അനാമികയുടെ കഥ 6 [പ്രൊഫസർ ബ്രോ] 213

“ശരി മോനെ വരാം…ലക്ഷ്മിയോട് ഞാൻ തിരക്കി എന്ന് പറയണം”

“തീർച്ചയായും പറയാം…അപ്പൊ എടി കാ‍ന്താരി ഞാൻ പോട്ടെ… അടുത്ത ഞായറാഴ്ച വരണം ഞങ്ങൾ കാത്തിരിക്കും വരുമ്പോ അമ്മയെയും കൂട്ടിക്കൊണ്ട് വരണം ”

ഗൗതം പോകുകയാണ് എന്നറിഞ്ഞപ്പോൾ അത്രയും സമയം അനാമികയുടെ മുഖത്തുണ്ടായിരുന്നു സന്തോഷം എങ്ങോ പോയി,

“ഏട്ടാ… കുറച്ചു കഴിഞ്ഞു പോകാം… വീട്ടിൽ പോയാലും വെറുതെ ഇരിക്കണ്ടേ ഞാൻ,  അപ്പൊ പിന്നെ വൈകിട്ട് പോയാൽ പോരെ…”

ആദ്യമായി സ്കൂളിൽ പോകാൻ തുടങ്ങുന്ന കുട്ടിയെ കണക്കെ അവൾ അവന്റെ മുൻപിൽ കൊഞ്ചി

“അതിന് ഇത് പാർക്കല്ല നിന്റെ ഇഷ്ടത്തിന് നിൽക്കാനും പോകാനും… നീ പോയിട്ട് വേണം ഈ മുറി വേറെ ആളുകൾക്ക് കൊടുക്കാൻ ”

അനാമികയുടെ മുഖം ഒന്നുകൂടി വാടിയപ്പോൾ ഗൗതം അവളെ തന്റെ മാറോട് ചേർത്ത് നിർത്തി

“മോളെ നീ ഇപ്പൊ പോ എന്നിട്ട് ഞായറാഴ്ച വാ… ഏട്ടനും പോയിട്ട് കുറച്ചു പണി ഉണ്ട്”

“ഏട്ടൻ പൊയ്ക്കോട്ടേ അനൂ… നമുക്ക് അടുത്ത ദിവസം അങ്ങോട്ട് പോകാല്ലോ”

സീതയുടെ സംസാരത്തിൽ നിന്നും താനും രാഘവനും തമ്മിൽ ഇനി ഒരു കൂടിക്കാഴ്ച ഒഴിവാക്കാൻ ശ്രമിക്കുന്നത് ഗൗതമിന് മനസ്സിലായി, ഗൗതമിന്റെ മനസ്സിലും അപ്പോൾ അത് തന്നെ ആയിരുന്നു

ഒരിക്കൽക്കൂടി അവരോട് രണ്ടു പേരോടും യാത്ര പറഞ്ഞു ഗൗതം പുറത്തേക്ക് ഇറങ്ങി, ഗൗതം പുറത്തേക്ക് വരുന്നത് അറിഞ്ഞതും രാഘവൻ കുറച്ചു മാറി നിന്നു,തലേ ദിവസത്തെ പ്രശ്നത്തിന് ശേഷം ഗൗതമിന്റെ മുന്നിൽ ചെല്ലാൻ രാഘവന് ധൈര്യം ഉണ്ടായിരുന്നില്ല

പുറത്തേക്കിറങ്ങിയ ഗൗതം രാഘവനെ കണ്ടതും ദേഷ്യത്തോടെ മുഖം വെട്ടിച്ചു പുറത്തേക്ക് നടന്നു.

“മോനെ… അനു വീട്ടിൽ നിന്നും ഇറങ്ങിയില്ലേ… നീ അവരെ ഒന്ന് വിളിച്ചു നോക്ക് ”

“എന്റെ അമ്മേ അവർ ഇങ്ങു വന്നോളും, കുഞ്ഞ് കുട്ടികൾ ഒന്നുമല്ലല്ലോ… രാവിലെ മുതൽ എത്ര വട്ടമാ വിളിക്കുന്നത്… ”

വീണ്ടും എന്തോ പറയാൻ തുടങ്ങിയ ലക്ഷ്മി പുറത്ത് ഒരു വണ്ടി വന്നു നിൽക്കുന്ന ശബ്ദം കെട്ട് പുറത്തേക്ക് നടന്നു, വണ്ടി സ്റ്റാൻഡിൽ വച്ച് ഹെൽമെറ്റ്‌ തലയിൽ നിന്നും എടുക്കുന്ന അനാമികയെ കണ്ടതും അവർ അവളുടെ അടുക്കലേക്ക് നടന്നു

“മോളെ… എത്ര നേരമായി ഞങ്ങൾ കാത്തു നിൽക്കുന്നു… താമസിക്കും എങ്കിൽ ഒന്ന് വിളിച്ചു പറഞ്ഞൂടെ… ”

“ഞാൻ എപ്പോഴേ റെഡി ആയി നിൽക്കുന്നതാ എന്നറിയോ… ഈ അമ്മയാണ് താമസിച്ചത് ”

“അത് പിന്നെ ലക്ഷ്മീ വീട്ടിലെ പണി മുഴുവൻ തീർത്തിട്ട് വേണ്ടേ ഇറങ്ങാൻ… ഈ പെണ്ണ് അടുക്കളയിൽ കയറുകയേ ഇല്ല… ഇപ്പൊ പിന്നെ എന്തെങ്കിലും പണി ചെയ്യാൻ പറഞ്ഞാൽ അപ്പൊ പറയും എന്നോട് ഏട്ടൻ ഒരു പണിയും എടുക്കണ്ട എന്നാ പറഞ്ഞിരിക്കുന്നത് എന്ന്…”