❤️ദേവൻ ❤️part 15 [Ijasahammed] 195

തൊട്ടടുത്ത അമ്പലത്തിൽ ആയത് കൊണ്ട് അമ്മക്ക് അധികം ബുദ്ധിമുട്ടാതെ എത്താൻ കഴിഞ്ഞു…

അവിടെ എത്തിയപ്പോഴേക്കും ദേവേട്ടൻ എത്തിയിട്ടുണ്ടായിരുന്നു..

അമ്മയോടായി ഒന്ന് ചിരിച്ചു എന്നെ ഒറ്റ നോട്ടം നോക്കി കൊണ്ട് വിളിക്കിന് മുന്നിലായി അങ്ങനെ നിൽക്കുന്ന ദേവേട്ടനെ ഞാൻ നോക്കി…

വേഷത്തിലൊന്നും ഒരു ഭാവഭേദവുമുണ്ടായിരുന്നില്ല….

പതിവ് ധരിക്കുന്ന തരത്തിലുള്ള ഒരു ഷർട്ടും ചുകപ്പ് കരയുള്ള ഒരു മുണ്ടും..

ഒരു കുറി പോലും ആ നെറ്റിതടത്തിൽ ഉണ്ടായിരുന്നില്ല…
കണ്ണിലാ പതിവ് കറുപ്പ് കെട്ടി നിന്നിരുന്നു…

ഒന്നും വ്യത്യസ്തമല്ല..
താടിപോലും ഒന്ന് വൃത്തിയാക്കിയിട്ടില്ല…

മനസ്സിലൊരു നോവ് പടർന്നെങ്കിലും കാര്യമാക്കിയില്ല…

സങ്കടപ്പെടാൻ പറ്റിയ നേരമല്ല ഇത്…

അത്രമേൽ ആഗ്രഹിച്ച സ്വപ്നം കണ്ട ഒരു നിമിഷമാണ് കണ്മുന്നിൽ…
കയ്യിൽ താലിചരടുമായി നിൽക്കുന്ന ദേവേട്ടനെ ഞാൻ ഇമവെട്ടാതെ നോക്കി കൊണ്ട് നിന്നു…

ആ താലിമാലയിലെ ശങ്ക് മുദ്ര എന്റെ നോട്ടങ്ങളെ ആകർഷിച്ചു….

അടുത്തു നിന്ന് ദേവേട്ടനോട് എന്തെക്കെയോ ആരെക്കെയോ സംസാരിക്കുന്നുണ്ടായിരുന്നു…

അതൊന്നും ശ്രദ്ധിക്കാതെ കണ്ണുകൾ മുഴുവൻമുന്നിൽദേവേട്ടന്റെ കയ്യിലിരുന്ന് ആടി കൊണ്ടിരുന്ന ആ താലിമാലക്ക് ചുറ്റും തത്തിനടന്നു കൊണ്ടിരുന്നു..

മേഘം ഇരുണ്ടു തുടങ്ങിയിരുന്നു…
തണുത്തകാറ്റ് അനുഗ്രഹവുമായി എന്നെ തൊട്ട് തലോടി ആ താലിമാലയിൽ ചുംബിച്ചു കൊണ്ട് കടന്നു പോയത് ഞാൻ അറിഞ്ഞു…

ഒടുവിൽ നെഞ്ചിലേക്കായി ആ താലിമാല വന്നു പതിഞ്ഞപ്പോൾ കണ്ണിറുക്കി കൈകൂപ്പി പ്രാർത്ഥിച്ചു…

എല്ലാ ദൈവങ്ങളെയും മനസ്സുരുകി നിശബ്ദമായി സ്മരിച്ചു…

മരിക്കുവോളം നെഞ്ചില് ണ്ടാകണം ഈ താലിമാല…

താലിചാർത്തികഴിഞ്ഞ് എന്നെ നോക്കുന്ന ദേവേട്ടനെ നോക്കി ഞാനാമാലമേൽ വിരലമർത്തി നിന്നു…..

സന്തോഷം കൊണ്ടാണോ അതോ ഒരിക്കലും നടക്കില്ലെന്നു കരുതിയ സ്വപ്നം ഒടുവിൽ സാക്ഷാൽകരിച്ചത് കൊണ്ടാണോ അറിയില്ല എന്റെ കണ്ണുകൾ നിറഞ്ഞു വന്നു …