ദൗത്യം 4 [ശിവശങ്കരൻ] 203

******************************

അവർ ഫ്രഷ് ആയി വരുമ്പോഴേക്കും നമുക്ക് ഓരോരുത്തരെയായി പരിചയപ്പെടാം…

ആദ്യത്തെയാൾ നമ്മുടെ അനാമിക, അനു എന്ന് മറ്റുള്ളവർ വിളിക്കുന്ന നമ്മുടെ അരുണിന്റെ മണിക്കുട്ടി… ഡിഗ്രി ഫസ്റ്റ് ഇയർ ആണ് പഠിക്കുന്നതെങ്കിലും വീട്ടിലെ ഇളയകുട്ടി ആയതിനാലും, തലയിലേറ്റി നടക്കാൻ 2 ചേട്ടന്മാർ ഉള്ളത് കൊണ്ടും, ഇപ്പോഴും LP സ്കൂളിൽ ആണെന്നാണ് വിചാരം…

രണ്ടാമത്തെയാൾ… ആ അതാ അരുണിന് വേണ്ടി ഇടിയപ്പം ഉണ്ടാക്കിക്കൊണ്ടിരിക്കുന്ന അമ്മ, ദേവി എന്ന് എല്ലാവരും വിളിക്കുന്ന ശ്രീദേവി… വിദ്യാഭ്യാസമൊക്കെ ഉണ്ടെങ്കിലും ബിസ്സിനസുകാരനായ വിജയരാഘവനെ വിവാഹം കഴിച്ചു വീട്ടമ്മയുടെ ജോലി ഏറ്റെടുത്തു…

അടുത്തയാൾ…. ഹാ വന്നല്ലോ…. പൊന്നനിയനെ തേടിപ്പോയതായിരുന്നു…

Dr. വരുൺ രാഘവ്. ആള് കാർഡിയോളജിസ്റ്റ്  ആണ്. ആൾടെ ഫ്രണ്ടിന്റെ ഒപ്പം പാർട്ണർഷിപ്പിൽ ഒരു മൾട്ടിസ്‌പെഷ്യലിറ്റി ഹോസ്പിറ്റൽ നടത്തുന്നു…

ഇനി നമ്മുടെ പ്രധാന കഥാപാത്രം വിജയരാഘവൻ.
ആൾ പണ്ടേ ഇംഗ്ലീഷിൽ ബിരുദധാരിയാണ്. എന്നാൽ തിരിഞ്ഞത് ബിസ്സിനെസ്സിലേക്കും. കൈ വച്ച മേഖലകൾ എല്ലാം പൊന്നു വിളയിപ്പിച്ചെടുത്താണ് അദ്ദേഹം മുന്നേറുന്നത്. നഗരത്തിലെ എണ്ണം പറഞ്ഞ ബിസ്സിനെസ്സുകാരിൽ ഒരാളാണ് അദ്ദേഹം ഇന്ന്. ഇതിന്റെയൊന്നും അഹങ്കാരമില്ലാതെ ജീവിക്കുന്ന, എല്ലാവർക്കും ഇടയിൽ, മുതലാളിമാർക്കും തൊഴിലാളികൾക്കും ഒരുപോലെ പ്രിയങ്കരൻ… പരിചയപ്പെടുന്നവർക്കെല്ലാം നല്ലതുമാത്രം പറയാൻ തോന്നിപ്പിക്കുന്ന വ്യക്തിത്വം… പക്ഷേ… വീട്ടിൽ മക്കൾക്ക് അദ്ദേഹം കർക്കശക്കാരനായ അച്ഛനാണ്…  സ്നേഹം പോലും അളന്നു മുറിച്ചു കൊടുക്കുന്ന അറുപിശുക്കൻ…

അതവിടെ നിൽക്കട്ടെ, ഇപ്പൊ ഇവിടൊരു അടി നടക്കാൻ സാധ്യതയുണ്ട്…

കാറിന്റെ ഡോറും വലിച്ചടച്ചാണ് നമ്മുടെ ഡോക്ടർ പാഞ്ഞു വരുന്നത്…
ഹാളിലേക്ക് കയറിയതും വരുൺ അലറി… “ഡാ…..!!!”

ഏതോ മ്യൂസിക് ചാനലിൽ പാട്ടും കണ്ടുകൊണ്ട് പോപ്‌കോൺ കഴിച്ചുകൊണ്ടിരുന്ന അനുവിന്റെ വായിൽ നിന്നുവരെ പോപ്‌കോൺ തെറിച്ചു പോയി…