തുരുത്ത്

Author : Enemy Hunter

 
ഈ ജേണർ മാറ്റണം എന്ന് ആഗ്രഹം ഉണ്ട്. പക്ഷെ ആലോചിക്കുമ്പോൾ ഇതല്ലാതെ വേറൊന്നും വരുന്നില്ല. ഞാൻ മാറി ചിന്തിക്കാൻ ശ്രമിക്കുന്നുണ്ട്.
“പണ്ടീ കായല് കടക്കാൻ രണ്ട് തുഴക്കാര് മാറി മാറി തുഴയണാർന്നു.ഇപ്പൊ കണ്ടില്ലേ കായല് മെലിഞ്ഞു.ഈ തുരുത്തിൽ നിന്ന് ഇപ്പൊ മുട്ടോളം വെള്ളത്തിൽ നടന്നാ അക്കരെയെത്താം.” ഷാപ്പുകാരൻ ലാസറ് തന്റെ മനുഷ്യ സഹായം ഷാപ്പിന്റെ അകത്തളത്തിൽ കുടിയന്മാരെ നോക്കി പ്രഭാഷണം തുടർന്നു.

“അല്ലേലും നിനക്കൊക്കെ എന്തറിയാം നിന്റെയൊക്കെ തന്തമാരുടെ തന്തമാരുടെ കാലത്താ എന്റെ തന്തയിവിടെ വരുന്നത്.ഈ കാണണ തെങ്ങുകൾക്കറിയാം എന്റെ അപ്പനെ. അങ്ങേര് ചെത്താത്ത ഒരൊറ്റ തെങ്ങുപോലൂല്ലാ അക്കരെയിലും ഇക്കരയിലും.

“നിങ്ങള് ഗീർവാണം നിർത്തി കള്ളൊഴി മൂപ്പിന്നെ” ശലോമോൻ പുച്ഛത്തോടെ ഗ്ലാസ്സ് നീട്ടി

“ഡാ ചെക്കാ, കള്ള് ഞാനൊഴിക്കാം അതെന്റെ തൊഴിലാ.എന്നുകരുതി നീ ഒരുപാട്‌ കേറി ഒണ്ടാക്കല്ലെ.നീയൊക്കെ ടൗണീപ്പോയി ബിവറേജിന്ന് വിദേശി അടിക്കണതൊക്കെ ഞാനറിയണിണ്ടട്ടാ. ലവന്മാർക്കൊന്നും എന്നെപ്പോലെ ശാസ്ത്രീയമായി മായം ചേർക്കാനറിയാൻപാടൂലാ.കണ്ണടിച്ചു പോവൂട്ടാ കുരുപ്പേ”

“അതുമിതും പറയാതെ ഇങ്ങൊഴിക്ക്” രമേശനും ഗ്ലാസ്സ് നീട്ടി

“അല്ല പെരുന്നാളും ഉത്സവവുമൊക്കെയായിട്ടും നിങ്ങളെന്താ ലാസറേട്ടാ അങ്ങോട്ടൊന്നും പോവാത്തെ” ശലോമോൻ ചോദിച്ചു

“ഞങ്ങള് കുടുംബപരമായിട്ട് നിരീശ്വരവാദികളാ.അതല്ലെ ഈ ഷാപ്പിന് ഞാൻ മനുഷ്യസഹായം എന്ന് പേരിട്ടിരിക്കുന്നെ.എന്റെ അപ്പനും അങ്ങനെയാർന്നു.അല്ലേലും ഈ നാടിന്റെ ചരിത്രമറിഞ്ഞാ ആർക്കേലും ദൈവത്തിൽ വിശ്വാസം തോന്നുവോ.നിങ്ങളൊക്കെ കേട്ടിട്ടുണ്ടാവൂലോ.”

“കേട്ടിട്ടുണ്ട് പക്ഷെ അതൊക്കെ വിശ്വാസികളുടെ പക്ഷമാ ഒരു നിരീശ്വരവാദിടെ പക്ഷം ഇതുവരെ കിട്ടീട്ടില്ല.” രമേശൻ പറഞ്ഞു

“എന്നാ കേട്ടോ ഇവിടെ മനുഷ്യന്മാര് രണ്ട് തരാ അക്കരക്കാരും ഇക്കരക്കാരും.കായല് ഇന്നത്തേന്റെ ഇരട്ടിയുണ്ട് അന്ന്.മനുഷ്യന്മാര് തമ്മിലും എന്താണ്ട് അത്ര തന്നെ അകലുണ്ടാവും.അക്കരെ അമ്പലം ഇക്കരെ പള്ളി.അക്കരെ വെയില്കാവിലമ്മ ഇക്കരെ കുതിരക്കാരൻ പുണ്യാളൻ.അങ്ങോട്ടും ഇങ്ങോട്ടും വാശിയാണ്.കച്ചവടത്തിലും നാട്ടുകാര്യത്തിലും എല്ലാം വാശിയാണ്.ഇവിടൊരു ആഷ്‌പത്രി വന്നാ അപ്പുറത്തും വരും ഒരെണ്ണം.പള്ളിക്കൂടം വന്നപ്പോ അമ്പലവും തൊടങ്ങി ഒരെണ്ണം.വള്ളംകളീലെ വാശി വേറെ.പിന്നെ പണ്ടാരണ്ട്‍ പറഞ്ഞപോലെ പെരുന്നാളും ഉത്സവവും ഒരേ ദിവസം. അതായത് ഇന്ന്.ഇവിടെ കതന രണ്ട് നെലേലു പൊട്ടുമ്പോ അവിടെ മൂന്ന് നെലേലു പൊട്ടും.”

“അതൊക്കെ ഞങ്ങൾക്കറിയാം ഇങ്ങള് പ്രധാന ഭാഗത്തേക്ക് വാ”മീൻകറിയൽപ്പം നാക്കിലേക്കു തൊട്ടുകൊണ്ട്‌ രമേശൻ ചോദിച്ചു.

“ധൃതി വെക്കേലെടാ ചെക്കാ, ചില കാര്യങ്ങള് സമയമെടുത്തുപറയണം” ഒരുതുടം മോന്തിക്കൊണ്ട് ലാസർ തുടർന്നു