💘 അരികത്തായാരോ -6💘 വിച്ചു [ ചെകുത്താനെ സ്നേഹിച്ച മാലാഖ ] 1454

                           …………………………

“എന്തായാലും അവസാനം പ്രശ്നങ്ങളൊക്കെ ഒരു വിധം തീർന്നല്ലോ സമാധാനം . അഹാനയുടെ അച്ഛൻ ഇടപെട്ടതും നീ തുടർന്നും ഇവിടെ തന്നെ പഠിക്കും എന്നൊക്കെ അറിഞ്ഞപ്പൊ നാൻസി മിസ്സും ഹാപ്പിയായി , ആ പ്രിൻസിയുടെ അഹങ്കാരത്തിനിട്ട് തന്നെയാ അഹാനയുടെ അച്ഛൻ കണക്കിന് കൊടുത്തത് , ശ്ശൊ എനിക്കത് നേരിട്ട് കാണാൻ പറ്റിയില്ലല്ലോ എന്ന വിഷമം മാത്രമേ ഉള്ളൂ … മാത്രമല്ല അഹാന നിന്നോട് എല്ലാ തെറ്റിനും സോറിയും പറഞ്ഞല്ലോ …

എന്താടാ ….. ? കണ്ണും തുറന്ന് വച്ച് സ്വപ്നം കാണുവാണോ ? കോളേജിൽ വച്ചേ ഞാൻ നിന്നെ ശ്രദ്ധിക്കുവാ നിനക്കെന്തോ പറ്റിയിട്ടുണ്ട് , ടാ അജു … എന്താടാ നീ ആരെ സ്വപ്നം കാണുവാ ….”

കുളികഴിഞ്ഞ് ബാത്ത് റൂമിൽ നിന്ന് ഇറങ്ങി വന്ന യദു ചെയറിൽ എന്തോ ചിന്തയിൽ മുഴുകി ഇരിക്കുന്ന അജുവിനോട് ചോദിച്ചു … പക്ഷെ അജു അപ്പോഴും ഏതോ സ്വപ്നലോകത്താണ് , യദു പറഞ്ഞതൊന്നും അവൻ കേൾക്കാത്ത പോലെ . അത് കണ്ട യദു വേഗം തന്റെ കയ്യലിരുന്ന തോർത്ത് ചുരുട്ടി അജുവിന്റെ മുഖത്തിന് നേരെ വലിച്ചെറിഞ്ഞു ….

” എന്താടാ നിനക്ക് ….. ? ”

ചെറിയ ദേഷ്യത്തോടെ അജു അതും പറഞ്ഞ് മുഖത്തേയ്ക്ക് വീണ ആ തോർത്ത് എടുത്ത് മാറ്റി …

” അപ്പൊ ഞാൻ ഇത്രയും നേരം പറഞ്ഞത് അങ്ങുന്ന് കേട്ടില്ലായിരുന്നോ … നീ ആരെ സ്വപ്നം കണ്ടിരിക്കുവാ എന്ന് …. ? ”

യദു ശബ്ദമുയർത്തി ചോദിച്ചു …..

” അത് …. അവള് വന്ന് സോറി പറഞ്ഞില്ലേ അതിനെ കുറിച്ച് അലോചിക്കുവായിരുന്നു ….