ഡെറിക് എബ്രഹാം 4 [അഹമ്മദ് ശഫീഖ് ചെറുകുന്ന്] 206

“ഹഹഹ…. ചേച്ചിയായാലും അനിയനായാലും എന്തിനും ന്യായമുണ്ടാകുമല്ലോ പറയാൻ…”

“ന്യായം പറഞ്ഞതല്ല സാർ… ഉള്ളത് പറഞ്ഞുവെന്നേയുള്ളൂ ..”

“അറിയാം അനുപമാ….അതൊക്കെ തന്നെയാണ് നിന്നെയെനിക്കേറ്റവും പ്രിയപ്പെട്ടവളാക്കിയതും…
നിങ്ങളല്ല… ഈ നാടാണ് പ്രശ്നം.. മനസ്സമാധാനത്തോടെ ഭരിക്കാൻ അനുവദിക്കില്ല ഒരുത്തനും… കൂടെയുള്ളവർ തന്നെ ഒറ്റുകാരുടെ വേഷമണിയുമ്പോൾ നോക്ക് കുത്തിയായി നിൽക്കാനേ പറ്റാറുള്ളൂ പലപ്പോഴും ”

“അറിയാം സാർ…ഞാൻ കളക്ടറായി സത്യപ്രതിജ്ഞ ചെയ്തത് കൈ കൊണ്ടല്ല..മനസ്സ് കൊണ്ടാണ്..ആ സ്ഥാനത്ത് തുടരുന്നത് വരെ ഒരുത്തന്റെ മുന്നിലും അടിയറ വെക്കില്ല എന്റെ അഭിമാനവും പദവിയും… ഒരു ഭീഷണിയിലും തകരുകയും ചെയ്യില്ല… ഇനി അങ്ങനെ ചെയ്യേണ്ടി വന്നാൽ അപ്പോൾ ഇട്ടേച്ചു പോവും ഈ പദവി..ന്യായത്തിനെതിരെ പ്രവർത്തിക്കേണ്ട ഒരാവശ്യവും എനിക്കില്ല…ഞാൻ ഇത്ര വരെ തുടരുമെന്ന് ആർക്കും വാക്കും കൊടുത്തിട്ടില്ല… പദവി വിറ്റ് ജീവിക്കേണ്ട ആവശ്യം എനിക്കോ എന്റെ കുടുംബത്തിനോ ഇല്ല സാർ ”

ഇതൊക്കെ കേട്ട് CM ചന്ദ്രശേഖർ കുറേ നേരം തരിച്ചു നിന്നു പോയി….

“അനുപമ… ഞാൻ ആരാണെന്ന് നിനക്കറിയാല്ലോ.. അല്ലേ….CM ആണ്…. ഈ സംസ്ഥാനത്തിന്റെ CM..”

“സോറി സാർ…കുറച്ചു കൂടിപ്പോയി…അറിയാം…
പക്ഷേ, ഞാൻ ഈ പറഞ്ഞത് തന്നെയാണ് സത്യം സാർ ”

“ഹോ….നിന്റെ സംസാരം കേട്ടിട്ട് കുറച്ചു നേരത്തേക്ക് ഞാൻ തന്നെ മറന്നു പോയി, ഞാനൊരു സംസ്ഥാനത്തിന്റെ മുഖ്യമന്ത്രിയാണെന്ന്…
സ്ത്രീസംവരണം ഇത്തിരി കൂടി കൂട്ടണം… നിന്നെ പോലെയുള്ള കുറച്ച് പേർ കൂടി ഇങ്ങേക്ക് വരട്ടെ….നമുക്കൊന്ന് ആഞ്ഞു ശ്രമിച്ചു നോക്കാലോ… ഈ നാട് നന്നാവോ എന്ന്…
അല്ലേടാ റൗഡി അനിയാ “