“ പുരുഷന്റെ സ്നേഹവും സ്ത്രീയുടെ സ്നേഹവും രണ്ടും രണ്ടാണ് …ആഹ്ലാദിപ്പിക്കുന്നവളെ മാത്രമേ പുരുഷനു സ്നേഹിക്കാൻ ഒരു പരിധി വരെ കഴിയുകയുള്ളൂ …

എന്നാൽ സ്ത്രീ അങ്ങനെ അല്ല …വേദനിപ്പിച്ചവരെയും വേദനിപ്പിച്ചുകൊണ്ടിരിക്കുന്നവരെയും  അവൾക്ക് സ്നേഹിക്കാൻ കഴിയും …”

ആദ്യരാത്രിയിലേക്ക്

Aadyarathiyilekku | Author : Napoleon

എന്താ അശ്വതി നിനക്ക് പറ്റിയത് …ഇതുവരെ ഉണ്ടായിരുന്ന ധൈര്യം എവിടെ ആണ് നിനക്ക് നഷ്ടപ്പെട്ടത് …

തന്റെ തല കുനിച്ചു അവന്റെ കയ്യിൽ നിന്നും താലി ചരട് സ്വീകരിക്കുമ്പോളും ഇത്ര പേടിയുണ്ടായിരുന്നില്ല …

അവന്റെ കയ്യിൽ തന്റെ കൈ വെച്ച് അഗ്നിയെ സാക്ഷിയാക്കി വലയം വെച്ചപ്പോളും ഇത്ര ഭയം തന്നെ അലട്ടിയിട്ടുണ്ടായിരുന്നില്ല…

പിന്നെ എന്താ അശ്വതീ നിനക്ക് ഇപ്പോൾ ഇങ്ങനെ ഹൃദയമിടിപ്പ് കൂടുന്നത് …. എവിടെയാ നിന്റെ ധൈര്യം ചോർന്നു പോയത് …ഞാൻ എന്നോട് തന്നെ ചോദിച്ചു കൊണ്ടിരുന്നു …

ഒരുഗ്ലാസ്സ് പാലും കൊണ്ട് തന്റെ ആദ്യരാത്രിയിലേക്ക് കടക്കാൻ തുടങ്ങുകയായിരുന്നു ഞാൻ …

ലജ്ജ ചുവന്നു തുടുക്കേണ്ട മുഖം,ഭയം കൊണ്ട് കരുവാളിച്ചിരിക്കുകയാണല്ലോ പുലികുട്ടി? ”

ദേവിയമ്മ കൈയിൽ കൊടുത്ത പാൽഗ്ലാസുമായി ഒരു വിറയലോടെ അശ്വതി മുകളിലേക്ക് കയറുമ്പോഴായിരുന്നു പൊടുന്നനെ ആ ചോദ്യം കേട്ടതും, ഞെട്ടിത്തിരിഞ്ഞ അവളിൽ നിന്ന് പാൽ തുളുമ്പി തറയിലക്ക് വീണതും.

ബാൽക്കണിയിൽ നിന്നു സിഗററ്റ് പുകച്ചു കൊണ്ട് പുറത്ത് പുക പോലെ നിറയുന്ന മഞ്ഞിലേക്കും നോക്കി നിൽക്കുന്ന രാഹുലിനെ കണ്ടതും ഭയം പുറത്തു കാണിക്കാതെ

അവൾ ഒരു പുഞ്ചിരി അവനു സമ്മാനിച്ചു.

കാർമേഘകൂട്ടങ്ങളിൽ നിന്ന് തലയെത്തിച്ച് നോക്കുന്ന ചന്ദ്രനെ പോലെയുള്ള ആ ചിരി കണ്ടതും അവൻ ഒരു നിമിഷം ശബ്ദമില്ലാതെ അവളെ തന്നെ നോക്കി നിന്നു.