അനാമിക 4 [Jeevan] 284

” ആരാ കക്ഷി… ” അവൾ ഒരു പുരികം ഉയർത്തി എന്നോട് ചോദിച്ചു.

” അത് അവൾ ആദ്യം അറിയട്ടെ… അപ്പോൾ ആമിയും അറിയും… അത് വരെ സസ്പെൻസ്… ” ഞാൻ ചെറിയ ഒരു ഹിന്റിട്ടു കൊടുത്തു. എങ്കിലും അത് അവൾക് കലങ്ങിയില്ല. മറുപടിയായി  ” ശരി ശരി… ഞാൻ കാത്തിരിക്കാം… വേഗം പറയണം കേട്ടോ പുള്ളിക്കാരത്തിയോട്… ” എന്ന് പറഞ്ഞു.

ഇടക്ക്‌ വണ്ടി നിർത്തി ഞങ്ങൾ ഒരു ചായ കുടിച്ചു. ആ സമയം അവളുടെ നമ്പർ എനിക്ക് തന്നു, ഞാൻ തിരികെയും കൊടുത്തു. പിന്നെ വീട്ടിലേക്ക്‌ തിരിച്ചു.

ഉദ്ദേശം 1.30 മണിയായപ്പോൾ ഞങ്ങൾ തറവാട്ടിൽ എത്തി. അവൾ യാത്ര പറഞ്ഞു അവളുടെ വീട്ടിലേക്കും പോയി. ഞാൻ തറവാട്ടിലേക് കയറി. അമ്മ യാത്ര വിശേഷം ഒക്കെ ചോദിച്ചു എങ്കിലും ഞാൻ ഒന്നും പറഞ്ഞില്ല. കഴിച്ചു, കുറച്ചു സമയം കയറി കിടന്നു. എന്നാൽ ആമി അവളുടെ അമ്മയോട് നടന്നത് ഫുൾ പറഞ്ഞു, അവളുടെ അമ്മ എന്റെ അമ്മയോടും.  വൈകിട്ട് ചായയുമായി അമ്മ റൂമിൽ വന്നു എന്നെ വിളിച്ചു ഉണർത്തി ചോദിച്ചു –

” കാര്യങ്ങൾ ഒക്കെ ഞാനറിഞ്ഞു… എന്റെ മോനിത്രേം വിവേകമൊക്കെയുണ്ടോ… ”

എന്താ എന്ന് മനസ്സിലാകാതെ ഇരുന്ന എന്നോട് അമ്മ പറഞ്ഞു – ” ഇന്നുണ്ടായത്… ആമി സുമംഗലയോടു പറഞ്ഞു, അവളെന്നോടും… ”

ഞാൻ ഒന്നും മിണ്ടിയില്ല, ആരോടും പറയരുത് എന്ന് പറഞ്ഞിട്ട് ആമി തന്നെ ഫ്ലാഷ് ആക്കിയോ എന്ന് ചിന്തിച്ചു.

അമ്മ വീണ്ടും തുടർന്നു –

“നീ ഏതോ ഫ്രണ്ടിനെ വിളിച്ചൂന്നും അവളാണ് നിന്നെ സഹായിച്ചത് എന്നുമൊക്കെ പറഞ്ഞു… ആരെയാ വിളിച്ചെ… ശ്രീയെയാണോ… ”

ഞാൻ അതെ എന്ന അർത്ഥത്തിൽ തലയാട്ടി. അമ്മ ശ്രീയെ വിളിച്ചു തരാൻ പറഞ്ഞു. അവർ എന്തൊക്കയോ സംസാരിച്ചു. അമ്മ എന്റെ നെറ്റിയിൽ ഒരു ഉമ്മയും തന്നു മിടുക്കൻ എന്നും പറഞ്ഞു പോയി.

വാട്സ്ആപ്പ് പ്രചാരം നേടിയ സമയം, അവൾക്കും എനിക്കും അത് ഉണ്ടായിരുന്നു. ഞങ്ങൾ ഡെയിലി ചാറ്റ് ചെയ്തിരുന്നു. പിന്നീടുള്ള ദിവസങ്ങൾ ഞങ്ങൾ കുളത്തിന്റെ കരയിൽ മീറ്റ് ചെയ്യും സംസാരിക്കും, ഇടക്ക് അവളോട്‌ ഒത്തു ക്ഷേത്രത്തിൽ പോകും. ഞങ്ങൾ വളരെ അധികം അടുത്തു.

അങ്ങനെ ഒരു ദിവസം രാവിലെ അവളുടെ ചിറ്റപ്പനോ മറ്റോ സുഖം ഇല്ലാത്ത കൊണ്ട്‌ അവർ അവരുടെ വീട്ടിലേക്ക്‌ പോയി. അവൾ രാവിലേ ഒരു മെസ്സേജ് ഇട്ടപ്പോൾ ആണ് പോകുന്നത് അറിഞ്ഞത്.

ചങ്ക് പറിക്കുന്ന വേദനയായിരുന്നു. ഇത്രേം ദിവസം അവൾ ഒപ്പം ഉണ്ടായിരുന്നപ്പോൾ ഉള്ള സന്തോഷം ഒക്കെ ഒരു ദിവസം കൊണ്ടു പോയി. എങ്കിലും ഇടക്ക് മെസ്സജ് അയക്കാം എന്ന ആശ്വാസം തോന്നി.

അങ്ങനെ ലീവ് കഴിഞ്ഞ് ഞാൻ തിരികെ കോളേജ് എത്തി. ഞാൻ അവളുമായി അടുത്ത വിവരം വിഷ്ണുവിനോട് പറഞ്ഞു, എന്തു കൊണ്ടോ ശ്രീയോടും രേഷ്മയോടും മറച്ചു വച്ചു. വിഷ്ണുവിനോടും അവരോടു പറയണ്ട എന്ന് പറഞ്ഞു.  ഇതിന്റെ ഇടക്ക് ഞാനും ആമിയും തകൃതിയായി മെസ്സേജ് അയച്ചു കൊണ്ടിരുന്നു.