മെർവിൻ 4 (Dead, but lives in another body) [Vickey wick] 99

അടുത്തനിമിഷം ആ അദൃശ്യ ശക്തി ലോണയെ നിലത്തുകൂടി അതിവേഗം ആ കയ്യുടെ നേരെ വലിച്ചടുപ്പിച്ചു. കരിയിലകൾ നിലത്തുനിന്നും ചിതറിതെറിച്ചു. ജെനി കണ്ടു, അടുത്തെത്തിയതും ആ വിളറി വെളുത്ത കൈ ലോണയുടെ വയറ്റത്തുപിടിച്ചു ആ ചെറുതും നുഴഞ്ഞുകയറാൻ മാത്രം വലുപ്പമുള്ളതുമായ പൊത്തിലേക്കു വലിയുന്ന കാഴ്ച. ലോണയുടെ വയറ്റത്തു പിടുത്തമിട്ടതിനാൽ പൊത്തിനുള്ളിലേക്ക് കയറാതെ പുറത്ത് ഉടക്കി നിന്നു.

ജെനിക്ക് വേഗം ബോധം തിരിച്ചു കിട്ടി അവൾ ഓടിച്ചെന്നു ലോണയുടെ കൈയിൽ പിടിച്ചു വലിച്ചു പുറത്തേക്കെടുക്കാൻ ശ്രമിച്ചു. എന്നാൽ ഫലമുണ്ടായില്ല. മറുഭാഗത്തെ പിടുത്തം അത്ര ശക്തമായിരുന്നു. എല്ലുകൾ ഒടിഞ്ഞു മടങ്ങുന്ന വേദനകൊണ്ട് അവൾ അലറികരഞ്ഞു. ജെനി കൈയിൽ നിന്നും വിട്ട് കാലിൽ പിടിച്ചു വലിച്ചു. എന്നാൽ അകത്തേക്കുള്ള വലി വീണ്ടും ശക്തമായി. അടുത്ത നിമിഷം ലോണ പൊത്തിനുള്ളിലെ ഇരുട്ടിലേക്കു വലിച്ചെടുക്കപ്പെട്ടു. ജെനിയുടെ കൈയിൽ അവളുടെ ഒരു ചെരുപ്പ് മാത്രം ബാക്കിയായി.

ജെനി ആ ചെരുപ്പ് മുഖത്തോട് ചേർത്ത് കരഞ്ഞു. തനിക്കൊരു അവസരം ലഭിച്ചിട്ടും ഒന്നും ചെയ്യാനാകാത്തത് അവളെ കുത്തി നോവിച്ചു കൊണ്ടിരുന്നു. പെട്ടെന്ന് തന്റെ തലക്കുമുകളിൽ ഉള്ള പൊന്തയിൽ നിന്നും ഒരു മുരളിച്ച അവൾ കേട്ടു. കേട്ടപ്പോൾ തന്നെ അവൾ ആ ശബ്ദം തിരിച്ചറിഞ്ഞു.

അവൾ പതിയെ തലയുയർത്തി. ആ ചെന്നായ പല്ലിളിച്ചു കൊണ്ട് അവളെ നോക്കുകയാണ്. ലോണയുടെ കൈവശമുണ്ടായിരുന്ന തോക്ക് എവിടേക്കെങ്കിലും തെറിച്ചു പോയിട്ട് ഉണ്ടാകാം. ഇല്ലെങ്കിൽ അതും കൂടി പൊത്തിനുള്ളിലേക്ക് പോയിട്ട് ഉണ്ടാകും. തോക്ക് തിരയാൻ പോയിട്ട് ചിന്തിക്കാനോ അനങ്ങാനോ ഉള്ള സമയമോ സാഹചര്യമോ പോലും ഇല്ല.

ജെനിക്ക് വേഗം ഒരു ബുദ്ധി തോന്നി. ഒരു പരീക്ഷണമെന്നോണം, അവൾ തന്റെ കയ്യിലിരുന്ന ചെരുപ്പ് ഇരുവശത്തേക്കും ചലിപ്പിച്ചു. വീണ്ടും പല രീതിയിൽ അനക്കി ചെന്നായയുടെ ശ്രദ്ധയാകർഷിച്ച ശേഷം ദൂരേക്ക് വലിച്ചെറിഞ്ഞു.

അവളുടെ ഭാഗ്യമെന്നോണം അത് ഫലിച്ചു. ചെന്നായ അതെടുക്കുവാൻ ഓടി. എന്നാൽ രണ്ടു മൂന്നു തവണ കടിച്ചു പറിച്ചിട്ട് അത് തിരികെയെത്തുമെന്നു അവൾക്കറിയാം. അവൾ വേഗം തോക്ക് തിരഞ്ഞു കാണാനില്ല പിന്നെ ഒന്നും ചിന്തിച്ചില്ല. തിരിഞ്ഞു നോക്കാതെ ഓടി.

ശബ്ദം കേട്ട ചെന്നായയും പിന്നാലെ ഓടി. അവൾ തടസ്സങ്ങൾ എല്ലാം ചാടിക്കടന്നു ഓടിക്കൊണ്ടിരുന്നു. ഒടുവിൽ വീടെത്താറായി. പൈൻ മരക്കാടിന്റെ അവസാന ഭാഗമായി. അവളുടെ മുഖത്ത് ചെറിയ ചിരി വിടർന്നു.