ജോക്കർ [ആൽബി] 1094

മ്മ് ആയിക്കോട്ടെ. സാന്ദ്ര അറിയണ്ട.മൂന്നെണ്ണം. അതും വീക്ക്‌ എൻഡിൽ വൈകിട്ട്. എങ്ങാനും അവൾ അറിഞ്ഞാൽ എന്റെ കാര്യം പോക്കാ.വായിൽ പോയി ചാടിയെക്കല്ലേ.

ശരി ചേട്ടാ ഞാൻ നോക്കിക്കോളാം.

അല്ല നിനക്കിന്നു പോവണ്ടേ?

എന്നും ജോലിക്ക് പോയാൽ എങ്ങനാ റോയിച്ചേട്ടാ, വല്ലപ്പോഴും ഒന്നു പോകാതിരിക്കണ്ടേ.അവൻ നിസ്സംഗതയോടെ പറഞ്ഞു.

ഡാ ആൾക്കാർ വരുന്നു. ഞാൻ ചെല്ലട്ടെ.വിളിച്ചാൽ മതി.അടുത്ത കസ്റ്റമർ വന്നതിനാൽ റോയ് അധികം നിൽക്കാതെ പോവുകയും ചെയ്തു.

ബാറിലിരുന്ന്, പതിയെ മദ്യം നുണഞ്ഞുകൊണ്ടിരുന്നു അവൻ. അവന്റെ ഓർമ്മകൾ കുറച്ചു പിറകിലേക്ക് പോയി.
……..
ഇന്ദ്രപ്രസ്ഥം,മഹാരഥിമാർ വാണിരുന്ന ദില്ലി. ബാബർ, ഹുമയൂൺ,അക്ബർ മുതൽ ബഹദൂർ ഷാ വരെ മുഗൾ ചക്രവർത്തിമാർ പ്രൗഢിയോടെ വാണിരുന്ന ഡൽഹി. അവിടെയാണ് ആന്റണി ആദ്യമായി ജോലിയിൽ പ്രവേശിച്ചത്. നഗരഹൃദയത്തിലെ പ്രസിദ്ധമായ ആശുപത്രിയിൽ ക്വാളിറ്റി എക്സിക്യൂട്ടീവ് ആയി ജോലിയിൽ പ്രവേശിച്ചു.ഒരു മൂടൽ മഞ്ഞു വീണ പ്രഭാതത്തിൽ അവൻ അവിടെ കാലെടുത്തു വച്ചു. കൊണാട് പ്ലേസ്, അവിടെയുള്ള ക്ലാസ്സിക്‌ മന്ദിരങ്ങൾ അവനെ അത്ഭുതപ്പെടുത്തി. വർഷങ്ങൾക്കിപ്പുറം ഇന്നും പ്രൗഢിയോടെ തലയെടുത്തു നിൽക്കുന്ന ആ രാജവീഥിയിലൂടെ ആന്റണി നടന്നു. തന്റെ ജോലിയിൽ പ്രവേശിക്കാൻ.

ഫോർമാലിറ്റി തീർത്ത് അവൻ ജോലിയിൽ പ്രവേശിച്ചു. ചുരുങ്ങിയ ദിവസങ്ങൾക്കുള്ളിൽ അവനു സുഹൃത്തുക്കൾ ആയി. എച് ആർ എക്സിക്യൂട്ടീവ് വിമൽ, ക്വാളിറ്റി ഹെഡ് നമിത്, ട്രാൻസ്പോട്ടേഷൻ ഹെഡ് അച്ചായൻ തോമസ്, കൂടാതെ വിമലിന്റെ കുറച്ചു സുഹൃത്തുക്കൾ– ജോഷി,സംഗീത്, ജോബി, സിനി (അവിടുത്തെ മാർക്കറ്റിങ് ആൻഡ് പർച്ചേസ് സ്റ്റാഫ് ആണുട്ടോ) പിന്നെ ബിയയും. ഇതിൽ വിമൽ ആയിരുന്നു ആന്റണിയുടെ റൂം മേറ്റ്‌.

ബിയ അവനൊപ്പം ക്വാളിറ്റി ഡിപ്പാർട്മെന്റ് എക്സിക്യൂട്ടീവ്. ഡൽഹി മലയാളി. അവളോടായിരുന്നു അവനു അല്പം അടുപ്പം കൂടുതൽ. കൂടാതെ നമിത് അവന്റെ എഫിഷ്യൻസി കണ്ട് അവനോട് പ്രത്യേക ഇഷ്ടക്കൂടുതലും കാട്ടി.

അവരുടെ ഫ്രണ്ട്ഷിപ്പ് വളരെ പെട്ടെന്നു തന്നെ ദൃഢമായി. വീക്ക്‌ എൻഡിലെ അടിച്ചുപൊളികളും കുരുത്തക്കേടുകളുമായി അവർ തലസ്ഥാനനഗരി ഇളക്കിമറിച്ചു.ഇതിനിടയിൽ ബിയക്ക് ആന്റണിയോടുള്ള പെരുമാറ്റത്തിന്റെ നിറം മാറുന്നത് നമിത് മനസ്സിലാക്കി.

ന്യൂ ഇയർ പാർട്ടി.നഗരത്തിലെ നിശാപാർട്ടിയിൽ അവർ ആടിയുല്ലസിച്ചു പുതിയവർഷത്തെ വരവേറ്റു. കൃത്യം 12.00 മണി മുഴങ്ങിയപ്പോൾ ആന്റണിയുടെ കവിളുകളിൽ രണ്ടു ചുണ്ടുകൾ പതിഞ്ഞു. ദൃഢമായി ആ കവിളിൽ അമർത്തി ചുംബിച്ചു.ഒരു നിമിഷം അവൻ സ്വപ്നലോകതെന്നപോലെ നിന്നു.അവനിൽ നിന്നും വിട്ടകന്ന ബിയ അവനെ ഒന്ന് തട്ടി. “ഹേയ് ആന്റണി ”

അവൻ നോക്കുമ്പോൾ ബിയ തനിക്കുമുന്നിൽ.ഐ ലവ് യൂ ആന്റണി.അവൾ അവന്റ തോളിലൂടെ കൈകൾ കഴുത്തിൽ ചുറ്റി അവന്റെ തിളങ്ങുന്ന കണ്ണുകളിൽ നോക്കി പറഞ്ഞു.

ഒരു അടിയായിരുന്നു അതിനുള്ള മറുപടി. ചുറ്റും ഇനിയെന്ത് എന്നു നോക്കിയിരുന്ന കൂട്ടുകാർ ഒന്ന് ഞെട്ടി. അവളെ രൂക്ഷമായി നോക്കിക്കൊണ്ട് അവൻ ഇറങ്ങി നടന്നു.