മെർവിൻ 4 (Dead, but lives in another body) [Vickey wick] 99

അവൻ തിരിഞ്ഞു നോക്കിയപ്പോൾ ഒരുകുട്ടി റോഡിൽ കമ്പിയഴികളിൽ പിടിച്ചു നിന്ന് അവനെ തന്നെ തുറിച്ചു നോക്കുകയാണ്. പെട്ടെന്ന് ആ കുട്ടിയുടെ അമ്മ അവനെ തോളിൽ കൈവെച്ചു കൂട്ടികൊണ്ട് പോകാൻ തുനിഞ്ഞു. ഒരു ഐസ്ക്രീംമും അവനു നൽകി. അവൻ അമ്മ ഐസ്ക്രീം വാങ്ങാൻ പോയപ്പോൾ അവിടെ നിന്നതാക്കണം. പോകാൻ സമയം ആ സ്ത്രീ ഏദനെ വിചിത്രമായി ഒന്ന് നോക്കി.

പെട്ടെന്ന് ബെല്ലടിക്കുന്ന ശബ്ദം. ഏദൻ ക്ലാസിലേക്ക് ഓടി. വൈകുന്നേരം ക്ലാസുകഴിഞ്ഞ് വീണ്ടും തിരിച്ചു ബസിൽ വീട്ടിലേക്ക് യാത്ര. പഴയ പാട്ടും ബഹളവും. അൽപ്പദൂരം എത്തിയപ്പോൾ മൂടൽ മഞ്ഞ് പരന്നു തുടങ്ങി. വൈകുന്നേരം ഈ സമയത്ത് പതിവില്ലാത്തതാണ്. ഒരു 5 മണിയെങ്കിലും കഴിയണം ഈ അളവിൽ മഞ്ഞിറങ്ങാൻ. പെട്ടെന്ന് ഒരു ശബ്ദം കേട്ടു എല്ലാവരും ഭയന്ന് പോയി. ബസ് അൽപ്പം ഒന്ന് പാളിയെങ്കിലും ഡ്രൈവറിന്റെ കൺട്രോളിൽ നിന്നു പോയില്ല. ടയർ പൊട്ടിയതാണ്.

കുട്ടികൾ എല്ലാവരും തന്നെ പുറത്തിറങ്ങി. എല്ലാവരും ഓരോ കുസൃതിത്തരങ്ങൾ കാട്ടി നടന്നു. ഏദൻ പതിയെ റോഡിന്റെ ഇരുവശവും കണ്ണോടിച്ചു. ഇരുവശവും മേപ്പിൾ മരങ്ങളാണ്. ചുവപ്പും ഓറഞ്ചും മഞ്ഞയും നിറങ്ങൾ ഇടകലർന്നു അങ്ങനെ നീണ്ടു കിടക്കുന്നു. അങ്ങനെ കണ്ണോടിച്ചപ്പോൾ അവനു മരങ്ങൾക്കു ഇടയിൽ എന്തോ ആടുന്നതായി തോന്നി.

മഞ്ഞിനുള്ളിൽ ആയതിനാൽ വ്യക്തമല്ല. പതിയെ അവനു മനസിലായി അതൊരു ഊഞ്ഞാൽ ആണെന്ന്. അതിൽ ഒരു ആൺകുട്ടി ഇരുന്ന് ആടുന്നു. അങ്ങനെ നോക്കി നിൽക്കെ മഞ്ഞുവീണ്ടും ആ കാഴ്ച മറച്ചു. ഏദൻ അവിടേക്കു തന്നെ നോക്കി പതിയെ അങ്ങോട്ട് നടന്നു. മഞ്ഞു വീണ്ടും ഒഴുകി നീങ്ങിയപ്പോൾ അവ്യക്തമായി അവൻ കണ്ടു. ഊഞ്ഞാൽ മാത്രം വെറുതെ ആടുകയാണ്. അതിൽ ആരുമില്ല. അവൻ പെട്ടെന്ന് നടത്തം നിർത്തി.

ഏദൻ നോട്ടം പിൻവലിച്ചു വലത്തേക്ക് തിരിഞ്ഞു. ഞെട്ടിപ്പോയി. ആ കുട്ടിയതാ അവന്റെ വലതുവശത്തു തൊട്ടു തൊട്ടില്ല എന്ന മട്ടിൽ നിൽക്കുന്നു. പെട്ടെന്ന് ഉണ്ടായ ഞെട്ടലിൽ അവൻ വേച്ചു വേച്ചു പുറകിലേക്കി വീണു. എല്ലാ കുട്ടികളും ഭയങ്കര ചിരി. അതിനു ശേഷം അവർ അവരുടെ ലോകത്തേക്ക് നീങ്ങി. ആ കുട്ടി പതിയെ നടന്നു അവന്റെയടുത്തെത്തി. അപ്പോഴാണ് ഏദൻ ശ്രദ്ധിച്ചത് താൻ രാവിലെ കണ്ട അതെ കുട്ടി. അവൻ വലതുകൈ ഏദന് നേരെ നീട്ടിയിട്ട് പറഞ്ഞു.