നന്ദന 5 [ Rivana ] 88

അവനോട് പറയാനാകാതെ ഉള്ളം നീറുമ്പോഴും മുഖത്ത് പുഞ്ചിരിയോടെ നിൽക്കാൻ നോക്കിയിരുന്നു. അവരുടെ അടുപ്പം ഓരോ ദിനവും കൂടി വരുന്നത് ഞാൻ കണ്ടിരുന്നു. അതെല്ലാം അവൻ എന്നോട് പറയുമ്പോ ചങ്ക് നീറിയാണ് ഞാൻ കേട്ടിരുന്നത്.

ഇതൊന്നും ആരോടും പറയാൻ ആകാതെ ഉള്ളിൽ മാത്രം കൊണ്ട് നടന്ന് മരിക്കാതെ മരിക്കുന്ന പോലെയാണ് എനിക്ക് അനുഭവപ്പെട്ടിരുന്നത്.

അവൻ എന്നിൽ നിന്ന് അകൽന്നു തുടങ്ങി എന്ന് പോലും എനിക്ക് തോന്നി തുടങ്ങി. എന്നെക്കാളും കൂടുതലായി അവൻ അവളോട് സംസാരിക്കാനും കൂടെ ചിലവഴിക്കാൻ സമയം കണ്ടെത്തുകയും ചെയ്തു തുടങ്ങി. അത് മാത്രം അല്ല അവൾ ഒരു ക്രിസ്ത്യാനി കൂടെ ആയിരുന്നു. ഞാൻ വേറെ മതം ആയതിനാൽ ചിലപ്പോ അവൻ എന്റെ ഇഷ്ട്ടം കണ്ടില്ലെന്ന് വച്ചിരിക്കും. പക്ഷെ അവൾ അവന്റെ അതേ മതമാണ് അവൾ ഇഷ്ട്ടമാണ് എന്ന് പറഞ്ഞാൽ അവൻ തിരിച്ചു പറയാൻ സാധ്യത കൂടുതലാണ്.

അവനോട് ഞാൻ അവളുമായുള്ള ബന്ധം ചോദിക്കുമ്പോ ഒരു നല്ല ഫ്രണ്ട് എന്ന് മാത്രമാണ് എനിക്കവൻ മറുപടി തന്നിരുന്നത്.

___

ഉച്ചക്ക് ഭക്ഷണം കഴിച്ചു ക്ലാസിൽ കയറാൻ നിൽക്കുമ്പോൾ അവൻ എന്നോട് ഒറ്റക്കായി എന്നോട് സംസാരിക്കാൻ ഉണ്ടെന്നും പറഞ്ഞു വിളിച്ചു കൊണ്ട് പോയി.

“ നന്ദേ കുറച്ചു മുൻപ് ഞാൻ ടെസയേ കണ്ടിരുന്നു, അവൾ എന്നോട് ഇങ്ങോട്ട് ഇഷ്ടമാണെന്ന് പറഞ്ഞെടി “ അവൻ വളരെ സന്തോഷത്തോടെയാണ് അത് പറഞ്ഞത്.

എന്നാൽ ഞാൻ കേട്ടത് ഒരു ഞെട്ടലോടെയും, ഒപ്പം അവനേ എനിക്ക് നഷ്ട്ടമാകും എന്നുള്ള പേടിയും.
എന്നിരുന്നാലും അതൊന്നും പുറത്ത് കാണിക്കാതെ ഞാൻ മുഖത്ത് ചിരി വരുത്തി കൊണ്ട് ചോദിച്ചു.

“ എന്നിട്ട് നീ എന്ത് പറഞ്ഞു “

“ ഞാൻ ഒന്നും പറഞ്ഞില്ല, എല്ലാം കേട്ടു നിന്നതേ ഉള്ളു. അവൾ എന്നോട് ഇപ്പൊ ഒന്നും പറയണ്ടാന്ന് പറഞ്ഞു “

“ എന്നിട്ട് നിനക്ക് അവളെ ഇഷ്ടമാണോ “

“ അറിയില്ലാടി അവളോട് എനിക്ക് എന്താണ് എന്നുള്ളത്, ഞാൻ ആലോചിച്ചു ഒരു തീരുമാനത്തിൽ എത്താൻ പറ്റുന്നില്ല. എന്തായാലും നാളെ മറുപടി കൊടുക്കണം “