ജോക്കർ [ആൽബി] 1094

ശരി സർ.തീരുമാനം അറിയിച്ചാൽ മതി.അവൻ ഇറങ്ങി നടന്നു.ഡ്യൂട്ടിയിൽ കയറാതെ നേരെ റൂമിലെത്തി.ഈ സമയം അവന്റെ കൂസലില്ലായ്മ കണ്ട് ഡോക്ടറുടെ ഉള്ളിൽ കുറച്ചു പ്രശ്നങ്ങൾ ഉദിച്ചു.

….. …..

ആന്റണി തന്റെ സുഹൃത്തിനൊപ്പം കൂടി. അവരുടേതായ ലോകത്ത് ആ മുറിയിൽ ചിലവഴിച്ചു.പിറ്റേന്ന് ഡോറിൽ കൊട്ടുന്ന ശബ്ദം കേട്ടാണ് ഉറക്കമുണർന്നത്. ഡ്രസ്സ്‌ നേരെയാക്കി കണ്ണും തിരുമ്മി അവൻ വാതിൽ തുറന്നു. അപ്പോൾ ദേ നിക്കുന്നു ഡോക്ടറുകുട്ടി.

എന്താടോ ഇങ്ങനെ നോക്കുന്നെ, ആദ്യായി കാണുന്ന പോലെ.

അല്ല, ഇയാൾ എന്താ ഇവിടെ.

ഒന്നകത്തേക്ക് വിളിച്ചുകൂടെ, അതിനുള്ള മര്യാദ കാണിക്കെടോ.

അവനെ തള്ളിമാറ്റി അവൾ അകത്തേക്ക് കയറി. ചുറ്റിലും കണ്ണോടിച്ചു. അലങ്കോലം ആയ മുറി.മൂലയിൽ മദ്യക്കുപ്പികൾ.രണ്ടു ബാഗ് പാക്ക് ചെയ്തു വച്ചിട്ടുണ്ട്.തലേന്ന് കഴിച്ചതിന്റെ ബാക്കി മദ്യം ടേബിളിൽ ഇരിക്കുന്നു.

ഇതെന്തുവാടോ, എന്ത് കോലം ഇതൊക്കെ. കൊള്ളാം.മൊത്തത്തിൽ നോക്കി അവൾ പറഞ്ഞു.

രാവിലെ തന്നെ ആളെ കളിയാക്കുവാണോ?

രാവിലെയോ, മണി 11 കഴിഞ്ഞു.കൂടാതെ കമ്മറ്റിയിൽ കണ്ടില്ല. മുങ്ങാൻ ഉള്ള പരിപാടി ആയിരുന്നു അല്ലെ.?

അത്‌ എന്റെ കാര്യം. ഇയാൾക്ക് എന്താ?

കൊള്ളാം, നല്ല കീറാണല്ലേ. ഇത്തിരി കുറക്കുട്ടോ. കൂമ്പ് വാട്ടണ്ട.മദ്യക്കുപ്പി കയ്യിലെടുത്തുകൊണ്ട് അവൾ പറഞ്ഞു.

അത്‌ എന്റെ സൗകര്യം. താനൊന്ന് പോയെ.

ചൂടാവാതെടോ, ഞാൻ പോയേക്കാം. അതിന് മുന്നേ ഒരു ചെറിയ കാര്യം പറയട്ടെ. ഇന്നലെ അച്ചായൻ എന്നെ കാണാൻ വന്നിരുന്നു. ഒപ്പം മോഹൻ സാറും. അവർ പറഞ്ഞതുകൊണ്ട് ഒരു കൺസിഡറേഷൻ.ആ പരാതി പിൻവലിച്ചിട്ടുണ്ട്. എന്റെ പേരിൽ ഇനി തന്റെ ജോലി പോവണ്ട. അവൾ ഇറങ്ങി നടന്നു.

അവൻ അല്പസമയം നിശ്ചലനായി നിന്നു. അവനിലെ അപകർഷത അവന്റെ ചിന്തയെ നിയന്ത്രിച്ചു. ആ ഒരു നിമിഷത്തിൽ അവൻ മറ്റൊന്നും ആലോചിക്കാതെ തയ്യാറായി ബാഗും എടുത്തിറങ്ങി. സെക്യൂരിറ്റി ഗേറ്റിന് അടുത്തെത്തിയപ്പോൾ വീണ്ടും അവൾ മുന്നിൽ.

ഇയാൾ പോകുവാണോ?

അതെ.ആരുടെയും ഔദാര്യത്തിൽ നിൽക്കാൻ താൽപ്പര്യം ഇല്ല.

വേണ്ട. പൊയ്ക്കോളൂ. പക്ഷെ ഇയാൾ ഒളിച്ചോടുന്നത് തന്റെ ജീവിതത്തിൽ നിന്നാ. വഞ്ചിക്കുന്നത് സ്വന്തം മനസാക്ഷിയെ ആണ്.

അല്പം മുന്നോട്ടുപോയ അവൻ നിന്നു.