മാലാഖ [Hyder Marakkar] 893

ഈ   ദുബായ്  ഇല്ലായിരുന്നെങ്കിൽ   പെട്ട്   പോയേനെ….. മീനൂന്റെ   തന്തപ്പടിയുടെ   തള്ള്  മുഴുവൻ  കേട്ടു  കേട്ട്   ദുബായ്   എന്ന്   പറഞ്ഞാൽ   എന്തോ   മിഠായിയും   ഐസ്ക്രീംമും   എല്ലാം   കുന്ന്  കൂട്ടി   ഇട്ട    എന്തോ   സ്ഥലം   ആണെന്നാണ്   ചെറുക്കന്റെ   വിചാരം….. എന്തായാലും  എന്റെ   അമ്മായിയപ്പന്റെ   തള്ളുകളെ   ഞാൻ  നന്ദിയോടെ   സ്മരിക്കുന്നു….

“””ശരി   ഞാൻ   ഒന്ന്   പോയി   നോക്കട്ടെ”””

മേരിയിൽ   നിന്ന്   അകന്നുമാറി   ഞാൻ  മുറ്റത്തേക്ക്   നടന്നു… എന്റെ  പുത്രന്റെയും   അപ്പന്റെയും   അഭ്യാസങ്ങൾ   കാണാൻ…

***

“””പ….പ്പാ…… വാ…… കൾച്ചാ…..”””

എന്നെ   കണ്ടതും   ഗുഗു   അവരുടെ   അന്താരാഷ്ട്ര   മത്സരത്തിലേക്ക്   എന്നെയും   ക്ഷണിച്ചു…..കുളിച്ച്   ഇറങ്ങിയത്   കൊണ്ടും   ഇനിയും  കുളിക്കാൻ   മടിയായത്  കൊണ്ടും  ഞാൻ   ആ    ക്ഷണം   സ്നേഹത്തോടെ  നിരസിച്ചു….

സമയം   ആറുമണിയായി,  ഇരുട്ട്   വീണു  തുടങ്ങുന്നു….. പകൽ  മുഴുവൻ  പണിയെടുത്ത    സൂര്യൻ   ഇറങ്ങി   പകരം   നൈറ്റ്   ഷിഫ്റ്റിന്   വരുന്ന  ചന്ദ്രേട്ടന്   വരാൻ   സമയം    ആവാറായി….. പക്ഷെ   എന്റെ   മീനൂന്റെ   ഷിഫ്റ്റ്‌   കഴിയാൻ   ഇനിയും   സമയം   എടുക്കും….. രാത്രി   എട്ടുമണി  വരെയാണ്   അവൾക്ക്   ഡ്യൂട്ടി,  അത്  കഴിഞ്ഞ്   റൂമിൽ  എത്തി   ഫ്രഷ്   ആയിട്ടേ   പെണ്ണ്   വിളിക്കൂ….അത്   വരെ   കാത്തിരിക്കണം….. പുറമെ   കാട്ടുന്നില്ലെങ്കിലും   ഗുഗുവിനെ  പോലെ   തന്നെ   ഞാനും   മീനൂനെ   വല്ലാതെ   മിസ്സ്‌   ചെയ്യുന്നുണ്ട്…..

ഒരു   മാസം   ആവാറായി   അവൾ   പോയിട്ട്….. കോവിഡ്  ഡ്യൂട്ടിയിലാണ്.. അതുകൊണ്ട്   തന്നെ  വീട്ടിലേക്ക്   വരാറില്ല… ഹോസ്പിറ്റലിന്   സമീപം  തന്നെ  അവർക്ക്   താമസിക്കാൻ   റൂം  ശരിയാക്കി  കൊടുത്തിട്ടുണ്ട്…. അവിടെയാണ്   താമസം….  ഇവിടെ  ഗുഗുവുമുണ്ട്, അതുപോലെ  അപ്പനും  മേരിയും  ഒക്കെ   പ്രായം   ആയതല്ലേ…

ഉയരം   പേടിയാണ്…… നായിക്കുട്ടികളെ  പേടിയാണ്…… അങ്ങനെ  തൊടുന്നതും   പിടിക്കുന്നതും   എല്ലാം   പേടിയുള്ള  എന്റെ   പെണ്ണ്    രണ്ടാമത്  ഒന്ന്   ചിന്തിക്കാതെ   ഈ  സമയത്   സ്വന്തം  ജീവൻ  പോലും  പണയം  വെച്ച്   പോവാൻ   തീരുമാനിച്ചപ്പോൾ   എനിക്ക്   അവളോടുള്ള   സ്നേഹം   പത്തിരട്ടി  വർധിക്കുകയാണ്   ചെയ്തത്….. എന്നെ   പിരിഞ്ഞിരുന്ന്   ശീലം  ഉണ്ടെങ്കിലും   ഗുഗുവിനെ   ആദ്യമായിട്ടാണ്   അവൾ   ഇങ്ങനെ   പിരിഞ്ഞിരിക്കുന്നത്…… എല്ലാം  സഹിച്ച്   അവൾ   പോയത്   ഞങ്ങൾക്ക്   വേണ്ടിയല്ല,  ഈ   നാടിനും   നാട്ടുകാർക്കും   വേണ്ടിയാണ്…… എന്നിട്ടാണ്  കള്ള   ഡാഷ്  മക്കൾ   ഓരോ   കഥ   അടിച്ചിറക്കുന്നത്….. ഹാ  ആരോട്   പറയാൻ……….