‘‘കാമുകന് അയച്ചു കൊടുത്ത നഗ്നദൃശ്യങ്ങൾ പുറത്തായി. പ്രവാസിയുടെ ഭാര്യ ആത്മഹത്യ ചെയ്തു…’’
സ്വ ലേ : ഓൺലൈൻ ചാറ്റിങ്ങിലൂടെ കാമുകന് അയച്ചു കൊടുത്ത നഗ്നദൃശ്യങ്ങൾ പുറത്തായതിൽ മനംനൊന്ത് വീട്ടമ്മ ആത്മഹത്യ ചെയ്തു. വിദേശത്ത് നിന്നും ഈ മാസം നാട്ടിലെത്തിയ ഭർത്താവ് ക്വാറന്റൈൻ കാലാവധി കഴിഞ്ഞെത്താൻ ദിവസങ്ങൾ മാത്രം ബാക്കിയിരിക്കെയാണ് യുവതിയുടെ ആത്മഹത്യ. സൗത്ത് പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.

‘‘വല്ലോന്റേം കൂടെ കറങ്ങി നടന്നിട്ട് വീഡിയോ പുറത്തായി പോലും. ഇവളൊന്നും ജീവിച്ചിരിന്നിട്ട് ഒരു കാര്യവുമില്ല. മലയാളികളെ പറയിക്കാനായിട്ട്.’’

‘‘കാശും സ്വർണവുമൊക്കെ നേരത്തെ തന്നെ കാമുകന് കാഴ്ച വച്ച് കാണും. നേരാംവണ്ണം ജീവിക്കുന്ന ഞങ്ങളെപ്പോലുള്ള പെണ്ണുങ്ങളെക്കൂടി പറയിക്കാനായിട്ട്…’’

‘‘ഭർത്താവ് ഗൾഫീന്ന് വരുന്നത് വരെ കാക്കാനുള്ള ഇരിക്കപ്പൊറുതി ഉണ്ടായിക്കാണില്ല.’’

‘‘കണ്ടവന്റെയൊക്കെ മുന്നില് നിന്ന് കൊടുത്തിട്ട് കെട്ട്യോനും നാട്ടുകാരുമറിഞ്ഞപ്പോ ആത്മഹത്യ. എന്നാലും ഇവളുടെയൊക്കെ ഒരു ധൈര്യമേ.. കുഞ്ഞ് മുന്നില് നിൽക്കുന്നത് പോലും ഇവൾക്കൊന്നുമൊരു പ്രശ്നമേ അല്ല. ത്ഫൂ നാണം കെട്ടവള്..’’

‘‘പാവം ഭർത്താവ് ഇവൾക്കൊക്കെ വേണ്ടി മണലാരണ്യത്തിൽക്കിടന്ന് കഷ്ടപ്പെടുന്നു. ഇവളൊക്കെ ആ കാശും വാങ്ങി തോന്നിയ പോലെ ജീവിക്കുന്നു…’’

പൊടിപ്പും തൊങ്ങലും ചേർത്ത മസാലക്കഥകളും, ഊഹാപോഹങ്ങളും, ഇന്റലിജൻസ് ബ്യുറോയെപ്പോലും നാണിപ്പിക്കുന്ന തരത്തിൽ കേസിന്റെ അന്വേഷണച്ചുമതല സ്വയം ഏറ്റെടുത്ത ഓൺലൈൻ സിബിഐ സംഘങ്ങളുടെ അന്വേഷണറിപ്പോർട്ടും കൊണ്ട് ചാനലുകളുടെ കമന്റ് ബോക്‌സ് നിറഞ്ഞു.

‘‘ടാ നീ ന്യൂസ് വായിച്ചില്ലേ? അവൾക്കൊരു കാമുകൻ ഉണ്ടായിരുന്നെന്ന്, അവനയച്ചു കൊടുത്ത വീഡിയോകളാണ് ലീക്കായത്. ഭർത്താവ് നാട്ടിലെത്തിയത് അറിഞ്ഞപ്പോ മിക്കവാറും കാമുകൻ മുങ്ങിക്കാണും..’’

‘‘ആരാടാ അവൻ? പിക്ക് ഉണ്ടോ?’’

‘‘എയ് ഇല്ല. ന്യൂസിന്റെ കമന്റിൽ വായിച്ചതാ. ഉണ്ടാവും അതുറപ്പല്ലേ, നീ വീഡിയോ കണ്ടില്ലേ? നെറ്റ് ഓണാക്ക് ഞാൻ സെന്റ് ചെയ്യാം. ഏതവനായാലും ഭാഗ്യവനാണ്. നമ്മളൊക്കെയിവിടെ ആണെന്നും പറഞ്ഞ് നടന്നിട്ട് എന്താടാ കാര്യം? ഇപ്പൊ വല്ലോനും കൊണ്ടോയില്ലേ…’’

വഴി പിഴച്ചവൾ ചത്തു തൊലഞ്ഞത് നാടിനും വീടിനും നന്നായെന്ന തീരുമാനത്തിൽ നാട്ടുകാരും, ബന്ധുക്കളും പിരിഞ്ഞു പോയി.

കുറച്ചു ദിവസങ്ങൾക്ക് ശേഷം, സൗത്ത് പൊലീസ് സ്റ്റേഷൻ…

‘‘സർ എന്റെ പേര് അരുൺ. സ്റ്റേഷനിൽ വന്ന് കാണണമെന്ന് എസ് ഐ സാറ് അറിയിച്ചിരുന്നു.’’

‘‘മ്, ചെല്ല് ചെല്ല്, സാർ അകത്തുണ്ട്.’’