?കരിനാഗം 18?[ചാണക്യൻ] 349

ഹോ……. എന്തൊരു മഹത്തായ നിർമിതി……. ഈ ഉടവാൾ നാം സ്വന്തമാക്കുകയാണെങ്കിൽ തീർച്ചയായും ഈ ഉലകം മുഴുവൻ എന്റെ കൈപിടിയിൽ വന്നു ചേരും.

അത്യാർത്തിയാൽ ദണ്ഡവീരന്റെ കണ്ണുകൾ കൂടുതൽ തിളങ്ങി.

ദണ്ഡവീരൻ ചുവടുകൾ വച്ചു തകർക്കപ്പെട്ട സ്തംഭത്തിന് മുന്നിലെത്തി.

അപ്പോഴും അതിന്റെ ശോഭയ്ക്ക് കോട്ടം വന്നിട്ടില്ല.

അത്യാർത്തിയുടെ അന്ധകാരത്താൽ കാഴ്ച നഷ്ടപ്പെട്ട ദണ്ഡവീരൻ മുന്നോട്ടാഞ്ഞ് വജ്രകേയത്തിൽ പിടുത്തമിട്ടു.

തല കുത്തനെ നിൽക്കുന്ന ആ ഉടവാളിന്റെ കൈ പിടിയിൽ പിടുത്തമിട്ട ശേഷം ദണ്ഡവീരൻ ആ ഉടവാൾ പതിയെ ഉയർത്താൻ ശ്രമിച്ചു.

സാധിക്കുന്നില്ല.

അതിന്റെ വേരുകൾ മണ്ണിലാഴ്ന്ന് പോയ പോലെ.

തന്റെ സർവ ശക്തിയുമുപയോഗിച്ച് ദണ്ഡവീരൻ ആ ഉടവാൾ ഉയർത്താൻ വീണ്ടും  ശ്രമിച്ചു.

എന്നാൽ സാധിച്ചതേയില്ല.

തന്റെ ഇരു കൈകളും ഉപയോഗിച്ച് കൂടുതൽ ബലത്തോടെ പരിശ്രമിച്ചെങ്കിലും വീണ്ടും പരാജയപ്പെടാനായിരുന്നു ദണ്ഡവീരൻറെ വിധി.

നിരാശയും അതിലുപരി മറ്റുള്ളവർക്ക് മുന്നിൽ കോമാളിയേക്കാൾ തരം താഴ്ത്തപ്പെട്ടതിനാലും അങ്ങേയറ്റം കലി പൂണ്ട ദണ്ഡവീരൻ മദം പൊട്ടിയ കാട്ടാനയെക്കാൾ വീറോടെ രണ ഗോദയാകെ തല്ലി തകർത്തു തുടങ്ങി.

കണ്ണിൽ കണ്ടതെല്ലാം തച്ചുടച്ചു.

എന്നിട്ടും കലി തീരാത്ത ദണ്ഡവീരൻ അവിടെ കണ്ട വലിയൊരു തൂണിലും മുഷ്ടി ചുരുട്ടി ആഞ്ഞു ഇടിച്ചതും തൂണ് സ്ഫോടന ശബ്ദത്തോടെ തകർന്ന് തരിപ്പണമായി.

ഘ്രാാാാാാാാാാാ

മാനത്തേക്ക് നോക്കി കോപം അടങ്ങാത്ത ദണ്ഡവീരൻ നെഞ്ചത്തടിച്ചുകൊണ്ടു അലറി.

ആ അലർച്ചയുടെ പ്രകമ്പനത്താൽ കരിനാഗ രാജ്യം പോലും നടുങ്ങി.

കരിനാഗ രാജ്യവും കൊട്ടാരവും എല്ലാം ഇപ്പൊ വെള്ളി നാഗജർ അതിക്രമിച്ചു കയറി കീഴടക്കി വച്ചിരിക്കുകയാണ്.

സത്യം പറഞ്ഞാൽ വെള്ളിനാഗ ചക്രവർത്തി ഗജേന്ദ്ര സേനൻ കരിനാഗ രാജ്യം കൂടി കീഴടക്കിയതോടെ തന്റെ സാമ്രാജ്യത്തിന്റെ അതിരുകൾ വർധിപ്പിച്ചു എന്ന് വേണം പറയാൻ.

അരിശം പൂണ്ടു നിൽക്കുന്ന വെള്ളി നാഗ രാജകുമാരൻ ദണ്ഡവീരൻ നേരെ കൊട്ടാരം ലക്ഷ്യമാക്കി നടന്നു.

ഇടനാഴിയിലൂടെ നടന്നു പ്രധാന സഭയിലെത്തി.

ഔദ്യോഗികമായ കർത്തവ്യങ്ങൾക്കായുള്ള മുറി.

അതും താണ്ടി രാജകുമാരൻ രണ്ടാം നിലയിലെ തന്റെ പള്ളിയറയിൽ എത്തിച്ചേർന്നു.

അപ്പോഴും ദണ്ഡവീരനിലെ എരിയുന്ന കോപത്തിനു അറുതി വന്നിരുന്നില്ല.