രുധിരാഖ്യം -6 325

തന്റെ കയ്യിൽ മുറുകെ പിടിച്ചിരിക്കുന്ന അവന്റെ വിറയ്ക്കുന്ന കൈകൾ വിടുവിച്ച ശേഷം മാവിക കളപ്പുരയിലേക്കുള്ള വഴിയിലൂടെ മുന്നോട്ടേക്ക് നടന്നു.

പിന്തിരിഞ്ഞു നടക്കുന്ന അവളെ ഒന്ന് നോക്കിയ ഗിരീഷ് വേഗം ഇന്ദുവിനരികിലേക്ക് പാഞ്ഞു.

**************

നദിയിലെ ജലത്തിൽ ഉണ്ടായ ഇളക്കവും അതിനുമുകളിൽ തെളിഞ്ഞ രണ്ടു പച്ച കണ്ണുകളും പതിയെ ഏഥന്റെ അടുത്തേക്ക് നീങ്ങി.

പതിയെ മങ്ങിയ ഒരു വെളിച്ചം പടർന്നതോടെ  പടർന്നുപന്തലിച്ച രണ്ടു കൊമ്പുകളും, അതിനു താഴെ രണ്ട് പച്ച കണ്ണുകളും ആണ് ഏഥന്റെ കണ്ണിൽ ആദ്യം പെട്ടത്.  ഒരു കാട്ടുകുതിരയെക്കാൾ  വലിപ്പമേറിയ ഒരു കലമാൻ..!!!!

അത് അവനെ നോക്കി ഒന്ന് ചീറ്റി കൊണ്ട് തലകുലുക്കി. കിടന്നകിടപ്പിൽ തന്നെ ഒന്ന് പിറകോട്ടു വലിഞ്ഞ് അവൻ അടുത്ത് കണ്ട മരത്തിലേക്ക് ചാരിയിരുന്നു.

തലതാഴ്ത്തി കൊമ്പുകൾ തന്റെ നേരെയാക്കി അടുത്ത കലമാനിനെ കണ്ട ഏഥൻ, തന്നെ അത് അതിന്റെ വലിയ കൊമ്പുകളിൽ കോർക്കും എന്ന് തോന്നിയതോടെ  കണ്ണുകൾ ഇറുക്കിയടച്ചു.

കുറച്ചു നേരം കഴിഞ്ഞിട്ടും അനക്കമൊന്നും ഇല്ലാതായതോടെ പതിയെ കണ്ണുകൾ തുറന്ന ഏഥന്റെ മുൻപിൽ, തലതാഴ്ത്തി കൊമ്പുകൾ അവന് നേരെ നീട്ടിക്കൊണ്ട് അതുപോലെ തന്നെ നിൽപ്പുണ്ടായിരുന്നു ആ മൃഗം..!!

വീണ്ടും കുറച്ചു നേരം കൂടി കഴിഞ്ഞെങ്കിലും അത് അനങ്ങുന്നില്ല എന്ന് കണ്ട ഏഥൻ പതിയെ കൈനീട്ടി അതിന്റെ കൊമ്പിൽ ഒന്ന് തൊട്ടതോടെ തന്റെ തിളങ്ങുന്ന പച്ച കണ്ണുകൾ ചിമ്മി അതൊന്ന് അവനെ നോക്കി.

അത് ഉപദ്രവിക്കില്ല എന്ന് തോന്നിയതോടെ അവൻ അതിന്റെ കൊമ്പിൽ  മുറുകെ പിടിച്ചുകൊണ്ട് എഴുന്നേൽക്കാൻ ശ്രമിച്ചു.