?കുസൃതികൂട്ടം?[രാവണാസുരൻ (Rahul)] 123

ഇത് കുറച്ചു കുഞ്ഞി കുട്ടികളുടെ കഥയാണ് അവരാണ് ഇതിലെ പ്രധാന കഥാപാത്രങ്ങൾ.ബാക്കിയൊക്കെ നിങ്ങൾക്ക് വഴിയേ മനസ്സിലാകും ഒരു കോമഡി കഥയാണ് ഉദ്ദേശിക്കുന്നത് ആ ഒരു mind ൽ വായിക്കുക

 

                 ബാവുമോൻ Rocks 
                 ——————————

Author :- രാവണാസുരൻ(Rahul)

 

 

സൂര്യൻ തന്റെ പൊൻകിരണങ്ങൾ ഭൂമിക്കായ്‌ സ്നേഹ വർഷം പോലെ വരി വിതറി അഥവാ നേരം പരപരാ വെളുത്തു.

ഒരു ഉൾഗ്രാമഭവനം

അമ്മേ എന്റെ നിക്കർ തേച്ചോ?

ഒന്ന് പോയേ ചെക്കാ ഇവിടെ മനുഷ്യന് നൂറുകണക്കിന് പണിയുള്ളപ്പോഴാ അവന്റെ നിക്കർ.അല്ല നിക്കർ തേച്ചിട്ടിട്ടു പോകാൻ നീയെന്താ ഫാഷൻഷോയ്ക്ക് പോകുന്നോ

അമ്മേ വളർന്നു വരുന്ന ഒരു ജൂവാവിന്റെ മനസ്സ് മനസ്സിലാക്കാതെ അമ്മ ഇങ്ങനെ കണ്ണീച്ചോരയില്ലാതെ പെരുമാറരുത്.

അതിന് നീയെപ്പോ യുവാവായി? അമ്മ താടിയിൽ കൈവച്ചുകൊണ്ട് ചോദിച്ചു

അതല്ലേ പറഞ്ഞത് വളർന്നു വരുന്ന ജുവാവ് എന്ന്. ഞാൻ വളർന്ന് ഒരു ജുവാവ് ആകുമല്ലോ.അമ്മയാണത്രെ അമ്മ ഗ്രാമർ ശ്രദ്ധിക്കണം പുല്ലിംഗവും സ്ത്രീലിംഗവും ശ്രദ്ധിക്കണം ഒന്നുമില്ലേലും ആ കർത്താവിനെ എങ്കിലും ഒന്ന് ശ്രദ്ധിക്കണം.

അതേയ് നിന്റെ കർത്താവ് പലവട്ടം ചിന്തിച്ചിട്ടുള്ളതാ നിനക്ക് പകരം വല്ല കപ്പവാഴയും വെച്ചാൽ മതിയാർന്നെന്ന്
അച്ഛന്റെ ശബ്ദം ഒരു അശരീരി കണക്കെ വീട് മുഴുവൻ അലയടിച്ചു.

നീയൊന്ന് പോയേ ചെക്കാ രാവിലെ തന്നെ അവൻ ഗ്രാമർ പഠിപ്പിക്കാൻ ഇറങ്ങിയേക്കുന്നു.അല്ല ഗ്രാമർ മാഷിന് മലയാളത്തിനു എത്രയാ മാർക്ക്.അതോടൊപ്പം തന്നെ അമ്മയുടെ മറുപടിയും എത്തി

ഒന്നുമില്ലേലും ഞാൻ നാളയുടെ വകധാനമല്ലേ കുടുംബത്തിന്റെ പ്രതീക്ഷയല്ലേ? എന്നെയിങ്ങനെ മാർക്ക് ചോദിച്ച് അധിക്ഷേപിക്കരുത് മാതാശ്രീ അധിക്ഷേപിക്കരുത്.

ഞാനപ്പോഴേ പറഞ്ഞതല്ലേ വാഴ മതിയെന്ന്.കപ്പവാഴയായിരുന്നേൽ ഇതിനു മുന്നേ കുറച്ചു കുലയും കിട്ടിയേനെ.ഇതുമാതിരി ഉടായിപ്പ് ഡയലോഗ് കേൾക്കുകയും വേണ്ടാർന്നു പിന്നെയും അശരീരി.

എനിക്ക് വല്യ പ്രതീക്ഷ ഒന്നുമില്ല.
അശരീരിക്ക് ഒപ്പം തന്നെ അമ്മയുടെ ഡയലോഗും ഒരുലോഡ് പുച്ഛവും എന്നെ തേടിയെത്തി.

തളർത്തി രാവിലെ തന്നെ മനുഷ്യനെ തളർത്തി.എന്നാലും മാതാശ്രീ ഇങ്ങളും ഈ അശരീരി കണക്കെ സംസാരിക്കുന്ന എന്റെ തന്തപ്പടിയും വെല്ല കോൺട്രാക്റ്റും എടുത്തിട്ടുണ്ടോ എന്നെ ഇങ്ങനെ ദിവസവും രാവിലെ തളർത്തിക്കോളാമെന്ന്.ഈ വിഷമം തീർക്കാൻ ഇനി രണ്ടുകുറ്റി പുട്ട് തിന്നേണ്ടിവരുമല്ലോ ഈശ്വരാ.

അതിൽ ഒരു കുറവും വരുത്തരുത്.ഇവന്റെ വയറ്റിൽ കൊക്കോപ്പുഴുവല്ല അനോക്കോണ്ട എങ്ങാണ്ടോ ആണ് കിടക്കുന്നെ പിന്നെയും അശരീരി.

മാതാശ്രീ നോക്കിക്കോ ഈ അശരീരി കണക്കെ സംസാരിക്കുന്ന മനുഷ്യനെ ഞാൻ ഒരുദിവസം പൊട്ടകിണറ്റിൽ പിടിച്ചിടും.

അല്ല അങ്ങേര് പറഞ്ഞത് ശരിയല്ലേ ഇത് സ്ഥിരം ഉള്ളതാണല്ലോ വിഷമം വന്നെന്നും പറഞ്ഞു കൂടുതൽ തട്ടുന്നത്.എടുത്തു വച്ചിട്ടുണ്ട് പോയ്‌ കഴിക്ക്.
അമ്മ ഒരു ചെറു പുഞ്ചിരിയോടെ പറഞ്ഞു

മാതാശ്രീ ആ നിക്കർ? അതും ചോദിച്ച് ഞാൻ ഒരു ദയനീയ ഭാവത്തിൽ അമ്മയെ നോക്കി

തേച്ചു വച്ചേക്കാം പോയ്‌ കഴിച്ചേച്ചും വാ കള്ള തെമ്മാടി.അമ്മ ഒരു പുഞ്ചിരിയോടെ പറഞ്ഞു

മ്മളോടാ കളി അമ്മയെ കയ്യിലെടുക്കാൻ ഇത്രയൊക്കെ തന്നെ ധാരാളം.പക്ഷെ അശരീരിയാണ് മെയിൻ വില്ലൻ.അങ്ങനെ പുട്ടും കടലക്കറിയും വയറുനിറയെ തട്ടി.തിരിച്ചു വന്നപ്പോഴേക്കും അമ്മ നിക്കർ തേച്ചുവച്ചു.