💘 അരികത്തായാരോ -6💘 വിച്ചു [ ചെകുത്താനെ സ്നേഹിച്ച മാലാഖ ] 1454

” എന്നാ ഞാനിറങ്ങട്ടേ അങ്കിളേ …. ? ”

” താനവിടെ ഇരിക്കടോ …. എന്താ മോളേ അജുവിനെ ആദ്യമായിട്ട് കാണുന്നത് പോലെ നോക്കുന്നേ …. റൂമിലേയ്ക്ക് പോ , ബാഗൊക്കെ കൊണ്ട് വച്ച് ഫ്രഷാവ് ചെല്ല് …. ”

അയാളത് പറഞ്ഞതും അവൾ മറുപടിയൊന്നും പറയാതെ പടികൾ കയറി മുകളിലേയ്ക്ക് പോയി …

യദുവാകട്ടെ എന്താ കാര്യം എന്നൊക്കെ ആംഗ്യ രീതിയിൽ അജുവിനോട് ചോദിക്കുന്നുണ്ടായിരുന്നു …. അവൻ കണ്ണടച്ച് വെയിറ്റ് ചെയ്യാൻ യദുവിനോട് പറഞ്ഞു

” നിങ്ങള് വാ …. ”

സോഫയിൽ നിന്ന് എണീറ്റ് അവരോട് പറഞ്ഞ ശേഷം മഹേന്ദ്രനാഥും മുകളിലേയ്ക്കുള്ള പടികൾ കയറി , പുറകെ ഒന്നും മനസ്സിലാകാത്ത ഭാവത്തിൽ ദേവികയും ….

” എന്താടാ എന്താ പ്രശ്നം …. ? ”

യദു ഉടനെ അവനോട് ചോദിച്ചു ….

” നീ വാ ….. പറയാം …. ”

അജു അതും പറഞ്ഞ് അവരുടെ പുറകേ നടന്നു , എന്താണ് കാര്യമെന്ന ആകാംഷയിൽ യദുവും .

പടികൾ കയറി മുകളിലെത്തിയ അഹാന റൂമിന്റെ ഡോറ് തുറന്ന് അകത്ത് കയറി … അജു എന്താണ് ഇവിടെ എന്ന സംശയമായിരുന്നു അവളുടെ മനസ്സിൽ , അച്ഛന്റെ മുന്നിൽ വച്ച് ഒന്നും സംസാര വിഷയമാക്കണ്ട എന്ന് വിജാരിച്ചാണ് അവൾ ഒന്നും ചോദിക്കാതിരുന്നതും …

റൂമിന്റെ അകത്ത് കയറിയതും ചുമലിൽ കിടന്ന ബാഗ് ഊരി മാറ്റി അവൾ തൊട്ടടുത്ത ടേബിളിന്റെ പുറത്ത് ഇറക്കി വച്ചു . ശേഷം ഒന്ന് തിരിഞ്ഞതും മുന്നിലെ കാഴ്ച കണ്ട് അവൾ നിശ്ചലയായിപ്പോയി , തന്റെ മുറിയിലെ ചുവരിൽ പുതുതായി വരച്ചിരിക്കുന്ന ആ ചിത്രം കണ്ട് .