രുധിരാഖ്യം -6 323

പൊടുന്നനെ മണ്ണിൽ കാലുറപ്പിച്ച് നിന്ന അവളൊരു പുഞ്ചിരിയോട് കൂടിത്തന്നെ വെട്ടിത്തിരിഞ്ഞു.

പമ്പരം പോലെ അവളുടെ കയ്യിൽ കിടന്നു കറങ്ങിയ ആയുധം, അവളുടെ നേർക്ക് ചാടിവീണ മൃഗങ്ങളിൽ ഒന്നിനെ അന്തരീക്ഷത്തിൽ വച്ചുതന്നെ ചിന്നഭിന്നം ആക്കി കളഞ്ഞു.

നിമിഷനേരം കൊണ്ട് അവൾ ചുടു ചോരയിൽ കുളിച്ചു. അത് കണ്ടു ഒന്ന് പരുങ്ങിയ മറ്റു മൃഗങ്ങൾ ചീറിക്കൊണ്ട് അവൾക്ക് ചുറ്റും വട്ടം കൂടി.

പഴയതുപോലെതന്നെ കയ്യിൽ ആയുധം ഇട്ട് വട്ടംകറക്കി കൊണ്ട് അവൾ അത് മണ്ണിലേക്ക്  അടുപ്പിച്ചു. അങ്ങനെ തന്നെ അവളൊന്നു വട്ടം കറങ്ങിയതോടെ ചുറ്റും കൂടി നിന്ന മൃഗങ്ങളുടെയെല്ലാം കണ്ണിൽ പൊടി ചിതറിക്കയറി. അവയൊക്കെയും ഒരു നിമിഷത്തേക്ക് കണ്ണുകൾ ഇറുക്കിയടച്ചു.

ആ ഒരു നിമിഷം ധാരാളമായിരുന്നു ഇന്ദുവിന്. ഒന്ന് മലക്കം മറിഞ്ഞ് അവൾ അവയ്ക്ക് പിന്നിലെത്തി. ആയുധം അല്പം ചരിച്ചു പിടിച്ച് വീശിയുള്ള അടിയിൽ അവൾക്ക് തൊട്ടു മുന്നിൽ നിന്ന് രണ്ടെണ്ണത്തിന്റെ നട്ടെല്ലൊടിഞ്ഞ് ചിതറി.
കൈകാലുകൾ അനക്കാൻ പോലുമാകാതെ അവരണ്ടും ആ പൊടിയിൽ തലയിട്ടുരുട്ടി.

പൊടിയൊന്ന് ഒതുങ്ങിയ സമയംകൊണ്ട് ബാക്കിയുള്ളവ അവൾക്ക് നേരെ മിന്നൽപോലെ അടുത്തു. തന്റെ വലതുവശത്തേക്ക് കയറിവന്ന ഒന്നിനെ അവൾ തന്റെ ആയുധത്തിൽ കോർത്ത് വലിച്ചെറിഞ്ഞ സമയംകൊണ്ട് ഇടതുവശത്തുകൂടി വന്ന മൃഗങ്ങളിൽ ഒന്ന് അവളുടെ ഇടതുകൈയിൽ കടിച്ചു പിടിച്ചു.