❤️ദേവൻ ❤️part 15 [Ijasahammed] 195

ആദ്യമായി തൊട്ടനേരം ഉണ്ടായഅതേ കുളിര് അപ്പോഴും ആ താലിമാലക്ക് ഉണ്ടായിരുന്നു….

തലതാഴ്ത്തി കൊണ്ട് ആ താലിമാലയിലേക്കൊന്ന് നോക്കി..
ഒടുവിൽ അത് എന്നിലേക്ക് ചാർത്തപ്പെട്ടിരിക്കുന്നു..
ഈ നിമിഷം മുതൽ ഞാൻ ദേവേട്ടന്റെ ഭാര്യയായി കഴിഞ്ഞിരിക്കുന്നു…
ഒരിക്കലും നടക്കാനിടയില്ലെന്ന് കരുതിനടന്ന കാര്യങ്ങൾ കണ്മുന്നിൽ സംഭവിക്കുന്നത് കണ്ട് ഞാൻ സ്വപ്നലോകത്തിലെന്ന പോലെ നിന്നു…
കണ്ണും മനസ്സും ഒരുപോലെ നിറഞ്ഞു…

പതിയെ ഞാനാ കൈവിരലുകളിൽ പതുക്കെ ഒന്ന് തൊട്ടു…

ആ വിരലുകൾ എന്നിൽ കോർത്തുപിടിച്ചു മുന്നോട്ടു നടക്കുന്ന ദേവേട്ടന്റെ കണ്ണിലും അതേ തിളക്കം ഞാൻ കണ്ടു..

ആ അമ്പലനടയിൽനിന്നും അത്രമേൽ പ്രിയപ്പെട്ടവന്റെ കരം പിടിച്ചുകൊണ്ട് ഒരായിരം പ്രാർത്ഥനകളോടെ
പുതിയൊരു ജീവിതത്തിലേക്ക് ഒരുമിച്ചു നടന്നു….

അപ്പോഴും ആ താലിമാല നെഞ്ചിലേക്ക് കുളിരുപകരുന്നുണ്ടെന്ന് തോന്നി….

“മഴപെയ്യാൻ തൊടങ്ങ്ന്ന്ണ്ട്.. വേഗം നടന്നോളൂ… ”

ചടങ്ങുകൾ തീർക്കുന്നതിനിടയിൽ അമ്മ പറഞ്ഞത് കേട്ട് ഞാൻ തലയുയർത്തി നോക്കി…
മാനം കൂടുതൽ കരുത്തിരുന്നു.. അവ പെയ്യാൻ വെമ്പൽ കൊണ്ട് നിൽക്കുകയാണ്..

ചടങ്ങുകളെല്ലാം പൂർത്തിയാക്കി ഒടുവിൽ അമ്മക്കരികിലേക്കായി നടന്നു..

“പൂവ്വായി ല്ലേ..? !!””
നെറുകിൽ തൊട്ട സിന്ദൂരത്തിനടുത്തായി അമർത്തിചുംബിച്ചു കൊണ്ട് അമ്മ പറഞ്ഞത് കേട്ട് ഞാനാകരങ്ങൾ മൃദുവായിപിടിച്ചു പുഞ്ചിരിച്ചു…

“ദീർഘായുസ്സ് ണ്ടാവട്ടെ ന്റെ കുട്ട്യോൾക്ക്.. എടെക്ക് വരണം രണ്ടാളും വീട്ടിലോട്ട്.. ”

പെയ്യാൻ വെമ്പിനിൽക്കുന്ന ആകാശം കണക്കെ എന്തിനെയോ പിടിച്ചു നിർത്തികൊണ്ട് പറഞ്ഞ ആ വാക്കുകൾ കേട്ടതും ഞാനമ്മയെ ഇറുക്കെകെട്ടിപിടിച്ചു …

“അമ്മക്കും പൊന്നൂടെ.. എന്തിനാ അവടെ ഒറ്റക്ക്… !!””
ഒട്ടും പ്രതീക്ഷിക്കാതെ ദേവേട്ടൻ പറഞ്ഞത് കേട്ട് ഞാനാമുഖത്തേക്ക് നോക്കി…