മാന്ത്രികലോകം 12

Author : Cyril 

[Previous part]

പ്രിയപ്പെട്ട സുഹൃത്തുക്കളെ,

മാന്ത്രികലോകം കഥ വായിച്ച് അഭിപ്രായങ്ങളും, നിര്‍ദേശങ്ങളും നല്‍കി ഇതുവരെ എത്തിക്കാൻ സഹായിച്ച എല്ലാവർക്കും നന്ദി.

ഈ പാര്‍ട്ടിലും തെറ്റുകൾ ഒരുപാട്‌ ഉണ്ടാവുമെന്നറിയാം.. അത് ചൂണ്ടിക്കാണിക്കാൻ മറക്കരുത്. പിന്നെ, ഈ കഥ ഏറെക്കുറെ അവസാനിക്കാറായി.. ചിലപ്പോ 2 or 3 പാര്‍ട്ട്സ് കൂടി ഉണ്ടാകുമെന്ന് തോനുന്നു.

അപ്പോ വെറുതെ ഓരോന്ന് പറഞ്ഞു നിങ്ങളുടെ വിലപ്പെട്ട സമയം ഞാൻ കളയുന്നില്ല. വായിച്ചോളൂ.

എല്ലാവർക്കും എന്റെ സ്നേഹം ❤️

ഫ്രെൻ…… ഫെയറികളുടെ രാജകുമാരന്‍…. അവന്‍ ഉണരുന്നത് നോക്കി ഫെയറി ലോകം തന്നെ കാത്തിരിക്കും..
**********

അമ്മു

എന്റെ മുറിയില്‍ നിന്നുകൊണ്ട് നേരത്തെ ധ്വംസന-കഠാര സിദ്ധാര്‍ത്ഥിനോട് പറഞ്ഞ കാര്യത്തെ കുറിച്ച് ഞാൻ ഓര്‍ക്കുകയായിരുന്നു.

എന്റെ കഠാരയ്ക്ക് ഞാൻ “വംസന” എന്ന് പേര് പോലും നല്‍കിയിരുന്നു.

പെട്ടന്നാണ് എന്റെ മനസില്‍ ഒരു സംശയം കടന്നു കൂടിയത്… അതോടെ ഒരു വിറയൽ എന്റെ മനസ്സിനെ ബാധിച്ചു.

‘സിദ്ധാര്‍ത്ഥ് എനിക്ക് നല്‍കിയ ശക്തിയില്‍ ഒഷേദ്രസിന്റെ ശക്തിയും അടങ്ങിയിരിക്കുന്നു… അപ്പോ പിന്നെ ഒഷേദ്രസ് ഫ്രെന്നിനെ നിയന്ത്രിച്ച് അടിമയാക്കാൻ ശ്രമിക്കുന്നത് പോലെ എന്നെയും അടിമയാക്കാൻ ശ്രമിക്കില്ലേ..? ഇതുവരെ സിദ്ധാര്‍ത്ഥിനെ എന്തുകൊണ്ട് ഒഷേദ്രസ് അടിമയാക്കി മാറ്റാൻ ശ്രമിച്ചില്ല…?’ എന്റെ കഠാരയോട് ഞാൻ ചോദിച്ചു.

‘നിന്റെ പാരമ്പര്യത്തെ കുറിച്ച് ഒരുപാട്‌ കാര്യങ്ങൾ നി അറിയുന്നില്ല, അമ്മു. സിദ്ധാര്‍ത്ഥിനോട് ഞാൻ അവനെ കുറിച്ചുള്ള രഹസ്യങ്ങളെ മാത്രമാണ് പറഞ്ഞത്… ഇപ്പോൾ, സത്യത്തിൽ നീ ആരാണെന്ന സത്യങ്ങളെ പൂര്‍ണ്ണമായി അറിയാനുള്ള സമയമായിരിക്കുന്നു…’

‘എന്തു സത്യങ്ങൾ…?’ സംശയത്തോടെ ഞാൻ ചോദിച്ചു.

‘സിദ്ധാര്‍ത്ഥിന് മാത്രമാണ് ഒഷേദ്രസിന്റെ നേരിയ ശക്തി ലഭിച്ചത് എന്നാണ് ഞാൻ അവനോട് പറഞ്ഞത്… പക്ഷേ അവനു മാത്രമല്ല ഒഷേദ്രസിന്റെ ശക്തി ലഭിച്ചത്, അമ്മു. നിനക്കും ഒഷേദ്രസിന്റെ നേരിയ ശക്തി ലഭിച്ചിട്ടുണ്ട് എന്നറിയുക.’

വംസന പറഞ്ഞത് കേട്ടു എന്റെ ഉള്ളില്‍ ഭയം മെല്ലെ വര്‍ദ്ധിക്കാൻ തുടങ്ങിയിരുന്നു.

‘എനിക്കൊന്നും മനസ്സിലാകുന്നില്ല…’ ഞാൻ ഭീതിയോടെ പറഞ്ഞു.

‘നിനക്ക് എല്ലാം മനസിലാവും, അമ്മു. ഞാൻ വിശദീകരിക്കാം….

സിദ്ധാര്‍ത്ഥിന്റെ വംശത്തിൽ ഒഷേദ്രസിന്റെ സന്തതികള്‍ ജനിച്ചത് ഞാൻ പറഞ്ഞല്ലോ… അതിൽ ഒരു മാന്ത്രികന്‍ ആയിരുന്നു കീസിം ദയാക്.

കീസിം ദയാക് ഒഷേദ്രസിന്റെ പുത്രനായി… വളരെ ശക്തനായ മാന്ത്രികനായി ജനിച്ചു എങ്കിലും, ഒഷേദ്രസിന്റെ പ്രധാനമായ നശീകരണ സ്വഭാവമുള്ള ശക്തികളെ അല്ല അയാള്‍ക്ക് ലഭിച്ചത്-

പണ്ട് ഒഷേദ്രസിനെ പ്രകൃതി സൃഷ്ടിച്ച് മാന്ത്രിക ബോധത്തെ നല്‍കിയപ്പോള്‍, ഒരു തരി നന്മയുടെ തിരിച്ചറിവിനെയും അതിനൊപ്പം പ്രകൃതി ഒഷേദ്രസിന്റെ ഉപബോധ മനസില്‍ പകര്‍ന്നു കൊടുത്തിരുന്നു. ആ നന്മയുടെ ശക്തിക്ക് ഒഷേദ്രസിന്റെ നശീകരണ ശക്തിക്ക് തുല്യമായി വളരാൻ കഴിയുമായിരുന്നു.

ആ ശക്തി വളര്‍ന്ന് ഒഷേദ്രസിന്റെ നശീകരണ ശക്തിക്ക് തുല്യമായ നന്മയുടെ ശക്തിയായി ഉയര്‍ന്നിരുന്നെങ്കിൽ, ഒഷേദ്രസിന്റെ നശീകരണ ശക്തിയും നന്മയുടെ ശക്തിയും സമമാക്കി നിലനില്‍ക്കുമായിരുന്നു. അങ്ങനെ ഒഷേദ്രസിന്റെ നശീകരണ സ്വഭാവത്തിന് മറ്റം വരുത്താൻ പ്രകൃതി ചെറിയൊരു സാഹചര്യത്തെ സൃഷ്ടിക്കാന്‍ ശ്രമിക്കുകയായിരുന്നു.