ഭാഗ്യ സൂക്തം 04 [ഏക-ദന്തി] 95

ഞാൻ രാമേട്ടനോട് ചോദിച്ചു ” രാജു ഇന്നല്ലേ വരുന്നത് , കൊണ്ടുവരാൻ പോകണോ ?.”

” ഏയ് .. അതൊന്നും വേണ്ട . അവനെ അവന്റെ കൂട്ടുകാരന്മാര് പോയി കൊണ്ടുവരും . ആ വെട്ടി പരമന്റെ ചെക്കനും , തട്ടാൻ ശിവനും പിന്നെ   പാന കുട്ടനും . ഇന്നലെ അവന്റെ കൂടെ ജോലി ചെയ്യുന്ന ഒരു സമീറിന്റെ കാർ അവര് എടുത്തു കൊണ്ടുവന്നിട്ടുണ്ട് . രാത്രി 9 മണിക്ക് ഇറങ്ങും എന്നാണ് പറഞ്ഞിട്ടുള്ളത് .” രാമേട്ടൻ പറഞ്ഞു .

” അല്ല രാമേട്ടാ ഒരുക്കങ്ങൾ ഒക്കെ ഇതുവരെ ആയി ?” അനു ചോദിച്ചു.

” വീടുകാണലല്ലേ ഉള്ളൂ  . അപ്പൊ പണ്ടത്തിന്റെ (സ്വർണത്തിന്റെ ) ഒന്നും കാര്യം നോക്കണ്ട . അവര്‍ വന്നു കയറുമ്പോള്‍ ഒരു ജ്യൂസോ നാരങ്ങ വെള്ളമോ കൊടുക്കണം , പിന്നെ ഉച്ചക്ക് മുന്പ് ഭക്ഷണം കഴിച്ച് അവരങ്ങ് പോകും . ഈ വീടുകാണല്‍ ചടങ്ങ് ശരിക്കും വീട്ടിലെ പെണ്ണുങ്ങള്‍ വരാന്‍ പോകുന്ന പെണ്ണിന്റെ വീടും ചുറ്റുപാടും കണ്ടു മനസിലാക്കാന്‍ വേണ്ടി ഉള്ള സന്ദര്‍ശനം ആണ് . അതുപോലെ പെണ്ണിന്റെ വീട്ടുകാര്‍ ചെക്കന്റെ വീട്ടിലെ കാര്യങ്ങളും മറ്റും മനസിലാക്കാനും ഒക്കെ ആയി അവിടേക്ക് പോകുന്ന ഒരു ചടങ്ങും ഉണ്ട് . അത് അടുത്ത ശനിയാഴ്ച വെച്ചാലോ എന്നാണ് ആലോചന . നാളെ ഡ്രസ് ഒക്കെ എടുക്കാൻ പോണം . പിന്നെ ബഷീറിനെ കൂട്ടി സാധനങ്ങൾ വാങ്ങാൻ ഒന്ന് ചെന്നു കൊടുക്കണം . വെള്ളിയാഴ്ച ഈസടെ പന്തൽ പണിക്കാർ വരും ,  പാത്രങ്ങളും ഒക്കെ അവന്‍റെ അവിടെ നിന്ന് തന്നെയാണ് വാടകക്ക് എടുക്കുന്നത് ” രാമേട്ടൻ പറഞ്ഞു.

” രാമേട്ടൻ നാളെ തൊട്ട് ലീവ് ആക്കിക്കോളൂ . നാളെപ്പോ സുന്ദരേട്ടനും  അയാളെ പണിക്കാരും മാത്രല്ലേ ഉണ്ടാവൂ അതിപ്പോ രാവിലെ ഒന്ന് വന്ന് പറഞ്ഞു കൊടുക്കാനല്ലേ ഉള്ളൂ . അത് ഞാനും ശ്രീലൂം രാവിലെ വന്ന് പറഞ്ഞു ശെരിയാക്കാം .” അനു പറഞ്ഞു . 

അങ്ങനെ രാമേട്ടൻ മനസ്സില്ലാ മനസ്സോടെ ലീവ് എടുക്കാൻ സമ്മതം മൂളി . പുള്ളിക്ക് നാളെ മുതല്‍ തിരക്ക് തുടങ്ങും . ഞായറാഴ്ച പുള്ളിയുടെ മകളുടെ വീടുകാണല്‍ ആണ് . നാളെ തന്നെ ഡ്രെസ്സും ഒക്കെ എടുക്കാൻ പോകണം . മകൻ രാജു ഇന്നെത്തും . അവന്‍ “ UAE ” യില്‍ “റാസ്‌ – അല്‍ – ഖേയ്മ” എന്ന സ്ഥലത്താണ് . അതൊരു ധൈര്യമാണ് പുള്ളിക്ക് . ഓടി പാഞ്ഞു നടക്കാൻ രാജുവും കൂട്ടുകാരും ഉണ്ടാവും . രാമേട്ടന്‍ വീട്ടിലേക്ക് നടന്നു . പോകുന്ന വഴി ശ്രീലുട്ടി പറഞ്ഞു രാമേട്ടാ പപ്പാ രാത്രി വിളിക്കാം എന്ന് പറഞ്ഞിട്ടുണ്ട് . 

ഞാന്‍ വണ്ടിയുടെ ഡിക്ക് തുറന്ന്‍ വാഴക്കുലയും ഉണ്ണി പിണ്ടിയും ശ്രീലുന്റെ കയ്യിലുള്ള ചീരയും എടുത്തു വെച്ചു . വാതിലൊക്കെ അടച്ച് ലോക്ക് ആക്കി ഞങ്ങള്‍ തിരിച്ചു കോട്ടേഴ്സിലെക്ക് പോന്നു .