ജോക്കർ [ആൽബി] 1094

അപ്പൊ വന്നതായോ കുറ്റം. എന്നാ പോയേക്കാം.

തിരിഞ്ഞ അവന്റെ കയ്യിൽ അവൾ പിടുത്തമിട്ടു. അന്തോണി, നിനക്ക് എന്റെ മുന്നിൽ എന്തിനാ ഈ അപകർഷത. എല്ലാം അറിഞ്ഞും മനസ്സിലാക്കിയും അല്ലെ നിന്നെ ഞാൻ ഇഷ്ടപ്പെട്ടെ.

ഒരു മഞ്ഞുരുകുകയായിരുന്നു. ഞൊടിയിടയിൽ അവൾ അവന്റെ കരവലയത്തിൽ ആയി.സൗഹൃദം പ്രണയത്തിനു വഴിമാറിയ നിമിഷങ്ങൾ. താഴെ സംസാരിക്കുന്ന ശബ്ദം കേട്ടാണ് സാന്ദ്ര അവനെ വിട്ടകന്നത്.

അന്തോണി, അമ്മച്ചി ഉണ്ടോ കൂടെ.

താഴെ നിന്റെ അപ്പനുമായി സംസാരിക്കുന്നുണ്ട്.

ന്റെ മാതാവേ, ഇങ്ങനൊരു പൊട്ടൻ. എന്നിട്ടെന്താ കോന്താ പറയാഞ്ഞേ. അവന്റെ മുതുകിൽ ഒരു അടിയും കൊടുത്ത് അവൾ താഴേക്കോടി.

ആ മോളു വന്നോ. എന്നെ മനസ്സിലായോ.

അതെന്താ അമ്മച്ചി അങ്ങനെ ചോദിച്ചേ. എനിക്ക് അറിയത്തില്ലയോ.

എന്നാ കോലവാടി കൊച്ചേ ചെന്ന് റെഡിയായി ഓരോ ചായ ഇട്ടോണ്ട് വന്നേ. മോളുടെ കൈപ്പുണ്യം അമ്മച്ചികൂടൊന്ന് അറിയട്ടെ.

ദേ വരുന്നു അമ്മച്ചി. പിന്നീട് അവരെ സൽക്കരിക്കുന്ന തിരക്കിലായിരുന്നു സാന്ദ്ര. ഇറങ്ങുമ്പോൾ ഗ്രേസി പറഞ്ഞു.ചെറിയാച്ചാ അപ്പൊ എല്ലാം പറഞ്ഞ പോലെ.ചെറിയ നോമ്പ് കഴിഞ്ഞു കെട്ടുകല്യാണം വക്കാം. എന്നാ ഞങ്ങൾ ഇറങ്ങട്ടെ. അവർ പോകുന്നതും നോക്കി മട്ടുപ്പാവിൽ സാന്ദ്രയും.

പിന്നീട് പ്രണയത്തിന്റെ നാളുകൾ. ആന്റണിയുടെ വീട്ടിൽ ക്ഷണിക്കപ്പെടാത്ത അതിഥിയായി സാന്ദ്ര. അവന്റെ വീടിനോടു ചേർന്നുള്ള തോപ്പും, ചേർന്നൊഴുകുന്ന  പുഴയും,പുഴയിലൂടെ ചെറുതോടുകൾ കടന്നുള്ള തോണിയാത്രയും ഒക്കെ ബോർഡിങ്ങിൽ പഠിച്ചു വളർന്ന അവൾക്ക് പുതിയ അനുഭവം ആയിരുന്നു. ഇടക്ക് അവൾ പറയും “നീയെന്ത് ഭാഗ്യവനാ അന്തോണി നമ്മുടെ ഈ നാട് കുഞ്ഞിലേ മുതൽ നീ ആസ്വദിച്ചിട്ടുണ്ട് അല്ലെ.ഞാൻ ഒക്കെ ട്രിപ്പ്‌ പോയിട്ടുണ്ട് അമ്യൂസ്മെന്റ് പാർക്കിൽ ഒക്കെ. ഇതൊക്കെ വച്ചു അതൊന്നും ഒന്നുമല്ല”

ആന്റണിയും സാന്ദ്രയും ഹോസ്പിറ്റലിലും, പുറത്തും പാറിപ്പറന്നു. പതിവുപോലെ ജോലിയും കറക്കവും കഴിഞ്ഞു അവൻ വീടുപിടിച്ചു.

അന്തോണിയെ കറക്കത്തിന്റെ സമയം ഇത്തിരി കുറക്കൂട്ടോ. കെട്ടിങ്ങു അടുക്കാറായി.

വരവ് വച്ചു ഗ്രേസിക്കുട്ടി.ഒരു ഉമ്മയും കൊടുത്ത്,സാന്ദ്രയോടുള്ള പതിവ് സംസാരവും കഴിഞ്ഞ് അവൻ ഉറക്കത്തിലേക്ക് വഴുതി.

…….

പിറ്റേന്ന് ആന്റണി ഉറക്കം വിട്ടുണർന്നു. സമയം ആറു മണി. ഹാളിലേക്ക് ചെല്ലുമ്പോൾ അമ്മച്ചി പള്ളിയിലേക്ക് പുറപ്പെടുന്നു.