?Guardian Ghost? Part -3 ༆ കർണൻ(rahul)༆ 343

താനെന്താ ഇവിടെ പുതിയതായിട്ട് ജോയിൻ ചെയ്ത നേഴ്സമ്മാരുടെ സെൻസസ് എടുക്കാൻ വന്നതാണോ? എങ്കിൽ സാറ് കുറച്ചു വിയർക്കുമല്ലോ?

ഡീ നേഴ്സ് കൊച്ചേ ഞാനൊരുപാട് വിയർത്തിട്ടു തന്ന ഇവിടെ വരെ എത്തിയത്. ഇവിടെ തൂറ്റ് ഇളകി കിടക്കുന്ന നേഴ്സമ്മാരുടെ സെൻസസ് എടുക്കുന്നതല്ല എന്റെ പണി. പിന്നെ എന്നെ തടയുന്ന കാര്യം അത് മോള് കൂട്ടിയാൽ കൂടത്തില്ല. ഈ ഹോസ്പിറ്റൽ പണിതുവച്ചേക്കുന്ന കുരിശുംമൂട്ടിൽ അവറാച്ചൻ എന്നെ തടയത്തില്ല.

ശ്രയ അവനെ തടയണ്ട നീ തടഞ്ഞാൽ അവൻ നിൽക്കത്തുമില്ല. ചുമ്മ അവന്റെ കയ്യിലിരിക്കുന്നത് വാങ്ങി കൂട്ടാതെ അവിടെങ്ങാനും പോയിരിക്കാൻ നോക്ക് പെണ്ണെ. അങ്ങോട്ട് ദൃതിയിൽ വന്ന എയ്ഞ്ചൽ ഗോസ്റ്റ് എന്തോ പറയാൻ വന്നതും അത് മുഴുവിപ്പിക്കും മുന്നേ ആ നേഴ്സിനോട് പറഞ്ഞു.

ഡാ മിഖാ നീ കേറി കുഞ്ഞിയെ കാണെടാ അവള് ഇടയ്ക്കിടെ അവളുടെ കൊച്ചനെ  അന്വേഷിക്കുന്നുണ്ടായിരുന്നു. എയ്ഞ്ചൽ ഗോസ്റ്റിനോട് പറഞ്ഞു.

അവൻ ഒരുവട്ടം കൂടെ ആ നേഴ്സിനെ നോക്കിയിട്ട് അകത്തേയ്ക്ക് കയറിപ്പോയി.

ശേ ഇതായിരുന്നോ ആ കുട്ടി പറഞ്ഞോണ്ടിരുന്ന കൊച്ചൻ. ഞാൻ കരുതി ആരോ ഇടിച്ചു കേറി ICU ലേക്ക് വരുന്നതാണെന്ന്. ചേച്ചി വന്നത് നന്നായി ഇല്ലേൽ ഞാൻ വല്ലതും കൂടുതലായി പറഞ്ഞേനെ. ശ്രയ എയ്ഞ്ചലിനോട് പറഞ്ഞു.

ഉവ്വ ഡി കൊച്ചേ ഞാൻ ഇപ്പോ വന്നില്ലായിരുന്നേൽ നിന്നെ പിന്നെ ഭിത്തിയിൽ മാലയിട്ട് വച്ചേക്കുന്നത് കാണേണ്ടി വന്നേനെ. എന്നാലും നീ ഇത്രയും കിടന്ന് പ്രസംഗിച്ചിട്ട് അവൻ കൈവക്കാത്തത് എന്താന്നാ മനസ്സിലാക്കാത്തത്. എയ്ഞ്ചൽ ആലോചനയോടെ പറഞ്ഞു.

ഓഹോ അപ്പോ ചേച്ചിക്ക് അങ്ങേര് എന്നെ അടിക്കാത്തതിൽ ആണോ വിഷമം. ശ്രയ ഒരു പരിഭവത്തോടെ പറഞ്ഞു.

ഡി ശ്രയ കൊച്ചേ അവൻ ആരാന്ന് അറിഞ്ഞാൽ അവന്റെ കയ്യിൽ നിന്ന് ഞാൻ അത്രേ പ്രതീക്ഷിച്ചുള്ളൂ എന്നതിലായിരിക്കും നിനക്ക് അത്ഭുതം. എയ്ഞ്ചൽ പറഞ്ഞു.