?Guardian Ghost? Part -3 ༆ കർണൻ(rahul)༆ 343

18 വർഷങ്ങൾക്ക് മുൻപ്….

തോട്ടത്തിൽ തറവാട് അരക്ഷിതാവസ്ഥയിൽ കഴിയുന്ന കാലം. അപ്പോൾ മിഖായേലിന് 16 വയസ്സ്. മ്മടെ ജോണച്ചായന് 26 ഉം. അവർ തമ്മിൽ 10 വയസ്സിന്റെ വ്യത്യാസം ഉണ്ട്. അപ്പച്ചൻ അപ്പോഴും പറമ്പിലെ പണിയും മറ്റുമായി ആണ് കുടുംബം നോക്കിയിരുന്നത്.

ജോണച്ചായൻ രണ്ടുമൂന്ന് വർഷം നാട്ടിൽ തെണ്ടി നടന്നിട്ട് അവസാനം ഇങ്ങനെ വിട്ടാൽ മൂത്തമകൻ വഴിതെറ്റി പോകും എന്ന് തോന്നിയപ്പോൾ അപ്പച്ചൻ കോട്ടയത്ത് ഒരു കോളേജിൽ MBA ക്ക് അവനെ ചേർത്തു.

മിഖായേൽ അപ്പച്ചന്റേം അമ്മച്ചിടേം സീമന്ത പുത്രൻ ആയി കഴിയുന്ന കാലം.അപ്പച്ചനും അമ്മച്ചിയ്ക്കും മിഖാ എന്ന് പറഞ്ഞാൽ ജീവനാണ് അവനും അതുപോലെ തന്ന. ആ ഇടയ്ക്കാണ് അപ്പച്ചൻ കുരുമുളക് പറിക്കാൻ കയറി ഏണിയിൽ നിന്ന് വീണ് നടുവിനു ചെറിയ പ്രശ്നം പറ്റി.

വീട്ടിലെ ചിലവുകൾ അവതാളത്തിൽ ആയി..

മിഖാ നീ എന്ത് പറഞ്ഞാലും ഈ കാര്യം നടക്കില്ല. ഈ പതിനാറാം വയസ്സിൽ നിന്നെ ജോലിക്ക് പറഞ്ഞയക്കുന്നത് ഒന്നും നടക്കുന്ന കാര്യം അല്ല. അതും കൂപ്പിൽ പണിക്ക് പോകുവാണെന്ന്. അപ്പോ നീ പഠിപ്പ് നിർത്താൻ പോകുവാണോ? അമ്മച്ചി ദേഷ്യത്തിൽ പറഞ്ഞു.

അപ്പാ അപ്പനെങ്കിലും ഈ അമ്മച്ചിയോട് പറ അവിടെ അവർ തടി ചുമപ്പിക്കാൻ അല്ല എന്നെ കൊണ്ട് പോകുന്നത്. അതിനു അവിടെ ആനയും മറ്റും ഉണ്ട്. എനിക്ക് അവിടെ കണക്ക് നോക്കുന്ന പണിയാ. മിഖാ ഒരു ആശ്രയത്തിനെന്നോണം അപ്പനെ പറഞ്ഞു വശത്താക്കൻ നോക്കി.

നീ എന്ത് പറഞ്ഞാലും നടക്കില്ല മിഖാ.
അമ്മച്ചി അവസാന തീരുമാനം എന്ന രീതിക്ക് തറപ്പിച്ചു പറഞ്ഞു.

എന്റെ മേഴ്സി കൊച്ചേ എന്താ ഇങ്ങനെ ഒന്നു സമ്മതിക്കെന്നെ ഞാൻ അവിടെ ഭാരിച്ച പണി ഒന്നും ചെയ്യില്ല സത്യം. മിഖാ അമ്മച്ചിയെ കവിളിൽ ഒക്കെ പിച്ചി കൊഞ്ചിച്ചു കൊണ്ട് അനുനയിപ്പിക്കാൻ ശ്രമം നടത്തി.

ഇത് അവന്റെ സ്ഥിരം പരിപാടി ആണ്. അമ്മച്ചി ഇടഞ്ഞു നിൽക്കുമ്പോൾ ഈ കൊഞ്ചിക്കൽ. അതിൽ അമ്മച്ചി മൂക്കും കുത്തി വീണു. അമ്മച്ചിയിൽ അവന്റെ കൊഞ്ചിക്കൽ ചെറിയ ചിരി ഉണർത്തിയ നിമിഷം.

ഹാ അങ്ങനെ വഴിക്കു വാ എന്റെ മേഴ്സി കൊച്ചേ. അതും പറഞ്ഞ് അവൻ ഒരിക്കൽ കൂടെ അമ്മച്ചിയുടെ കവിളിൽ വലിച്ചു വിട്ട ശേഷം അവിടുന്ന് തടി തപ്പി.ഇനിയും അവിടെ നിന്നാൽ അമ്മച്ചിടെ മനസ്സ് മാറും എന്ന് അവന് നല്ലതുപോലെ അറിയാം.