രുധിരാഖ്യം -6 325

എന്തുകൊണ്ടോ അവളുടെ വലതു കണ്ണ് നിറഞ്ഞൊഴുകിയ കണ്ണുനീർ ആ മെത്തയെ നനച്ചപ്പോൾ, ഇടതു കണ്ണിൽ എല്ലാം ചുട്ടെരിക്കാൻ ഉള്ള പക ഒരു തീക്കനൽ പോലെ നീറിക്കൊണ്ടിരുന്നു.

വീണ്ടും അവന്റെ ഗന്ധം കിട്ടാൻ എന്നവണ്ണം അവൾ,അവൻ തല വച്ച തലയിണയിൽ മുഖം അമർത്തി ഉരച്ചു!!!.

ചുറ്റുമുള്ള പറമ്പിലേക്ക് എല്ലാം ഓടിനടന്ന വെളിച്ചം ഒടുവിൽ അവർക്ക് അടുത്തെത്തി. അപ്പോഴേക്കും എന്തോ ഓർത്തത് പോലെ ഇന്ദു വേഗം വെള്ളത്തിലേക്കിറങ്ങി തന്റെ ദേഹത്ത് അവിടെവിടെയായി പറ്റിപ്പിടിച്ചിരുന്ന ചോരത്തുള്ളികൾ കഴുകി മാറ്റി.

“ഇന്ദു…. നീയ്യ് എന്തെടുക്കുവാ അവിടെ…..???നിങ്ങൾ എങ്ങനെയാ നനഞ്ഞത്,.???
യ്യോ…..ടീ നിന്റെ ബ്ലൗസ് എങ്ങനാ കീറിയേ…??”

ടോർച്ചും തെളിച്ച് അവർക്കരികിലേക്ക് എത്തിയ ഗൗരി, തോട്ടിൽ നിന്നും നനഞ്ഞു കുളിച്ചു കയറിവന്ന ഇരുവരെയും ഒരു പകപ്പിൽ  മാറി മാറി നോക്കി.

” എങ്ങനാ കീറിയേന്ന്….. നീ എന്നെക്കൊണ്ടൊന്നും  പറയിക്കല്ലേ….. ഇത്രയും പ്രായമായിട്ടും നിന്റെ ഏട്ടൻ നടക്കാൻ പഠിച്ചിട്ടില്ല…. ആ കണ്ടത്തിന്റെ വരമ്പിൽ കൂടി നടന്നപ്പോൾ വേച്ചു പോയിട്ട് കയറിപ്പിടിച്ചത് എന്റെ തോളിൽ…. ഏട്ടന്റെ കൂടെ ഞാനും വീണു എന്റെ ബ്ലൗസും കീറി…. ദേ ഏട്ടാ…..മര്യാദയ്ക്ക് എനിക്ക് നാളെ തന്നെ വേറെ ബ്ലൗസ് മേടിച്ചു തന്നേക്കണം…. എന്റെ പുതിയ ബ്ലൗസാ വലിച്ച് കീറിയത്….. ”

ഗൗരിയോട് പറഞ്ഞിട്ട് അവൾ കപട ദേഷ്യത്തോടെ ഗിരീഷിനെ നോക്കി പല്ലിറുമ്മി.

” ഒരു അബദ്ധം പറ്റിയതിന് ഇങ്ങനെ കിടന്ന് ചൂടാകാൻ ഉണ്ടോ….?? നിന്നോട് ഞാൻ പറഞ്ഞോ ഇപ്പൊ എന്നെ തേടി വരാൻ….?? ”

ഗിരീഷും സാഹചര്യത്തിന് ഉയർന്നു കൊണ്ട് അവൾക്ക് മറുപടി കൊടുത്തു.