?The universe ? [ പ്രണയരാജ] 305

റൈറ്റ് സൈഡിൽ ഉണ്ടായിരുന്ന ചെറിയൊരു ബോക്സിൻ്റെ അരികിൽ ചെന്ന് നിന്നു , ഒരു കൊച്ചു പാത്രം വെച്ചതും കൃത്യമായ അളവിൽ 20 ml മെഡിസിൻ ആ പാത്രത്തിലേക്ക് നിറഞ്ഞു.  ഉടനെ തന്നെ അത് ഞാൻ കുടിച്ചു.

അത് കുടിച്ച സമയം തന്നെ സ്പീക്കറിൽ നിന്നും അടുത്ത ഇൻസ്ട്രക്ഷൻ വന്നു.

കുറച്ചുനേരം വിശ്രമിക്കുക.

ഞാൻ നേരെ എന്റെ മുറിയിലേക്ക് പോയി. ബെഡിൽ പതിയെ കിടന്നു, ഓർമ വെച്ച നാൾ മുതൽ ഞാൻ മരുന്ന് കുടിക്കുന്നുണ്ട്. അതെന്തിനാ എന്ന് എനിക്കറിയില്ല. നീല വർണ്ണത്തിൽ തിളങ്ങുന്ന ഒരു തരം ദ്രാവകം അതു കുടിച്ചു ഇറക്കുമ്പോൾ ദേഹമാസകലം ഒരു എരിച്ചിൽ ആണ്.

എൻ്റെ ജീവിത രീതി നിങ്ങൾക്ക് ഏകദേശം മനസ്സിലായി കാണും എന്ന് ഞാൻ കരുതുന്നു. ഈ ഭൂമിയെക്കുറിച്ചും ഭൂമിക്ക് വെളിയിലുള്ള പല കാര്യങ്ങളും എന്നിലേക്ക് നിറച്ചു തന്നത് ആ ഇൻസ്ട്രക്ട്രർ ആണ്.

ഞാനെപ്പോ ഭക്ഷണം കഴിക്കണം എപ്പോ കിടക്കണം എപ്പോ വ്യായാമം ചെയ്യണം എപ്പൊ പഠിക്കണം , അങ്ങനെ ഞാൻ ചെയ്യേണ്ട എല്ലാ കാര്യവും തീരുമാനിക്കുന്നത് ഒരു മാസ്റ്റർ കമ്പ്യൂട്ടറാണ്.

എനിക്ക് അതിനോട് ചോദ്യം ചോദിക്കാനുള്ള അധികാരം ഉണ്ട്. ചോദിച്ചാൽ അതിനുള്ള മറുപടികളും തരാറുണ്ട്. പക്ഷെ ഞാൻ ആര്, ഞാൻ എന്തിനിവിടെ കഴിയുന്നു, എന്ന ചോദ്യങ്ങൾ ഞാൻ ചോദിക്കുമ്പോൾ, അതിന് എനിക്ക് ലഭിച്ച ഉത്തരം ഒന്നേ ഒന്ന് മാത്രം.

സമയമായിട്ടില്ല…

ആ സമയം എപ്പോൾ എന്ന് ചോദിച്ചാൽ എനിക്ക് കിട്ടുന്ന മറുപടി ഒന്നുമാത്രമായിരുന്നു.

നിന്റെ പതിനെട്ടാം പിറന്നാൾ.

നാളെ ആ ദിനമാണ്, ആ ദിനത്തിന് വേണ്ടിയാണ് ഞാൻ കാത്തിരിക്കുന്നത്. ഞാനാരാണെന്ന് എനിക്ക് അറിയണം, ഇവിടെ തടവിലാക്കിയത് ആരെന്നും എനിക്കറിയണം.