രുധിരാഖ്യം -6 325

മുള്ളു പോലെയുള്ള ഒന്നിനെ ഒടിച്ചെടുത്തു.

പതിയെ ആ മുള്ള് കിരീടത്തിലെ കുഴിയിൽ ഉറപ്പിച്ച രത്നത്തിന് അരികിലേക്ക് കയറ്റിയ ഇന്ദു ആഞ്ഞൊന്ന് തിരിച്ചു.

“ആആആആആ…….. ”

ഒരു അലറിക്കരച്ചിലോടെ മാവിക പിടഞ്ഞതിനൊപ്പം അവിടെ ബാക്കിയുണ്ടായിരുന്ന രത്നത്തിന്റെ മുക്കാൽഭാഗവും പൊട്ടിചിതറി. ഒരു വലുപ്പം കുറഞ്ഞ ചെറിയ കഷണം മാത്രം അവിടെ തന്നെ അവശേഷിച്ചു.

**************

അതേസമയം കളപ്പുരയിൽ ധ്യാനത്തിൽ ആയിരുന്ന ഏഥൻ ശക്തമായ ഒരു അടിയേറ്റ് എന്നവണ്ണം തെറിച്ച് മുറ്റത്തേക്ക് വീണു!!.
അവന്റെ മുന്നിലിരുന്ന ഗിരീഷും, ഏഥൻ പുറത്തേക്ക് തെറിച്ചു വീഴുന്നത് കണ്ടു  പുറത്തേക്ക് ചാടി.

“ഓഹ്….. ഭഗവാനേ…!!!!”

കമിഴ്ന്നു കിടന്നിരുന്ന ഏഥനെ പിടിച്ച് നിവർത്തി കിടത്തിയ ഗിരീഷ് ഞെട്ടി നിലവിളിച്ചുകൊണ്ട് കൈ പിൻവലിച്ചു പിന്നിലേക്ക് ചാടി.

ഏഥന്റെ മുഖത്തിന്റെ വലതു വശം പൊള്ളി കറുത്ത്‌ തൊലി അടർന്നു  പോയിരുന്നു. അവന്റെ പുരികവും കൺപീലികളും കൂടി കരിഞ്ഞു പോയിരുന്നു.  പലയിടങ്ങളിലും രക്തവും വെള്ളവും കൂടി പുറത്തേക്ക് ഒലിച്ചു വരുന്നുണ്ടായിരുന്നു.

“ഇന്ദു… അവൾ…. അവൾ ഞാൻ പറഞ്ഞത് അനുസരിച്ചില്ല….”

ഞരങ്ങിക്കൊണ്ട് ഏഥൻ അവ്യക്തമായി ഗിരീഷിനോട് പറഞ്ഞു.

എന്ത് ചെയ്യണമെന്നറിയാതെ അൽപനേരം പകച്ചുനിന്ന ഗിരീഷ് അവനെ പതിയെ താങ്ങിപ്പിടിച്ച് അകത്തേക്ക് കയറ്റി ഇരുത്തി. കടുത്ത നീറ്റലിൽ അവന്റെ കണ്ണുകൾ നിറയുന്നത് കണ്ട ഗിരീഷ്, ഏഥനെ അവിടെ ഇരുത്തിയശേഷം വേഗം വയലിന് അക്കരെയുള്ള പറമ്പിലേക്ക് ഓടി.