നാഗവല്ലി ടൈം ട്രാവൽ ചെയ്തപ്പോൾ 😌😏😜 [ചാണക്യൻ] 91

ഇത് നമ്മുടെ മൂന്നാം ജന്മം.

തന്റെ പ്രതികാരം വീട്ടി, തന്റെ പ്രണയത്തെ സ്വന്തമാക്കി നാഗവല്ലി മടങ്ങും.

രാമനാഥ്നെയുംകൊണ്ടു ഭൂമിയുടെ ഏതെങ്കിലും ഒരു കോണിലേക്ക്.

നൃത്തം തുടരവേ കിളി വാതിലിലൂടെ എത്തി നോക്കുന്ന സണ്ണിയെയും നകുലനെയും കണ്ടു അവരുടെ കണ്ണിൽ കോല് കൊണ്ട് കുത്താൻ പോലും അവൾക്ക് തോന്നി.

അല്ലാതെ തന്നെ സണ്ണിയും ആ പരട്ട തിരുമേനിയും ശങ്കരൻ തമ്പിയെ തന്റെ മുന്നിലേക്ക് എത്തിക്കുമെന്ന് അവൾക്ക് അറിയാമായിരുന്നു.

ഇതിനു മുന്നേയും അങ്ങനെയാണല്ലോ സംഭവിച്ചിരുന്നത്.

ഇന്നും അങ്ങനെ തന്നെ സംഭവിക്കും.

നാഗവല്ലി അമിതാവേശത്തിലായിരുന്നു.

അടി തിമിർത്ത് ഗാനം പകുതിയും കഴിഞ്ഞതും ഇപ്പൊ രാമനാഥനെ അവർ തനിക്ക് സമം പറഞ്ഞു വിടുമെന്ന് നാഗവല്ലിക്ക് അറിയാമായിരുന്നു.

വൈകാതെ തന്നെ രാമനാഥനെത്തി.

നാഗവല്ലി കള്ള ചിരിയോടെ തന്റെ പ്രണയ ഭാജനവുമൊത്ത് എല്ലാം മറന്നുകൊണ്ട് നൃത്തം ചെയ്തു.

ഒരേ സമയം അവളിൽ രാമനാഥനോടുള്ള അമിത പ്രണയവും ശങ്കരൻ തമ്പിയോട് അമിത പകയും തോന്നിക്കൊണ്ടിരുന്നു.

രാമനാഥൻറെ വരികൾക്കൊത്ത് നാഗവല്ലി അവനൊപ്പം ആട്ടത്തോടെ വന്നു.

നാഗവല്ലി മനോഹരി

രാമനാഥൻ തേടും വാലെ

രാമനാഥന്റെ ഗാനത്തിനൊത്ത് ചുവടു വച്ചെത്തിയ നാഗവല്ലി കാണുന്നത് വലിയൊരു മന്ത്രക്കളവും ബ്രഹ്മദത്തൻ തിരുമേനിയും അദ്ദേഹത്തിന്റെ ശിഷ്യഗണങ്ങളും പിന്നെ മടമ്പള്ളി തറവാട്ടിലെ അംഗങ്ങളുമായിരുന്നു.

ആഹാ കാഴ്ചക്കാരൊക്കെയുണ്ടല്ലോ…. ഒരെണ്ണത്തിനെയും വെറുതെ വിടരുത്.

രോഷം കൊണ്ടു നാഗവല്ലി അവരെയെല്ലാം കൊലവെറിയോടെ നോക്കി.

ആ തീക്ഷ്‌ണതയുള്ള നോട്ടം കണ്ടു ഒരുവേള അവരെല്ലാം തന്നെ പകച്ചു പോയി എന്ന് വേണം പറയാൻ.

ബ്രഹ്മദത്തൻ തിരുമേനിയുടെ ആജ്ഞ കേട്ട് 2 ശിഷ്യഗണങ്ങൾ നാഗവല്ലിയെ പിടിച്ചുകൊണ്ടു വന്നു.

നാഗവല്ലി അവർക്ക് വഴങ്ങി കൊടുത്തു.

അണയാൻ പോകുന്ന തീ കാട്ടുതീയായി ആളി കത്തുമെന്ന് അവർക്ക് അറിയില്ലായിരുന്നു.

നാഗവല്ലിയെയും കൊണ്ട് മന്ത്രക്കളത്തിലെത്തിയതും ശിഷ്യന്മാർ അവിടിവിടെയായി നിരന്നു നിന്നു.

ബ്രഹ്മദത്തൻ നാഗവല്ലിയോട് അവിടെ ഇരിക്കാൻ ആവശ്യപ്പെട്ടു.

നാഗവല്ലി അതിനു വഴങ്ങാത്തതിനാൽ കയ്യിൽ ഭസ്മം വാരിയെടുത്തു ബ്രഹ്മദത്തൻ പന്തത്തിലെ കത്തുന്ന തീയിലേക്ക് വലിച്ചെറിഞ്ഞു.