മെർവിൻ 4 (Dead, but lives in another body) [Vickey wick] 99

“അവിടെ… പുറത്ത്…”

 

 

“പുറത്തെന്താ?”

 

ഇതും ചോദിച്ചു ഹോർഡ് ഒരു ടോർച്ച് എടുത്ത് അടിച്ചു നോക്കി. എന്നാൽ ഒന്നും തന്നെ കണ്ടില്ല. ഹോർഡ് അവളെ സമാധാനപെടുത്തി വീണ്ടും ചോദിച്ചു.

 

 

“കൂൾ ഡൗൺ മോളെ ലോണ, മോൾ ശരിക്കും എന്താ കണ്ടത് അവിടെ…? ”

 

 

“അവിടെ… അവിടെ… ഏദൻ… ”

 

 

എല്ലാവരും അത്ഭുതപെട്ട് പോയി. ലിന്റ ഒരു ചെറിയ കളിയാക്കിചിരിയോടെ ചോദിച്ചു.

 

 

“ഏദൻ ഈ പാതിരാത്രി അവിടെ ഊഞ്ഞാലാടാൻ വന്നിരുന്നെന്നോ? നിനക്ക് എന്താ പറ്റിയെ? ”

 

 

“മിണ്ടരുത്, നീ രാത്രി ഉറങ്ങാൻ നേരത്ത് അവളെ ഓരോ കഥ പറഞ്ഞത് പേടിപ്പിച്ചിട്ട്… ”

 

 

ലെന അവളെ ശകാരിച്ചു.

 

 

“നി എന്തിനാ അതിനു ഇത്രേം പേടിക്കുന്നത്. ഏദൻ നിങ്ങളുടെ ചേട്ടനല്ലേ? ”

 

 

ഹോർഡ് ചോദിച്ചു.

 

 

“ഏദൻ… അത്… വല്ലാത്തൊരു രൂപത്തിൽ ആയിരുന്നു. കണ്ണു മൂടും വരെ മുടിയുമൊക്കെയായി… അൽപ്പം കഴിഞ്ഞ് എന്നെ നോക്കിയപ്പോൾ… ഏദൻറെ കണ്ണിൽ കൃഷ്ണമണിയും ഉണ്ടായിരുന്നില്ല.”

 

 

അവൾ ഒരു വിധം പറഞ്ഞൊപ്പിച്ചു. കരഞ്ഞുകൊണ്ട് തന്നെയാണ് ഇപ്പോഴും സംസാരിക്കുന്നത്.

 

 

“എന്തൊരു മണ്ടത്തരമാണ് ഇവൾ ഈ പറയുന്നത്? ”

 

 

ലിന്റ വീണ്ടും പരിഹസിച്ചു.

 

 

ലെന ലിന്റയെ ഒന്ന് കടുപ്പിച്ചു നോക്കി. എന്നിട്ട് ലോണയോടു പറഞ്ഞു.

 

“പേടിക്കണ്ടാട്ടൊ, ഞാനും മോൾടെ കൂടെ കിടക്കാം. ”

 

 

അങ്ങനെ അവർ വീണ്ടും കിടന്നു ലോണ ചെറുതായി വിറക്കുന്നുണ്ട്. അൽപ്പം കഴിഞ്ഞപ്പോൾ വീണ്ടും ഊഞ്ഞാൽ ആടുന്ന ശബ്ദം ലോണയുടെ കാതുകളെ തേടിയെത്തി. അവൾ ലെനയെ ഇറുക്കി കെട്ടിപ്പിടിച്ച് കിടന്നുറങ്ങി.

 

 

പിറ്റേന്ന് രാവിലെ തന്നെ കിളികൾ ഉണർന്നു കലപില കൂട്ട. കൂവാൻ കോഴിക്കൾ ഇല്ലാത്ത കാട്ടിൽ നേരം വെളുപ്പിക്കുന്നത് അവരായിരുന്നു. ഏദൻ താമസിച്ചാണ് ഉണർന്നത്. താഴെ ജെനിയും ലിന്റയും ലോണയും എന്തോ കളികളിൽ ഏർപ്പെട്ടിരിക്കുന്നു. ഏദൻ തന്റെ മുകളിലെ ബെഡ്‌റൂമിൽ നിന്നും താഴേക്കു ഇറങ്ങി വന്നു.

 

അവൻ കുട്ടികൾ കളിച്ചുകൊണ്ടിരുന്നിടത്തേക്ക് ചെന്നു. എല്ലാരും ഏദൻറെ നേരെ നോക്കി. അവൻ ചെറുതായി ഒന്ന് ചിരിച്ചു. ലിന്റയും ലെനയും തിരികെ ചിരിച്ചിട്ട് ഗുഡ്മോർണിംഗ് പറഞ്ഞു. ലോണ അവനെ തന്നെ നോക്കിയിരിക്കുകയാണ്.