ഭ്രാന്ത് പാർട്ട്‌ 2 {ക്‌ളൈമാക്‌സ്} {അപ്പൂസ്} 2002

അവളാഗ്രഹിച്ച ആ മയിൽ‌പീലി അവളുടെ തലയിൽ കുത്തി വച്ചിരിക്കുന്നു… പക്ഷേ ആരും ചുറ്റുമില്ല….

“ദേ കളിക്കാണ്ട് വന്നോട്ടോ…. ഇല്ലേലുണ്ടല്ലോ!!!!”

അവളുടെ ശാസന കേട്ട് കുറച്ചു വള്ളിപടർപ്പുകൾക്ക് ഉള്ളിൽ നിന്നാ ഭ്രാന്തൻ പുറത്തേക്ക് വന്നു….

“ഹെ… ഹേ… പേടിച്ചാ??? ന്റെ കുട്ടി???”

ചെറിയൊരു കുസൃതി പുഞ്ചിരിയോടെ ആ ഭ്രാന്തൻ ചോദിച്ചു

ചുരുണ്ട താടി രോമങ്ങൾക്ക് ഇടയിലൂടെ ആ മുഖത്ത് പുഞ്ചിരി എത്തിനോക്കുന്നത് കണ്ടു ഹൃദ്യമായ നേർത്ത പുഞ്ചിരിയോടെ ഇല്ലായെന്ന അർത്ഥത്തിൽ അവൾ കണ്ണിറുക്കി…

അതിന് മറുപടി ആയി അയാൾ പിറകിൽ ഒളിപ്പിച്ചു വച്ച വലം കൈ അവൾക്ക് നേരെ നീട്ടി….

കരിനീല നിറത്തിൽ ഏതാനും ഞാവലുകൾ അയാൾ ആ കയ്യിൽ അവൾക്കായി ഇന്നും കരുതിയിട്ടുണ്ട്…

ആ ഞാവലിനെക്കാൾ കറുത്ത ആ കൈകളിലേക്ക് ചതഞ്ഞു തുടങ്ങിയ ഞാവൽചാറു പടർന്നത് കണ്ട് അവൾക്ക് ഒക്കാനം വന്നു….

ആ ഭ്രാന്തന്റെ നീറ്റിപ്പിടിച്ച കൈ താഴ്ന്നു… ഒപ്പമാ മുഖവും….

അത് കണ്ട് അമ്മൂട്ടിക്കും സങ്കടമായി… അവളാ കൈകളിൽ പിടിച്ചു അതിൽ നിന്നൊരു ഞാവൽ എടുത്തു വായിലേക്ക് ഇട്ടു….

“ന്നാ… അപ്പടി തിന്നോ… നല്ല രസാ….”

വീണ്ടുമയാൾ അവൾക്ക് നേരെ കൈ നീട്ടി…

അയാളെ എന്ത്‌ വിളിക്കണം എന്നറിയാത്തത് കൊണ്ടു പുരികം കൊണ്ടു അയാൾക്ക് നേരെ തന്നെ ചൂണ്ടി അവൾ പറഞ്ഞു….

“തിന്നോ…”

“എയ്, ഇതപ്പിടി ജാനൂട്ടിക്ക് ഒള്ളതാ…”

ജാനൂട്ടിയോ എന്ന് മനസ്സിൽ ചോദിച്ചെങ്കിലും അപ്പോളവൾക്കത് ചോദിക്കാൻ ധൈര്യം വന്നില്ല..

“അത് പറ്റില്ല…. ഒരെണ്ണം കഴിക്കണം….”

അവളതിൽ നിന്ന് ഒരെണ്ണം അയാൾക്ക് നേരെ നീട്ടി… അല്പം മടിച്ചു അയാൾ വായ തുറന്നു അവൾക്ക് നേരെ നീട്ടി എങ്കിലും പെട്ടന്ന് എന്തോ ആലോചിച്ച് എന്നാ പോലെ കൈയ്യിലേക്ക് തന്നെ വാങ്ങി അത് അയാളും കഴിച്ചു…