ദി തേർഡ് ഐ [Neethu M Babu] 125

‘‘ഇനി അതൊന്നും പറഞ്ഞിട്ട് കാര്യമില്ല അരുൺ, ഇന്നത്തെ കാലം അങ്ങനെയാണ്. പിന്നെ ഞങ്ങൾ ചെയ്തത് ഞങ്ങളുടെ ഡ്യൂട്ടിയാണ്. ഇതുകൊണ്ടൊന്നും നിങ്ങൾക്കുണ്ടായ നഷ്ടം നികത്താനാവില്ലെന്ന് ഞങ്ങൾക്കറിയാം. പക്ഷേ ഈ കേസ് തെളിയിക്കപ്പെടണമെന്നുള്ളത് ദൈവനിശ്ചയമാണ്. റേറ്റിങ്ങ് കൂട്ടാൻ വേണ്ടി ഒരു മരണവാർത്തയെപ്പോലും വളച്ചൊടിച്ച് എന്ത് അഭാസവും എഴുതിപ്പിടിപ്പിക്കുന്നവരെയും, വാർത്തയുടെ സത്യാവസ്ഥ മനസ്സിലാക്കാൻ ശ്രമിക്കാതെ അഭിപ്രായസ്വാതന്ത്ര്യമെന്ന പേരിൽ കേട്ടാലറയ്ക്കുന്ന ഭാഷയിൽ തെറിവിളികൾ നടത്തുന്നവരെയും ഇതൊന്നും പറഞ്ഞു വിശ്വസിപ്പിക്കാൻ നമുക്ക് സാധിക്കില്ലയിരിക്കും പക്ഷേ സുമയെപ്പോലെ സ്വന്തം കയ്യിൽ കൊണ്ട് നടക്കുന്ന മൊബൈൽ ഫോണിന്റെ ദൂഷ്യവശങ്ങൾ ഒന്നും തന്നെയറിയാത്ത ഒരുപാട് വീട്ടമ്മമാരുള്ള നാടാണ് നമ്മുടേത്. ഒരുപക്ഷേ ഈ കേസ് തെളിയിക്കപ്പെട്ടത് അവർക്ക് വേണ്ടി മാത്രമായിരിക്കും.’’