?കരിനാഗം 18?[ചാണക്യൻ] 349

ചക്രവർത്തിയും സ്വപിതാവുമായ ഗജേന്ദ്രസേനന്റെ പക്കലേക്ക് പോയതാണ് ദണ്ഡവീരൻ

അപ്പൊ അവിടെ അതിലും മഹത്തരമായ ഒരു കർമം നടക്കുന്നുണ്ടായിരുന്നു.

അതിനു പങ്കാളികളാവാൻ ചക്രവർത്തിക്കൊപ്പം പ്രധാന മന്ത്രിയും കുല ഗുരുവും ഒപ്പം സേനാധിപതിയുമുണ്ട്.

അവർ തങ്ങളുടെ ഇരിപ്പിടത്തിൽ ആഢ്യത്തോടെ ഇരിപ്പുണ്ട്.

അവിടെയുള്ള ഒഴിഞ്ഞ ഇരിപ്പിടത്തിൽ ദണ്ഡവീരനും ഇരിപ്പുറപ്പിച്ചു.

അവർക്ക് മുന്നിലെ നിലത്തു വിരിച്ച പരവതാനിയിൽ ഒരാൾ ഇരിപ്പുണ്ടായിരുന്നു.

കൊട്ടാരം ജ്യോതിഷി.

മഹാഋഷി കോതണ്ഡപാണൻ സ്വാമികൾ.

മഹാമുനി ദുർവാസാവിന്റെ പ്രിയപ്പെട്ട ശിഷ്യൻ.

അദ്ദേഹമാണ് വെള്ളിനാഗ വംശജരുടെ അവസാന വാക്ക് എന്നും പറയാം.

ഏതു കാര്യങ്ങളായാലും അത്‌ ഔദ്യോഗികമാവട്ടെ അനൗദ്യോഗികമാവട്ടെ എല്ലാം മഹാഋഷി കോതണ്ഡപാണന്റെ ഉപദേശത്താലും നിർദേശത്താലും മാത്രമായിരുന്നു നടത്തപെടുന്നത്

അതിൽ കൊട്ടാര ഭരണ കാര്യങ്ങളും ഉൾപ്പെട്ടിരുന്നു.

ഇന്നെന്തോ വളരെ തന്ത്ര പ്രധാനമായ കാര്യത്തിനു വേണ്ടിയാണ് ചക്രവർത്തി ഗജേന്ദ്രസേനൻ കൊട്ടാരം ജ്യോതിഷിയെ വിളിച്ചു വരുത്തിയത്.

മഹാ മുനെ……. അങ്ങ് പറഞ്ഞാലും ബർഗരീകന്റെ അതിവിഷിഷ്ടമായ ഉടവാളായ വജ്രകേയം എന്റെ കുമാരന് പ്രാപ്തമാക്കാനുള്ള മാർഗ നിർദേശം നൽകിയാലും.

ഗജേന്ദ്രസേനൻ കൈകൾ കൂപ്പി ആരാഞ്ഞു.

തന്റെ നീണ്ടു വളർന്ന നരച്ച താടിരോമങ്ങളിൽ തഴുകികൊണ്ട് കോതണ്ഡപാണൻ പറഞ്ഞു.

വരട്ടെ…….. പരിഹാരമുണ്ടാക്കാം.

അതും പറഞ്ഞുകൊണ്ട് അദ്ദേഹം ധ്യാനനിമഗ്നനായി.

അതിനു ശേഷം കണ്ണുകൾ തുറന്നു ദൃഢ ശബ്ദത്തിൽ ആജ്ഞാപിച്ചു.

കൊണ്ടു വാ.

അദ്ദേഹത്തിന്റെ ആജ്ഞ കേട്ടതും കൊട്ടാരം ദാസന്മാരിൽ ഒരാൾ കയ്യിലൊരു വെള്ളി താലവുമായി കടന്നു വന്നു.

ആ താലം സസൂക്ഷ്മം ഋഷിയുടെ മുൻപിൽ വച്ച ശേഷം അയാൾ പിന്മാറി.

പിന്നാലെ വന്ന മറ്റൊരു ദാസൻ ഒരു കൂജ നിറയെ ശുദ്ധ ജലവുമായി കടന്നു വന്നു.

അതും ഋഷിയുടെ മുന്നിൽ വച്ച ശേഷം അയാളും മടങ്ങി.

പിന്നീട് വന്ന ദാസന്റെ കയ്യിൽ ഉണ്ടായിരുന്നത് ഒരു സൂര്യന്റെ കുഞ്ഞു ലോക്കറ് ആയിരുന്നു.

അതും അവിടെ വച്ചു അയാൾ പോയി.

മുന്നിലെ വെള്ളി തളികയിൽ ഋഷി കോതണ്ഡപാണൻ മിഴികൾ നട്ടു.

അസാധാരണമാംവിധം വലിപ്പമുള്ള ആ തളികയിൽ ഒമ്പത് കുഴികൾ കാണാം.

പൊടുന്നനെ ഒരു ദാസൻ കയ്യിൽ ഒരു ചുവന്ന കിഴിയുമായി അവിടേക്ക് എത്തി.

അത്‌ ഋഷിയുടെ മുന്നിൽ വച്ച ശേഷം അയാളും പിൻവാങ്ങി.