുകൾ നിലത്ത് ഉറച്ചത് പോലെ ഒരു അനക്കം പോലും ഇല്ലാത്ത അവസ്ഥയിൽ ആയിരുന്നു..

“ഐല്യ ഐല്യ കേൽ വാ കൊ ടുമോ..!”

ഒന്ന് പേടിച്ചു കരഞ്ഞു എങ്കിലും അവർക്ക് പരിചയം ഇല്ലാത്ത ആ എൽഫ് പെണ്ണ് ഏതോ ഭാഷയിൽ കൈ നീട്ടി അലറി.. അവളുടെ കയ്യിൽ നേരിയ ഒരു വെളിച്ചം അവർ കണ്ടു..

എന്നാൽ അതിന് ഒരു ഫലവും ഉണ്ടായില്ല.. ഓടി വന്ന ചുവന്ന മനുഷ്യൻ അവളെ അടിച്ചു തെറിപ്പിച്ചു. ഒരു കരച്ചിലോടെ അവൾ തെറിച്ചു പോയി നിലത്തേക്ക് വീണു..

അവൾ തെറിച്ചു പോയതും ചുവന്ന മനുഷ്യൻ ജൂഹിയുടെ കഴുത്തിന് നേരെ കൈ നീട്ടി.. കഴുത്തിൽ പിടി വീണു എന്ന് തോന്നിയ ആ നിമിഷ നേരം കൊണ്ടാണ് ജാക്കും ഒലിവറും ധൈര്യത്തോടെ നിന്ന് ആ ജീവിയെ ആഞ്ഞു ചവുട്ടിയത്…

ചവിട്ട് കൊണ്ടു അതൊന്ന് അലറിക്കൊണ്ട് പുറകിലേക്ക് പോയപ്പോൾ ഒലിവർ പുറകിൽ വച്ച വാൾ വലിച്ച് ഊരി വീശി..

അത് ദേഹത്ത് കൊണ്ടില്ല.. അതിനിടക്ക് ചുവന്ന മനുഷ്യൻ കൈ നീട്ടി ജാക്കിന്റെ തലക്ക് ഒരു അടി അടിച്ചപ്പോൾ ജാക്ക് ഒരു അനക്കവും ഇല്ലാതെ അവിടെ വീണു..

പെട്ടെന്ന് ജെയിംസ് പെണ്ണുങ്ങളെ ഒരു മരത്തിനു മറവിലേക്ക് ആക്കി.. മറ്റേ എൽഫ് പെണ്ണ് ഓടി ചെന്ന് നിലത്ത് വീണു കിടന്നവളെ നോക്കി..