മിഴിരണ്ടിലും… 2

Author : Jack Sparrow

കഴിഞ്ഞ ഭാഗത്തിൽ സപ്പോർട്ട് ചെയ്ത എല്ലാവർക്കും ഒരുപാട് നന്ദി.. രണ്ടാം ഭാഗം എന്നാൽ കഴിയും വിധം എഴുതിയിട്ടുണ്ട്… നിങ്ങളുടെ അഭിപ്രായങ്ങൾ അത് എന്ത് തന്നെയായാലും കമൻ്റിലൂടെ അറിയിക്കുമെന്ന വിശ്വാസത്തോടെ…
 

അറിയാതെ തന്നെ വീണ്ടും ഞാനവളെ നോക്കി നിന്നുപോയി…ഒട്ടും പ്രതീക്ഷിക്കാതെ കിട്ടിയ സമ്മാനം പോലെയായിരുന്നു എനിക്കവൾടെയാ നോട്ടം…!
അതെന്നെ ചില്ലറയൊന്നുമല്ല സന്തോഷിപ്പിച്ചത്…

ആ കണ്ണുകളിൽ എന്താണെന്നെനിക്കൊരു ഊഹവും ഉണ്ടായിരുന്നില്ല…പക്ഷെ ഒന്നുമാത്രമറിയാം അതൊരിക്കലും എന്നോടുള്ള ദേഷ്യമായിരുന്നില്ല…!

തുടരുന്നു…

അൽപനേരം ആ നോട്ടം നീണ്ടുപോയി…പെട്ടന്നെന്തോ ഓർത്തപോലെ നോട്ടം പിൻവലിച്ച് അവൾ ക്ലാസ്സിലേക്ക് കയറിപോയതും,ഞാനറിയാതെ തന്നെ എൻ്റെ മുഖത്ത് ഒരു ചിരി പ്രത്യക്ഷപ്പെട്ടു…
അതും കഴിഞ്ഞ് ജനലിനടുത്ത് നിന്ന് തിരിയുമ്പോഴാണ് കയ്യുംകെട്ടി രണ്ടുപേരെന്നെതന്നെ നോക്കി നിൽക്കുന്നത് ഞാൻ കാണുന്നത്…അവരുടെ മുഖഭാവം കണ്ടാലറിയാം കാര്യങ്ങളുടെ കിടപ്പ് ഏകദേശം മനസ്സിലായിട്ടുണ്ടെന്ന്…!

“അപ്പോഴെൻ്റെ ഊഹം തെറ്റിയില്ല…ഇവളാണല്ലേ കക്ഷി…!”

ഒന്നയഞ്ഞുകൊണ്ട് നികേഷാണത് പറഞ്ഞത്…

അവൻ പറഞ്ഞതിന് മറുപടിയായി ഒന്ന് ചിരിച്ചുകാണിക്കാനല്ലാതെ എനിക്ക് ഒന്നും പറയാനായില്ല…
സത്ത്യത്തിൽ എൻ്റെ നാവ് പൊങ്ങിയില്ല എന്നു പറയുന്നതാവും ശരി…

“എടാ ഇവളെ ഞാൻ ഇതിന് മുൻപെവിടെയോ കണ്ടിട്ടുണ്ടല്ലോ…”

നികേഷിനെ നോക്കിക്കൊണ്ട് അരുൺ പറഞ്ഞു…