?കരിനാഗം 18?[ചാണക്യൻ] 349

ഗൗരവത്താൽ പൂരിതമായ ഋഷിയുടെ മുഖഭാവം തന്നെയായിരുന്നു എല്ലാരുടെയും കണ്ണുകളിൽ നിറഞ്ഞു നിന്നത്.

മുന്നിലെ കിഴി പതിയെ എടുത്ത കോതണ്ഡപാണൻ അത്‌ തുറന്നു അതിലെ അമൂല്യമായ നവരത്നങ്ങൾ പുറത്തേക്കെടുത്തു.

അവയെ യഥോചിതം വന്ദിച്ച കോതണ്ഡപാണൻ ആ തളികയിലെ ഒമ്പത് കുഴികളിലുമായി ഈ നവരത്നങ്ങളെ പ്രതിഷ്ടിച്ചു.

എന്നിട്ട് കൂജയിലെ ശുദ്ധമായ ജലമെടുത്ത് മന്ത്രോച്ചാരണത്തോടെ ആ വെള്ളി തളികയിലേക്ക് നിറയെ ഒഴിച്ചു.

അതിനു ശേഷം സൂര്യന്റെ ലോക്കറ്റ് കയ്യിലെടുത്തു അതിൽ കർപ്പൂരം കത്തിച്ചു വച്ച ശേഷം തളികയിലെ ജലത്തിൽ പതിയെ ഒഴുക്കി വിട്ടു.

വായു, ജലം, ഭൂമി,ആകാശം, അഗ്നി എന്നിങ്ങനെ പഞ്ച ഭൂതങ്ങളെ സാക്ഷി നിർത്തി കോതണ്ഡപാണൻ രാജകുമാരൻ ദണ്ഡവീരന്റെ ഗ്രഹനില അറിയുവാൻ ശ്രമിച്ചു.

തളികയിലെ ജലത്തിലൂടെ കത്തിച്ചു വച്ച കർപ്പൂരവുമായി സൂര്യന്റെ ലോക്കറ്റ് ഒഴുകി നടക്കുകയാണ്.

ആ ലോക്കറ്റിന്റെ ഓരോ നീക്കവും സൂക്ഷ്മതയോടെ കോതണ്ഡ പാണൻ നിരീക്ഷിക്കുകയാണ്.

ദണ്ഡവീരന്റെ ജന്മനാളുമായി ബന്ധപ്പെട്ട പുഷ്യരാഗത്തെ തന്നെ ശ്രദ്ധിക്കുകയായിരുന്നു കൊട്ടാരം ജ്യോതിഷി.

കൊട്ടാരം ജ്യോതിഷി കോതണ്ഡപാണൻ നോക്കി നിൽക്കെ പുഷ്യരാഗത്തിന്റെ ശോഭ ക്രമേണ കുറഞ്ഞു വന്നു അത്‌ നിർജീവമായി മാറി.

ആ കാഴ്ച കണ്ടതും ജ്യോതിഷിയുടെ കണ്ണുകൾ വികസിച്ചു.

എന്തോ കണ്ടെത്തിയ പോലെ.

മൃത്യു……….. മൃത്യു………… മൃത്യു

ജ്യോതിഷി പുലമ്പുന്നത് കണ്ടു ചക്രവർത്തി ഗജേന്ദ്രസേനൻ നടുങ്ങി.

മഹാമുനെ……. അങ്ങെന്താണ് അർത്ഥമാക്കുന്നത്? മൃത്യുവോ? ആർക്ക്?

അദ്ദേഹം ആകുലതയോടെ ചോദിച്ചതും വായുവിലൂടെ തന്റെ കൈകൊണ്ടു വട്ടത്തിൽ കറക്കി മുഷ്ടി ചുരുട്ടി പിടിച്ച ശേഷം ജടാധാരിയായ ആ വൃദ്ധൻ പുലമ്പി.

അങ്ങയുടെ സൽപുത്രൻ തന്നെ ഗജേന്ദ്രസേനാ…….. അവന്റെ മൃത്യു അവനെ തന്നെ പിന്തുടരുന്നു……. ഈരേഴുലകിൽ നിന്നും അതിശക്തനായ ഒരുവൻ വന്നു അങ്ങയുടെ പുത്രനെ ഒരു പൂവിറുക്കുന്ന ലാഘവത്തോടെ വധിക്കും…… അതിനുശേഷം ആ മഹത്തായ ഉടവാളും കയ്യിലേന്തും….. ഇതാണ് സത്യം……. വരാൻ പോകുന്ന സത്യം

ജ്യോതിഷി പറയുന്നത് കേട്ട് ദണ്ഡവീരൻ വീറോടെ ചാടിയെഴുന്നേറ്റു.

ചക്രവർത്തി ഗജേന്ദ്രസേനൻ ഭയപ്പാടോടെ ജ്യോതിഷിയെയും തന്റെ സൽ പുത്രനെയു മാറി മാറി നോക്കി.

ഈ ദണ്ഡവീരനോളം പോരാളിയായ മറ്റൊരു നാഗം ഈ പ്രപഞ്ചത്തിൽ തന്നെയില്ല…… അത്രയ്ക്കും ശക്തനായ നമ്മെ വധിക്കുവാൻ ആർക്കും കഴിയുകയില്ല…… ഇത് നമ്മുടെ വെല്ലുവിളിയാണ്…….