അവന്തിക പുറത്തെ കാഴ്ചകളിൽ ഉറ്റുനോക്കിക്കൊണ്ട് പറഞ്ഞു .

” കുമാരീ ….. ആ സ്വപ്നത്തെകുറിച്ച് ആലോചിച്ച് ഇനി വിഷമിക്കരുത് . എന്തായാലും അടുത്ത് ക്ഷേത്ര ദർശനം നടത്തുമ്പോൾ കുമാരിയോടൊപ്പം ഞാനും വനത്തിനുള്ളിലേക്ക് വരുന്നുണ്ട് . എനിക്കും ഒന്ന് കാണണം കുമാരിയുടെ മനസ്സ് കീഴടക്കിയ ആ വീരനെ …… ”

തോഴി ഒരു പുഞ്ചിരിയോടെ പറഞ്ഞു . അത് കേട്ടതും അവന്തികയുടെ മുഖത്ത് സങ്കടത്തിന്റെ നിഴൽ മാറി പതിയെ സന്തോഷം വന്ന് നിറഞ്ഞു .

……………………………………………

അങ്ങനെ ചില ദിവസങ്ങൾ കടന്നുപോയി ……..
അവന്തികയുടെ മനസ്സ് പൂർണ്ണമായും ആദിത്യനെ കുറിച്ചുള്ള ചിന്തകൾ കൊണ്ട് നിറഞ്ഞു ഒപ്പം അവനെ വീണ്ടും കാണാനുള്ള ആകാംഷയും …………

……………………………………………

വനാസുര വംശജർ താമസിക്കുന്ന ആ കറുത്ത വനം ………

ആ വനത്തിന്റെ നടുക്കായി പ്രതിഷ്ഠിച്ചിരിക്കുന്ന ആ അസുര മൂർത്തിയുടെ (പൈശാചിക ശക്തി ) വിഗ്രഹത്തിനു മുന്നിൽ പൈശാചിക ശക്തികൾ ആർജിക്കുവാനുള്ള വലിയ ഹോമം നടക്കുന്നു .രാത്രിയുടെ ഇരുട്ടിനെ ഭേദിച്ചു കൊണ്ട് ഹോമകുണ്ഡത്തിലെ തീയുടെ പ്രകാശം അവിടെ മുഴുവൻ വ്യാപിച്ചിരിക്കുന്നു . ആ നീച കർമ്മങ്ങൾക്ക് നേതൃത്വം കൊടുക്കുന്ന കാലാസുരൻ തന്റെ ഉള്ളം കയ്യിൽ കത്തികൊണ്ട് കീറി മുറിവുണ്ടാക്കിയ ശേഷം മുറിവിലൂടെ പുറത്തേയ്ക്ക് വന്ന രക്തം ഹോമകുണ്ഡത്തിലേയ്ക്ക് ഇറ്റിച്ചു .

മുറിവിലൂടെ ബാക്കി വന്ന രക്തത്തെ തന്റെ മുൻപിൽ നിന്ന വനാസുരവംശത്തിൽപ്പെട്ട അഞ്ച് പോരാളികളുടെ വായിലേക്ക് മാറി മാറി ഇറ്റിച്ചു കൊടുത്തു . കാലാസുരന്റെ ചുടുരക്തം കുടിച്ച ആ അഞ്ച് പേരുടെയും കണ്ണുകൾ പെട്ടെന്ന് രക്തവർണ്ണമായി മാറി . ശരീരം മുഴുവൻ വലിഞ്ഞ് മുറുകി …. എന്തെന്നില്ലാത്ത ഒരു ശക്തി അവരുടെ ശരീരത്തിൽ വന്ന് നിറഞ്ഞു …….